HƏR AY ÜÇÜN ÜMUMİ ƏMƏLLƏR
Hər ay başlananda Allahdan həmin ay ərzində salamatlıq və uğur diləmək lazımdır. Dua kitablarında ayın əvvəlində yerinə yetirilən müəyyən əməllər qeyd olunmuşdur. Bu əməllər – namaz, dua və zikrlər – məxluqla Xaliq arasındakı bağı daha da möhkəmləndirir və insan Allahın fənaya uğramayan qüdrətinə sığınır. Heç şübhəsiz, Allaha yönəlmə və dua, bir çox çətinliklərin həllinə və bir çox bəlaların uzaqlaşmasına səbəb olacaqdır. Hər ayın əvvəlində yerinə yetirilən müştərək əməllər bunlardır:
1. Hilalı gördükdə "Səhifeyi Səccadiyyə"dəki 43-cü duanı oxuyun.
2.
Fatihə surəsini yeddi dəfə oxuyun.
3. Hər ayda üç gün oruc tutmaq təkidlə tövsiyə olunubdur. Mərhum Əllamə Məclisi "Zadul-məad" kitabında yazır: "Məşhur nəzər budur ki, bu üç gün ayın birinci cümə axşamı günü (pəncşənbə), ayın axırıncı cümə axşamı günü və ayın ikinci ongünlüyündəki birinci çərşənbə günüdür." Şaban ayının hamısını oruc tutmaq, qalan on ayda isə ayın üç gününü oruc tutmaq sünnədir. Əgər bir kəs bunu öz vaxtında yerinə yetirə bilməsə, onun qəzasını yerinə yetirə bilər. Hətta əgər həmin günlər yay aylarına düşsə və oruc tutmaq çətin olsa, bunun qəzasını qışda yerinə yetirə bilər.
Hədislərin birində İmam Sadiq (ə) buyurur: "Hər kim bu üç gündə oruc tutsa, çalışsın ki, heç kimlə mübahisə etməsin və bədrəftar olmasın. Əgər kimsə ona qarşı hörmətsizlik edərsə, göz yumsun. Əgər bu günlərdə mömin qardaşının evinə getsə və mömin qardaşı ondan orucunu açmasını istəsə, möminin dəvətini qəbul etmək və iftar etmək orucu saxlamaqdan yetmiş dəfə üstündür." Bir sözlə hər ayda üç gün (qeyd olunan günlərdə) oruc tutmağın böyük savabı vardır və təkidlə tövsiyə olunmuşdur.
4. Hər ayın birinci günü iki rəkət namaz qılınır: birinci rəkətdə
Fatihədən sonra otuz dəfə (ayın günlərinin sayı qədər)
İxlas surəsi, ikinci rəkətdə
Fatihədən sonra otuz dəfə
Qədr surəsi oxunur. Namazdan sonra Allah yolunda sədəqə verilir. (Əgər sədəqə düşən bir kəs olmasa, sədəqəni kənara qoyun.) Bəzi hədislərdə qeyd olunur ki, hər kim belə edərsə, həmin ayda öz salamatlığını Mütəal Allahdan almışdır. Bəzi hədislərdə qeyd olunur ki, ayın əvvəlində qılınan namazdan sonra aşağıdakı duanı da (belə ki, bu duada Quran ayələri yer almışdır) oxuyun:
بِسْمِ اللّٰهِ الرَّحْمٰنِ الرَّحِيْمِ
Rəhman və Rəhim Allahın adı ilə. Yer üzündəki bütün hərəkətdə olanların ruzisi Allahın öhdəsinədir, Allah onların qərar tutduqları və hərəkət etdikləri məkanı bilir, bunların hamısı aydın kitabda (Lövhi-məhfuzda) səbt olunubdur. Rəhman və Rəhim Allahın adı ilə. Əgər Allah (imtahan və ya başqa bir səbəb ilə) səni bir ziyana düçar etsə, Ondan qeyri kimsə bu ziyanı aradan qaldıra bilməz; əgər Allah sənin üçün bir xeyir istəsə, kimsə bu ehsanın qarşısını ala bilməz. O, bunu bəndələrindən istədiyinə verər. O, bağışlayan və mehribandır. Rəhman və Rəhim Allahın adı ilə. Allah çətinliklərdən sonra tezliklə asanlıq qərar verir. Allah nəyi istəsə, o da olacaqdır. Allahdan qeyri güc-qüvvə yoxdur. Allah bizə yetər və O, ən yaxşı vəkildir. Mən işimi Allaha həvalə edirəm, çünki Allah bəndələrini görəndir. Səndən qeyri ilah yoxdur, Sən pak və münəzzəhsən, mən isə zalımlardanam. Ey Rəbbim, Sənin mənə nazil etdiyin hər bir xeyir və yaxşılığa mənim ehtiyacım vardır. Ey Rəbbim, məni tək-tənha qoyma, Sən varislərin ən yaxşısısan.
وَ مَا مِنْ دَآبَّةٍ فِي الْاَرْضِ
اِلَّا عَلَى اللّٰهِ رِزْقُهَا
وَ يَعْلَمُ مُسْتَقَرَّهَا وَ مُسْتَوْدَعَهَا
كُلٌّ فِيْ كِتَابٍ مُبِيْنٍ
بِسْمِ اللّٰهِ الرَّحْمٰنِ الرَّحِيْمِ
وَ اِنْ يَمْسَسْكَ اللّٰهُ بِضُرٍّ فَلَا كَاشِفَ لَهُ اِلَّا هُوَ
وَ اِنْ يُرِدْكَ بِخَيْرٍ فَلَا رَآدَّ لِفَضْلِهِ
يُصِيْبُ بِهِ مَنْ يَشَاۤءُ مِنْ عِبَادِهِ
وَ هُوَ الْغَفُوْرُ الرَّحِيْمُ
بِسْمِ اللّٰهِ الرَّحْمٰنِ الرَّحِيْمِ
سَيَجْعَلُ اللّٰهُ بَعْدَ عُسْرٍ يُسْرًا
لَا قُوَّةَ اِلَّا بِاللّٰهِ
حَسْبُنَا اللّٰهُ وَ نِعْمَ الْوَكِيْلُ
وَ اُفَوِّضُ اَمْرِيْۤ اِلَى اللّٰهِ
اِنَّ اللّٰهَ بَصِيْرٌ بِالْعِبَادِ
لَاۤ اِلٰهَ اِلَّاۤ اَنْتَ سُبْحَانَكَ
اِنِّيْۤ كُنْتُ مِنَ الظَّالِمِيْنَ
رَبِّ اِنِّيْ لِمَاۤ اَنْزَلْتَ اِلَيَّ مِنْ خَيْرٍ فَقِيْرٌ
رَبِّ لَا تَذَرْنِيْ فَرْدًا وَ اَنْتَ خَيْرُ الْوَارِثِيْنَ۔
