بِكَ عَرَفْتُكَ وَ اَنْتَ دَلَلْتَنِيْ عَلَيْكَ وَ دَعَوْتَنِيْ اِلَيْكَ، وَ لَوْلَا اَنْتَ لَمْ اَدْرِ مَا انْتَ۔ اَلْحَمْدُ لِلّٰہِ الَّذِيْ اَدْعُوْهُ فَيُجِيْبُنِيْ وَ اِنْ كُنْتُ بَطِيْئًا حِيْنَ يَدْعُوْنِيْ، وَ الْحَمْدُ لِلّٰهِ الَّذِيْ اَسْاَلُهُ فَيُعْطِيْنِيْ وَ اِنْ كُنْتُ بَخِيْلًا حِيْنَ يَسْتَقْرِضُنِيْ، وَ الْحَمْدُ لِلّٰہِ الَّذِيْ اُنَادِيْهِ كُلَّمَا شِئْتُ لِحَاجَتِيْ، وَ اَخْلُوْ بِهٖ حَيْثُ شِئْتُ لِسِرِّيْ بِغَيْرِ شَفِيْعٍ فَيَقْضِىْ لِيْ حَاجَتِيْ، اَلْحَمْدُ لِلّٰہِ الَّذِيْ لَا اَدْعُوْ غَيْرَهُ وَ لَوْ دَعَوْتُ غَيْرَهُ لَمْ يَسْتَجِبْ لِيْ دُعَاۤئِـيْ، وَالْحَمْدُ لِلّٰہِ الَّذِيْ لَا اَرْجُوْ غَيْرَهُ وَ لَوْ رَجَوْتُ غَيْرَهُ لَاَخْلَفَ رَجَاۤئِـيْ، وَ الْحَمْدُ لِلّٰہِ الَّذِيْ وَكَلَنِيْ اِلَيْهِ فَاَكْرَمَنِيْ وَ لَمْ يَكِلْنِيْ اِلَى النَّاسِ فَيُهِيْنُوْنِيْ، وَ اَلْحَمْدُ لِلّٰہِ الَّذِيْ تَحَبَّبَ اِلَىَّ وَ هُوَ غَنِيٌّ عَنِّيْ، وَ الْحَمْدُ لِلّٰہِ الَّذِيْ يَحْلُمُ عَنِّيْ حَتّٰى كَاَنِّيْ لَا ذَنْبَ لِيْ، فَرَبِّيْ اَحْمَدُ شَيْئٍ عِنْدِيْ وَ اَحَقُّ بِحَمْدِيْ۔ اَللّٰہُمَّ اِنِّيْ اَجِدُ سُبُلَ الْمَطَالِبِ اِلَيْكَ مُشْرَعَةٌ، وَ مَنَاهِلَ الرَّجَاۤءِ اِلَیْكَ مُتْرَعَةً، وَ الْاِسْتِعَانَةَ بِفَضْلِكَ لِمَنْ اَمَّلَكَ مُبَاحَةً،
<font color="000000"><b>Səni Sənin köməyinlə tanıdım, Sən məni Özünə tərəf yönəltdin və dəvət etdin. Əgər Sən olmasaydın, mən bilməzdim ki, Sən kimsən. Həmd-səna o Allaha məxsusdur ki, mən Onu çağırıram və O mənə cavab verir, baxmayaraq ki, O məni cağırdıqda mən süstlük göstərirəm. Həmd-səna o Allaha məxsusdur ki, mən Ondan istəyirəm və O mənə əta edir, baxmayaraq ki, O məndən infaq etməyi (bəxş etməyi) tələb etdikdə mən paxıllıq edirəm. Həmd-səna o Allaha məxsusdur ki, mən Onu hər istəyim üçün cağırıram və hər zaman sirlərim barədə Onunla xəlvətdə vasitəsiz danışıram, O da mənim istəklərimi həyata keçirir. Həmd-səna o Allaha məxsusdur ki, mən Ondan qeyrisini çağırmıram və əgər Ondan geyrisini çağırsam, mənim istəyimə cavab verməyəcəkdir. Həmd-səna o Allaha məxsusdur ki, Ondan qeyrisinə ümid bağlamıram və əgər Ondan qeyrisinə ümid bağlasam, naümid olaram. Həmd-səna o Allaha məxsusdur ki, məni girami etməkdən ötrü məni Özünə tapşırmışdır və məni xar etməsinlər deyə məni camaata tapşırmamışdır. Həmd-səna o Allaha məxsusdur ki, mənə sevgi göstərir, bir halda ki, mənə ehtiyacı yoxdur. Həmd-səna o Allaha məxsusdur ki, mənə dözür, sanki mənim günahım yoxdur. Elə isə, mənim Rəbbim mənim həmd-sənama ən layiq olandır. Ey Allahım, mən istək yollarının Sənə tərəf açıq olduğunu, ümid çeşmələrinin Sənə tərəf cari olduğunu, Səni arzulayan kəs üçün Sənin ehsanından və yaxşılığından kömək istəməsinin icazəli olduğunu, haraya çağıranlar üçün Sənə dua qapılarının açıq olduğunu gördüm. Mən bilirəm, heç şübhəsiz, Sən ümid bəsləyənlərin (istəklərini) həyata keçirməyə və qəmlilərin harayına çatmağa hazırsan; heç şübhəsiz, Sənin səxavətinə olan şövq və Sənin müqəddəratına olan razılıq paxılların əsirgəmələri və dünyapərəstlərin əlində olanlardan qurtulmaq müqabilində dayanır; heç şübhəsiz, Sənə tərəf gələnin yolu qısadır və heç şübhəsiz, Sən məxluqatdan uzaq deyilsən, əlbəttə əgər onların (pis) əməlləri Səninlə onlar arasında ayrılıq salmazsa. Mən istəyimlə Səni qəsd etmişəm, Sənin dərgahına üz tutmuşam, harayımı Sənin dərgahında qərar vermişəm, Səni çağırmaqla Sənə təvəssül etmişəm; bir halda ki, Sənin (mənim harayımı və duamı) eşitməyinə və (məni) əfv etməyinə layiq deyiləm; Sənin kərəminə olan etimadım, Sənin doğru vədənə olan xatircəmliyim və Sənin tövhidinə iman gətirməyim, Sənin məni tanıdığına olan inamıma xatirdir ki, Səndən qeyri Rəbbim yoxdur, Səndən qeyri ilah yoxdur, yeganəsən və şərikin yoxdur. Ey Allahım, Sən sözü düz və vədi doğru olan danışansan (və buyurmusan): "Allahın fəzlindən istəyin, həqiqətən Allah rəhimlidir." Ey Ağam, bu, Sənə xas sifət deyil ki, istəməyi əmr edəsən, lakin bəxş etməyi əsirgəyəsən; Sənsən məxluqata bəxşişləri bəxş edən, ürəyiyananlığın və mehribanlığınla onlara diqqət yetirən. İlahi, Sən məni uşaq ikən nemətlərin və ehsanın içində böyütdün, böyüdükdə mənim adımı ucaltdın. Odur ki, ey məni dünyada ehsan, kərəm və nemətləri ilə böyüdən, axirətdə də mənim üçün əfv və kərəmə işarə edən! Ey mənim Mövlam, (Sənə olan) mərifətim (Səni tanımağım) Sənə tərəf bələdçimdir və Sənə olan məhəbbətim Sənin dərgahında şəfaətçimdir; mən Sənin bələdçiliyinlə hidayət olunduğuma əminəm və Sənin şəfaətinlə şəfaətçimin qəbul olunacağına arxayınam. Ey mənim Ağam, mən Səni günahın lal etdiyi dil ilə çağırıram; ey Rəbbim, mən Səninlə günahın həlak etdiyi qəlb ilə raz-niyaz edirəm; ey Rəbbim, mən Səni qorxu, rəğbət, ümid və vəhşət ilə çağırıram. Ey mənim Mövlam, mən öz günahlarımı gördükdə qorxuram, lakin Sənin kərəmini gördükdə ona tamah salıram. Elə isə, əgər məni əfv etsən, onda rəhimlilərin ən üstünüsən və əgər mənə əzab versən, mənə zülm etməmisən. Ey Allah, Səndən dilək diləməyə cürət etməyimin səbəbi – baxmayaraq ki, Sənin istəyinə zidd hərəkət etmişəm – Sənin səxavətin və kərəmindir; çətinliklərdə ehtiyacımın aradan qalxmasını istəməyimin səbəbi – baxmayaraq ki, həyasızlıq etmişəm – Sənin mehribanlığın və rəhmətindir. Ümidvaram ki, bu ikisi və o ikisi arasında məni naümid etməyəcəksən. Elə isə, ümidimi gerçəkləşdir və duamı eşit; ey çağırılanların ən üstünü və ümid bəslənilənlərin ən əfzəli. Ey Ağam, mənim arzum böyük və əməlim pisdir, elə isə, arzularım qədər mənə Öz əfvindən əta et və məni pis əməlimə görə cəzalandırma; çünki Sənin kərəmin günahkarların cəzasından və Sənin helmin səhlənkarların cəzasından böyükdür. Ey Ağam, mən Sənin fəzl və ehsanına pənah gətirmişəm, Səndən (əzabından) Sənə (rəhmətinə) fərar etmişəm; Sənə xoş güman bəsləyənin (günahlarına) göz yumacağın baradə verdiyin vədi gerçəkləşdirdin. Ey Rəbbim, axı mən kiməm və mənim nə dəyərim vardır; Öz fəzlinlə mənə bəxş et və Öz əfvinlə mənə minnət qoy; ey Rəbbim, Öz səttarlığınla məni girami et və kərim zatınla məni cəzalandırmaqdan daşın. Əgər bu gün Səndən qeyrisi mənim günahımdan xəbər tutsaydı, mən bu günahı işlətməzdim və əgər tez bir zamanda cəzalandırılacağımdan qorxsaydım, heç şübhəsiz, bu günahı işlətməzdim. (Günah işlətməyimin səbəbi) bu deyil ki, Sən (mənim üçün) görənlərin ən dəyərsizisən və xəbər tutanların ən geridə qalanısan; əksinə, bu ona görədir ki, Sən, ey Rəbbim, eybi örtənlərin ən üstünü, hakimlərin ən alimi, giramilərin ən giramisi, eyibləri hamıdan çox örtən, günahları bağışlayan, gizlini bilənsən və Öz kərəminlə günahları örtür, Öz helminlə cəzanı təxirə salırsan. Elə isə, həmd-səna Sənə məxsusdur, elmindən sonra helminə görə və qüdrətindən sonra əfvinə görə. Sənin mənə qarşı səbrin məni Sənə asi olamağa vadar və cürətli edir, mənə qarşı olan səttarlığın məni Sənə qarşı həyasızlığa səsləyir, geniş rəhmətinə və böyük əfvinə olan agahlığım məni haram işlər görməyə tələsdirir. Ey səbirli, ey alicanab, ey diri, ey əbədi, ey günahları bağışlayan. Ey tövbələri qəbul edən, ey neməti böyük olan, ey ehsanı qədim olan! Haradadır Sənin gözəl səttarlığın (eyibləri örtməyin)? Haradadır Sənin gözəl əfvin? Haradadır Sənin yaxın fərəcin (qurtuluş)? Haradadır Sənin tez haraya yetməyin? Haradadır Sənin geniş rəhmətin? Haradadır Sənin çoxlu bəxşişlərin? Haradadır Sənin ürəyəyatan hədiyyələrin? Haradadır Sənin ali məharətlərin? Haradadır Sənin böyük fəzlin (lütf və kərəmin)? Haradadır Sənin böyük nemətin? Haradadır Sənin qədim ehsanın? Haradadır Sənin kərəmin? Ey Kərim, dediklərimə xatir, Məhəmmədə və Ali-Məhəmmədə xatir mənə nicat ver, Öz rəhmətinə xatir məni xilas et. Ey yaxşılıq edən, ey layiqli, ey nemət verən, ey çox bəxş edən! Sənin cəzandan qurtulmaq üçün Öz əməllərimə arxalanmamışam, əksinə, Sənin bizə qarşı olan fəzlinə arxalanmışam; çünki Sən təqva və məğfirət əhlisən (layiqsən ki, Səndən çəkinsinlər və Sən bağışlayasan), ehsanınla nemətə başlayır və kərəminlə günahlardan keçirsən. Bilmirəm nəyə görə Sənə şükür edim: yaydığın gözəlliyə görəmi, yoxsa örtdüyün çirkinliyə görə? Yaxud sınağının və ehsanının böyüklüyünə görəmi, yoxsa nicat və salamatlıq verdiyin məqamların çoxluğuna görə? Ey Səninlə dostluq iddiası edənin dostu, ey Sənə sığınıb başqalarından qırılanın gözünün aydınlığı! Sən yaxşılıq edənsən və biz günahkarıq, elə isə, ey Rəbbim, Sənin dərgahında olan gözəlliklə bizim qəbahətlərimizdən keç. Ey mənim Rəbbim, o hansı cəhalətdir ki, Sənin bəxşişinin genişliyi onu əhatə etməsin? Yaxud o hansı zamandır ki, Sənin səbrindən daha çoxdur? Bizim əməllərimizin Sənin nemətlərinin qarşısında nə dəyəri vardır ki?! Sənin kərəminlə bərabərləşdirmək üçün əməllərimizi necə çox saya bilərik? Sənin geniş rəhmətin günahkarlara necə darala bilər? Ey məğfirəti geniş olan, ey rəhmətə əliaçıq olan! And olsun izzətinə, ey mənim Ağam, əgər məni Öz dərgahından qovsan, getməyəcəyəm və Sənin səxavətin və kərəmin barədə əldə etdiyim agahlığa xatir Sənə dil tökməkdən əl çəkməyəcəyəm. Sənsən hər istədiyini edən, istədiyinə istədiyin əzabla və istədiyin şəkildə əzab verən, istədiyinə istədiyin mərhəmətlə və istədiyin şəkildə mərhəmət edən; işlərin barədə sorğu-suala çəkilmirsən, hökmdarlığın barədə Səninlə kimsə çəkişmir, işində şərikin yoxdur, hökmündə ziddiyyət yoxdur, işlərin idarəçiliyində kimsə Sənə etiraz etmir; xəlq etmək və əmr etmək Sənə məxsusdur. Aləmlərin rəbbi olan Allahın şəni ucadır. Ey Rəbbim, bu, Sənə sığınan, Sənin kərəminə pənah gətirən, Sənin ehsanına və nemətlərinə adət etmiş bir kəsin durumudur. Sənsən əfvi məhdudlaşmayan, kərəmi və rəhməti azalmayan bəxş edən. Ey Rəbbim, heç mümkündürmü ki, bizim gümanımıza zidd davranasan, yaxud bizim arzularımızı naümid edəsən? Əsla! Ey Kərim, çünki bizim Sənə olan gümanımız və ümidimiz belə deyildir. Ey Rəbbim, həqiqətən bizim Sənə böyük və çoxlu arzumuz, böyük ümidimiz vardır. Sənə asi olmuşuq və ümidvarıq ki, bunu bizim üçün örtəsən; Səni çağırırıq və ümidvarıq ki, bizə cavab verəsən. Ey Mövlamız, bizim ümidimizi gerçəkləşdir, çünki biz bilirik ki, əməllərimizin əvəzində nəyə layiqik, lakin Sən bizim barəmizdə hər şeyi bilirsən; biz bilirik ki, Sən bizi Öz dərgahından uzaqlaşdırmazsan, baxmayaraq ki, biz Sənin rəhmətinə layiq deyilik. Sən geniş fəzlinlə bizə və bütün günahkarlara bəxş etməyə layiqsən. Elə isə, Sən layiq olduğunla bizə minnət qoy və bizə bəxş et, çünki biz Sənin bəxşişinə möhtacıq. Ey bağışlayan, Sənin nurunla hidayət olunduq, Sənin fəzlinlə ehtiyacsız olduq, Sənin nemətlərinlə sübhü açdıq və gecələdik; bizim günahlarımız Sənin qarşındadır, ey Allahım, günahlarımıza görə bağışlanma diləyir və Sənin dərgahına tövbə edirik. Sən Öz nemətlərinlə bizə mehr-məhəbbət göstərdin, biz isə bunun əvəzində Sənə itaətsizlik etdik; Sənin xeyrin bizə nazil olur və bizim şərimiz Sənin dərgahına qalxır; daim kərim bir mələk bizim pis əməlimizi Sənin dərgahına gətirir, lakin bu, bais olmur ki, Sən bizi Öz nemətlərinə qərq etməyəsən və Öz lütfünü bizə şamil etməyəsən. Sənə təsbih deyirəm, Sən nə qədər səbirli, əzəmətli və kərimsən, istər başladıqda, istərsə də davam etdirdikdə. Adların müqəddəsdir, həmd-sənan böyükdür, məharətlərin və işlərin kəramətlidir. Sən mənim Məbudumsan, Sənin lütfün və helmin məni işlərim və günahlarımla ölçməkdən daha böyükdür. Elə isə, məni əfv et, əfv et, əfv et, ey Ağam, ey Ağam, ey Ağam. Ey Allahım, bizi Öz zikrinlə məşğul et, bizə Öz qəzəbindən pənah ver, bizi Öz əzabından qurtar, Öz ətalarını bizə ruzi et, Öz fəzlindən bizə bəxş et; Öz evinin həccini və Peyğəmbərinin qəbrinin ziyarətini – Sənin salamın, rəhmətin, məğfirətin və razılığın olsun ona və onun Əhli-beytinə - bizə ruzi et, həqiqətən Sən yaxınsan və icabət edənsən; Sənə itaəti bizə ruzi et, bizi Öz dinində və Peyğəmbərinin sünnəsində - Allahın salamı olsun ona və xanidanına – öldür. Ey Allahım, məni və ata-anamı bağışla, ata-anama rəhm et, çünki mən uşaq ikən onlar məni böyütdülər, yaxşılıqlarının əvəzində onlara yaxşılıq və pisliklərinin əvəzində onlara bağışlanma əta et. Ey Allahım, mömin kişi və qadınların həyatda olanlarını və ölənlərini bağışla, bizimlə onların arasında xeyirlərlə bağlılıq yarat. Ey Allahım, bizim dirilərimizi və ölülərimizi, hazır və qaib olanlarımızı, kişilərimizi və qadınlarımızı, kiçiklərimizi və böyüklərimizi, azadlarımızı və qullarımızı bağışla. Allahdan üz döndərənlər yalan dedilər, uzaq azğınlığa və aşkar ziyana düçar oldular. Ey Allahım, Məhəmmədə və Ali-Məhəmmədə salam göndər, aqibətimi xeyirli et, məni qəmgin edən dünya və axirət işlərimdə mənə kifayət et, mənə rəhm etməyəni mənə hakim etmə, Öz tərəfindən mənə daimi mühafizəçi qərar ver, mənə verdiyin layiqli nemətləri məndən alma, Öz fəzlindən mənə geniş, halal və pakizə ruzi ver. Ey Allahım, məni Öz mühafizən, himayən və qorumağınla mühafizə et; Öz evinin həccini, Peyğəmbərinin və İmamların – Allahın salamı olsun onlara – qəbrinin ziyarətini bu il və hər il mənə ruzi et; ey Rəbbim, məni bu şərafətli məqbərələrin və dəyərli məkanların (ziyarətindən) məhrum etmə. Ey Allahım, məni tövbə etməyə müvəffəq et, ta Sənə itaətsizlik etməyim; mənə xeyir və ona əməl etməyi ilham et, həmçinin nə qədər ki həyatdayam, gecə-gündüz Səndən qorxmağı mənə ilham et, ey aləmlərin Rəbbi. Ey Allahım, "hazıram" deyib namaz qılmaq üçün qarşında dayandığım və Səninlə raz-niyaz etdiyim hər bir vaxt namaz qıldığımda yuxunu mənə müsəllət etdin və Səninlə raz-niyaz etdiyimdə bu uğuru məndən aldın. Nə baş verir ki, mən öz-özümə: "batinim islah olunub və mən tövbə edənlərə yaxınlaşmışam" – dediyim vaxt mənə bir bəla üz verir ki, ayaqlarım sürüşür və mənimlə Sənə bəndəlik arasında fasilə düşür? Ey Ağam, bəlkə məni Öz dərgahından qovmusan və məni Öz bəndəliyindən uzaqlaşdırmısan?! Bəlkə məni Sənin haqqını yüngül tutanlardan görüb məni qovmusan?! Bəlkə məni Səndən üz döndərənlərdən görüb mənə qəzəb etmisən?! Bəlkə məni yalançıların məqamında görüb məni tərk etmisən?! Bəlkə məni Sənin nemətlərinə naşükür görüb məni məhrum etmisən?! Bəlkə məni alimlərin məclisindən uzaq görüb məni xar etmisən?! Bəlkə məni qafillərin arasında görüb məni Öz rəhmətindən naümid etmisən?! Bəlkə məni iş görməyənlərin yoldaşı görüb məni onların arasında qoyub tərk etmisən?! Bəlkə mənim duamı eşitməyi sevmədiyin üçün məni uzaqlaşdırmısan?! Bəlkə məni günahıma və cinayətimə görə cəzalandırırsan?! Bəlkə Sənə qarşı həyasızlıq etdiyimə görə məni cəzalandırırsan?! Ey Rəbbim, əgər məni əfv etsən (layiqli iş tutmusan), çünki əvvəldən məndən öncə saysız günahkarları bağışlamısan, çünki Sənin kərəmin, ey mənim Rəbbim, səhlənkarlıq edənlərin cəzasından daha böyükdür. Mən Sənin fəzlinə pənah gətirmişəm, Sənin qorxundan Sənə tərəf fərar etmişəm, Sənə xoş gümanı olana vəd etdiyin səttarlığı istəyirəm. İlahi, Sənin fəzlin və helmin məni əməllərimlə ölçməkdən və ya səhvlərimlə məni (düz yoldan) sapdırmaqdan daha geniş və böyükdür. Ey mənim Ağam, mən kiməm və nə dəyərim var; Öz fəzlinlə mənə bəxş et, ey Ağam, əfvinlə mənə minnət qoy, səttarlığınla məni girami et, kərim zatınla mənim cəzamdan keç. Ey Ağam, mən Sənin böyütdüyün o kiçik bəndəyəm, mən Sənin elmli etdiyin o nadanam, mən Sənin hidayət etdiyim o azğınam, mən Sənin ucaltdığın o yerə düşmüş kəsəm, mən Sənin aman verdiyin o qorxmuş kəsəm, mən Sənin doyurduğun o ac kimsəyəm, mən Sənin sirab etdiyin o susuzam, mən Sənin geyindirdiyin o çılpağam, mən Sənin ehtiyacsız etdiyin o möhtacam, mən Sənin qüvvətli etdiyin o acizəm, mən Sənin izzətli etdiyin o xar kimsəyəm, mən Sənin şəfa verdiyin o xəstəyəm, mən Sənin əta etdiyin o dilənçiyəm, mən Sənin (günahlarını) örtdüyün o günahkaram, mən Sənin (günahlarından) keçdiyin o xətakaram, mən Sənin böyük etdiyin o kiçik kəsəm, mən Sənin kömək etdiyin o zəifəm, mən Sənin pənah verdiyin o qovulmuş kəsəm. Ey Rəbbim, mən o kəsəm ki, xəlvətdə Səndən həya etmədim və insanlar arasında Səni nəzərə almadım; mən böyük giriftarlıqların sahibiyəm; mən öz ağasına qarşı cürət edən kəsəm, mən asimanın iqtidar sahibinə itaətsizlik edən kəsəm, mən böyük günahlarına görə rüşvət verən kəsəm, mən üsyankarlıq müjdəsi verilən vaxt ona tərəf tələsən kəsəm; mən o kəsəm ki, Sən mənə möhlət verdin, lakin mən peşman olmadım, Sən mənim (günahlarımı) örtün, lakin mən həya etmədim, itaətsizlik etdim və həddi aşdım, Sənin gözündən düşdüm, lakin etina etmədim; beləliklə, Öz helminlə mənə möhlət verdin və Öz səttarlığınla günahlarımı örtdün, ta güya məndən qafil oldun və məni günahların cəzasından uzaqlaşdırdın, hətta sanki Sən məndən həya etdin. İlahi, mən Sənə asi olduğumda Sənin rəbbliyini inkar etmədim, Sənin əmrini yüngül saymadım, Sənin cəzana layiq görülməyi istəmədim və Sənin (əzab) vədənə etinasızlıq etmədim; əksinə bu, bir səhv idi ki, baş verdi və mən nəfsimin vəsvəsələrinə uydum, həvayi-nəfsim mənə qalib oldu, bədbəxtliyim bu işi yerinə yetirməyə mənə kömək oldu, Sənin səttarlığın məni özümdən çıxartdı, beləliklə, bacardığım qədər Sənə itaətsizlik etdim və Sənə qarşı çıxdım. İndi kim məni Sənin əzabından və sabah düşmənlərin əlindən nicat verəcəkdir? Əgər Sən bizim aramızda olan bağı kəssən, mən kimin bağından tutum? Vay olsun Öz Kitabında mənim əməllərimdən yazdığın rüsvayçılıqlara görə! Əgər Sənin kərəminə və geniş rəhmətinə ümid etməsəydim və Sən məni naümid olmaqdan çəkindirməsəydin, heç şübhəsiz, o əməlləri xatırladıqca naümid olardım. Ey çağırılanların ən üstünü və ey ümid bəslənilənlərin ən əfzəli! Ey Allahım, İslamın pənahında Sənə təvəssül edir, Quranın hörməti sayəsində Sənə təvəkkül edir, ümmi (dərs almayan), qureyşli, Haşimi, ərəb olan, Təhamədən olan, məkkəli və mədinəli Peyğəmbərinin dostluğu sayəsində Sənin dərgahında yer tutmağa ümidim vardır. Mənim iman ilə birgə olan ünsimi vəhşətə çevirmə, mənim mükafatımı Səndən qeyrisinə bəndəlik edən kəsin mükafatı qərar vermə; çünki bir dəstə dildə iman gətirdilər ki, İslam sayəsində qanlarını qorusunlar, beləcə, istəklərinə çatdılar; lakin biz dil və qəlb ilə Sənə iman gətirdik ki, bizi əfv edəsən, elə isə, bizi istəyimizə çatdır və Sənə olan ümidimizi qəlbimizdə yaşat, qəlblərimizi hidayət etdikdən sonra azdırma, Öz tərəfindən bizə rəhmət bəxş et, çünki Sən bəxş edənsən. And olsun izzətinə, əgər məni Öz dərgahından qovsan, getməyəcəyəm; qəlbimə ilham olunan kərəmin və geniş rəhmətinə xatir Sənə yalvarmaqdan əl çəkməyəcəyəm. Qul öz ağasından başqa kimin yanına getsin və məxluq öz xaliqindən başqa kimə sığınsın? İlahi, əgər məni zəncirlərə giriftar etsən, bəndələrinin arasından Öz ətalarını mənə qadağan etsən, rüsvayçılıqlarımı bəndələrin gözü önünə çıxartsan, mənə Cəhənnəmi əmr etsən, mənimlə yaxşı əməl sahibləri arasında ayrılıq salsan, Səndən ümidimi kəsməyəcəyəm, Sənin əfvini arzulamaqdan vaz keçməyəcəyəm və Sənin məhəbbətin qəlbimdən çıxmayacaqdır; mən dünyada mənə olan yardımlarını və səttarlığını unutmayacağam. Ey Ağam, dünya məhəbbətini mənim qəlbimdən çıxart; məni seçilmiş Peyğəmbərin və onun məxluqat arasından seçdiyin xanidanının, peyğəmbərlərin sonuncusu Məhəmmədin – Allahın salamı olsun ona və xanidanına – kənarında et; məni Sənə tərəf qayıdış (tövbə) dərəcəsinə keçirt və öz halıma ağlamaqda mənə kömək et. (Vəzifələri) təxirə salmaq və uzun-uzadı arzular etməklə mən öz ömrümü puç etdim, xeyirlərdən ümidini üzənlərin məqamına tənəzzül etdim; halı məndən də pis olan kimsə varmı? Əgər bu vəziyyətdə rahat uyumaq üçün hazırlamadığım və yaxşı əməl ilə rahat məkan düzəltmədiyim bir məzara aparılsam, nə üçün də ağlamayım, bir halda ki, sonumun necə olacağını bilmirəm? Nəfsim məni aldadır, dövran məni tovlayır, ölümün qanadları başımın üstündə hərəkət edir, elə isə, nə üçün ağlamayım? Ağlayıram can verəcəyim üçün, ağlayıram qəbrin qaranlığı üçün, ağlayıram ləhədimin darlığı üçün, ağlayıram Munkər və Nəkirin sorğu-sualı üçün; ağlayıram qəbirdən çıxarılacağım üçün, bir halda ki, çılpaq və zəliləm, günahın ağır yükünü kürəyimdə daşıyıram, sağa-sola baxıram, camaatı özümdən fərqli bir vəziyyətdə görürəm, o gün hər kəsin vəziyyəti onu özünə məşğul etmişdir, o gün bəzi üzlər parlaq, gülər və sevinclidir, bəzi üzlər isə toz-torpaq içində olub qaranlıq və zillət onu bürümüşdür. Ey Ağam, mənim dayağım Sənsən, mənim etimadım, ümidim və təvəkkülüm Sənədir; mən Sənin rəhmətinə ürək bağlamışam, istədiyini öz rəhmətinə qovuşdurarsan və sevdiyini Öz kəramətinlə hidayət edərsən. Qəlbimi şirkdən təmizlədiyin və dilimi sitayişə açdığın üçün həmd-səna Sənə aiddir. Bu dolaşan dil ilə Sənə şükür edim, yaxud əməldə ciddi-cəhd göstərməklə Səni razı edim? Ey Rəbbim, Sənin şükrünün müqabilində mənim dilimin nə dəyəri vardır və Sənin mənə verdiyin nemət və ehsanın müqabilində əməlimin nə dəyəri vardır?! İlahi, həqiqətən Sənin səxavətin mənim arzumu artırmışdır və Sənin təşəkkürün mənim əməlimin qəbul olunmasına səbəb olmuşdur. Ey Ağam, mənim rəğbətim, qorxum və arzum Sənə doğrudur; arzum məni Sənə tərəf çəkmişdir; ey mənim Yeganəm, himmətim Sənə tərəf yönəlmiş və Sənin dərgahında olanlara rəğbətim artmışdır; xalis ümidim və qorxum Sənə aiddir, məhəbbətim Səninlə üns yaratmışdır, özümü Sənə tapşırmışam və Sənin bəndəlik ipinə öz qorxumu bağlamışam. Ey Mövlam, qəlbim Sənin zikrinlə yaşayır və Sənin minacatınla qorxumu yatırıram. Ey mənim Mövlam və arzum, ey mənim son istəyim, mənimlə Sənə bəndəlik etməyə mane olan günahlar arasında ayrılıq sal, qədimdən Sənə olan ümidim və böyük rəğbətimə xatir Səndən istəyirəm; Sən mehribanlığı və rəhməti Özünə vacib etmisən, əmr Sənin əlindədir, Sən yeganəsən və şərikin yoxdur , bütün məxluqat Sənin ruzi yeyənindir və Sənin ixtiyarındadırlar, hər şey Sənin qarşında baş əymişdir, Sən pak və münəzzəhsən, ey aləmlərin Rəbbi. İlahi, dəlilim yetərli olmadığı, dilim Sənə cavab verməkdə lal olduğu və düşüncəm Sənin sualını cavablandırmaqda aciz olduğu vaxt mənə rəhm et. Ey mənim böyük ümidim, şiddətli çarəsizliyimdə məni naümid etmə, cəhalətimə görə məni (Öz dərgahından) qovma, səbirsizliyimə görə məni məhrum etmə, ehtiyaclı olduğuma görə mənə bəxş et, zəif olduğuma görə mənə rəhm et. Ey Ağam, mənim etimadım, dayağım, ümidim və təvəkkülüm Sənədir; Sənin rəhmətinə ürək bağlamışam, Sənin dərgahına üz tutmuşam, Sənin səxavətinə görə istəyimi Sənin dərgahına gətirmişəm; Sənin kərəminə görə, ey Rəbbim, duaya başlayıram, Sənin dərgahında giriftarlığımın aradan qalxacağına ümidvaram, Sənin ehtiyacsızlığınla öz ehtiyaclarımı aradan qaldıracağam, Sənin əfvinin kölgəsində dayanmışam, Sənin səxavətinə, kəramətinə və ehsanına göz dikmişəm. Elə isə, məni odda yandırma, bir halda ki, mənim arzumun məkanı Sənsən; məni Cəhənnəmdə yerləşdirmə, çünki mənim gözümün aydınlığı Sənsən. Ey Ağam, Sənin ehsanına və lütfünə olan gümanımı təkzib etmə, çünki Sənsən mənim güvəndiyim; məni Öz savabından məhrum etmə, çünki Sənsən mənim ehtiyacımı bilən. İlahi, əgər ölümüm yaxınlaşıbsa və əməlim məni Sənə yaxınlaşdırmayıbsa, günahımı etiraf etməyi üzrümə səbəb qərar verirəm. İlahi, əgər əfv etsən, əfv etməyə Səndən daha layiqlisi kimdir və əgər əzab etsən, hakimlikdə Səndən daha ədalətlisi kimdir? Bu dünyada qəribliyimə, ölüm anında kədərimə, qəbirdə tənhalığıma, ləhəddə qorxuma, Sənin qarşında dayanıb mənimlə haqq-hesab aparılarkən yerimin çox aşağıda olmasına rəhm et. İnsanlardan gizlin olan əməllərimi bağışla, hər zaman (əməllərimin) üstünü ört, yatağa düşdüyüm və dostların məni o tərəf-bu tərəfə çevirdikləri vaxt mənə rəhm et, qüsl məkanında uzandığım və yaxşı qonşuların (qüsl etmək üçün) məni o tərəf-bu tərəfə çevirdikləri vaxt mənə lütf et, dostların mənim cənazəmi əhatəyə aldıqları və məni (çiyinlərində) daşıdıqları vaxt mənə rəhm et, qəbirdə tənha qalıb Sənə tərəf aparıldığım vaxt mənə bəxş et, bu yeni evdə qəribliyimə rəhm et, ta Səndən qeyrisi ilə üns yaratmayım. Ey Ağam, əgər məni özümə həvalə etsən, həlak olaram. Ey Ağam, əgər Sən mənim sapqınlıqlarıma göz yummasan, kimdən kömək istəyərəm? Əgər qəbirdə Sənin mərhəmətini əldən versəm, kimə sığınaram? Əgər Sən mənim giriftarlığımı həll etməsən, kimə üz tutaram? Ey Ağam, əgər Sən mənə rəhm etməsən, mənim kimim vardır və kim mənə rəhm edər? Əgər ehtiyac günü Sənin fəzlini əldən versəm, mən kimi arzulayım? Əgər ömrüm başa çatsa, günahlarımdan kimə tərəf fərar edim? Ey Ağam, Sənə ümid bəslədiyim bir halda mənə əzab vermə. İlahi, ümidimi gerçəkləşdir və qorxumu arxayınlığa çevir, həqiqətən çoxlu günahlarım üçün Sənin əfvindən qeyri bir şeyə ümidim yoxdur. Ey Ağam, mən Səndən layiq olmadığım bir şey istəyirəm, bir halda ki, Sən təqva və məğfirət əhlisən. Elə isə, məni bağışla, Öz tərəfindən mənə eybəcərlikləri örtən bir geyim geyindir, onları (həmin eybəcərlikləri) bağışla ki, onlar barəsində sorğu-suala çəkilməyim, çünki Sən qədim nemət, böyük güzəşt və kərim əfv sahibisən. İlahi, Sən o kəssən ki, nemətin Səndən istəməyənlərə və Sənin rəbbliyini inkar edənlərə enməkdədir. Elə isə, ey Ağam, Səndən istəyənlərə və Sənin xaliq olduğuna, işlərin Sənin əlində olduğuna inananlara nemətin necə enməsin?! Pak və münəzzəhsən, ey aləmlərin Rəbbi! Ey Ağam, bəndən Sənin dərgahına gəlmiş, yoxsulluq onu Sənin qarşında saxlamış, duası ilə Sənin ehsan qapını döyür; elə isə, kərim üzünü məndən döndərmə, söylədiklərimi qəbul et. Bu dua ilə Səni çağırıram, bir halda ki, Sənin mehribanlığına və rəhmətinə olan mərifətimə xatir məni əliboş geri qaytarmayacığına ümidvaram. İlahi, Sən o kəssən ki, istəyənlərin istəkləri Səni çaşdırmır, bəxş etmək Səndən heç nəyi azaltmır, Sən Özünün dediyi kimisən və bizim dediklərimizdən ucasan. Ey Allahım, Səndən gözəl səbir, yaxın fərəc, doğru söz və böyük savab istəyirəm. Ey Rəbbim, Səndən bütün xeyirləri – bildiyim və bilmədiyim xeyirləri – istəyirəm. Ey Allahım, Səndən saleh bəndələrinin ən yaxşı istəklərini istəyirəm. Ey dilək dilənilənlərin ən üstünü və bəxş edənlərin ən səxavətlisi, mənim istəklərimi özüm, ailəm, atam-anam, qohumlarım və din qardaşlarım barəsində həyata keçir; güzəranımı xoş et, mürüvvətimi zahir et, bütün hallarımı yaxşı et; məni o kəslərdən qərar ver ki, ömürlərini uzatmısan, əməllərini gözəlləşdirmisən, nemətlərini onlara tamamlamısan, onlardan razısan, onlara davamlı şadlıq, bəxş edilmiş kəramət və kamil həyatla yanaşı olan pak bir ömür vermisən; çünki Sən istədiyini edirsən, başqalarının istədiklərini deyil. Ey Allahım, xüsusi diqqətini mənə aid et, gecə və gündüz ərzində Sənə yaxınlaşmaq üçün etdiyim işlər riya, özünü bəyənmək, özünü üstün bilmək və xudbinlik üzündən olmasın, məni Sənə boyun əyənlərdən qərar ver. Ey Allahım, mənə ruzidə bolluq, vətəndə əmniyyət, ailədə, mal-mülkdə və övladda gözaydınlığı, mənə verdiyin nemətlərdə daimilik, bədəndə sağlamlıq və qüvvə, dində salamatlıq əta et; nə qədər ki həyatdayam, məni daim Öz itaətinə və elçin Məhəmmədin – Allahın salamı olsun ona və xanidanına – itaətinə məşğul et; məni o bəndələrdən qərar ver ki, nazil etdiyin hər bir xeyirdə ən çox pay sahibidirlər; o xeyirlər ki, Sən ramazan ayının Qədr gecəsində nazil edirsən, hər il Öz rəhmətindən paylayırsan, (bəndələri) salamatlığa bürüyürsən, bəlaları geri qaytarırsan, yaxşılıqları qəbul edirsən və günahları bağışlayırsan; Öz evinin həccini bu il və hər il mənə ruzi et; geniş fəzlindən mənə çoxlu ruzi nəsib et. Ey Ağam, pis olanları məndən uzaq et; borclarımı və boynumda olan haqqları ödə, ta onlara görə məni incitməsinlər; mənim düşmənlərimin, mənə həsəd aparanların və mənə zülm edənlərin qulağını və gözünü mənə qarşı bağla, onlara qarşı mənə kömək et; gözümü aydın və qəlbimi şad et, qəm-güssəmin aradan qalxması üçün bir yol qərar ver; bəndələrindən mənə qarşı pis niyyətdə olanları mənim ayaqlarıma sal; şeytanın, sultanın və günahlarımın şərini məndən dəf et; məni bütün günahlardan təmizlə, Öz əfvinlə cəhənnəm odundan mənə pənah ver, Öz rəhmətinlə məni Cənnətə daxil et, Öz fəzlinlə məni hurul-eyn ilə izdivac etdir; məni saleh bəndələrinə - Məhəmmədə və onun yaxşı əməl sahibi olan pak, pakizə, seçilmiş xanidanına qovuşdur, Sənin salamın olsun onlara, onların bədənlərinə və ruhlarına, Allahın rəhməti və bərəkəti olsun onlara.</b></font>
