ساری حمد اس اللہ کے لیے ہے جس نے ماہِ رجب میں ہمیں اپنے اولیاء کے مشہد پر

حاضری کی توفیق دی اور ان کے حقوق کو ہمارے اُوپر واجب قرار دیا۔

اللہ کی رحمت ہو حضرت محمدؐ پر جو منتخب ہیں

اور ان کے اولیاء پر جو بارگاہِ احدیت کے پردہ دار ہیں۔

خدایا جس طرح تو نے ہمیں ان کے مشاہد تک پہنچا دیا ہے

اب ان کے وعدہ کو بھی پورا فرمادے

اور ہمیں ان کی منزل میں وارد کردے

بغیر کسی رُکاوٹ کے

ہمیشہ رہنے والے گھر میں وارد کردے

سلام ہو تم پر اے اولیاء خدا!

میں تمہارے اس بارگاہ میں حاضر ہوا ہوں اور آپ پر اعتماد کیا ہے

اپنے کیے سوالات اور اپنی حاجت میں

اور وہ حاجت یہ ہے کہ میری گردن آتشِ جہنّم سے آزاد ہوجائے

اور مجھے آپ کے ساتھ جنّت میں جگہ مل جائے

آپ کے نیک شیعوں کی رفاقت میں۔

سلام ہو آپ پر کہ آپ نے صبر کیا ہے

جس کا انجام بہترین ہے۔

میں آپ کا سائل، آپ کا امیدوار ہوں ان معاملات میں جو آپ کے حوالہ کردئیے گئے

اور جن کے معاوضہ کی ذمّہ داری بھی آپ ہی پر ہے۔

آپ ہی سے شکستگی کا علاج ہوتا ہے،

مریضوں کو شفا دی جاتی ہے

اور ارحام میں کمی اور زیادتی ہوتی ہے۔

میں آپ کے اسرار پر ایمان لانے والا،

آپ کے قول کا تسلیم کرنے والا

اور اللہ کو آپ کے حق کی قسم دینے والا ہوں کہ

وہ میری حاجتوں کو

پورا فرما دے

اور ان کے بارے میں فیصلہ کرکے مجھے کامیابی دے

اور مشکلات کو زائل کردے۔ میرے امور کی اصلاح کردے۔

سلام ہو آپ پر اس چاہنے والے کا جو آپ کو رُخصت کررہا ہے اور آپ سے رُخصت ہورہا ہے

اور اپنی حاجتوں کو آپ کے پاس چھوڑ کر جارہا ہے۔

اللہ سے سوال ہے کہ آپ کی بارگاہ میں پھر پلٹ کر آؤں

اور اس کی کوشش ختم نہ ہونے پائے۔

اور جب بھی آپ کی بارگاہ سے پلٹوں تو بہترین واپسی ہو

بابرکت آستانے تک،

وسیع عیش و سکون تک

اور بہترین راحت تک یہاں تک کہ وقتِ اَجل آجائے

اور اس کے بعد بہترین برگشت اور بہترین منزل ملے

جہاں دائمی نعمت ہو،

پسندیدہ زندگی ہو،

کھانے پینے کا مسلسل سامان ہو اور برابر اس چشمۂ رحمت پر نزول ہوتا رہے

جہاں نہ کسی طرح خستگی ہو اور نہ کسی طرح کا رنج ہو۔

اللہ کی رحمت اور برکات اور تحیّات آپ اہل بیتؑ پر ہیں

یہاں تک کہ میں آپ کی بارگاہ میں پلٹ جاؤں

اور پھر اس واپسی کی کامیابی حاصل کروں

اور آپ کے زمرے میں محشور ہوں۔

اللہ کی رحمت و برکات اور صلوات و تحیّات آپ حضرات پر ہے۔

وہی خدا ہمارے لیے کافی ہے۔ وہی ہمارا بہترین وکیل ہے۔