خدایا میں تیری بارگاہ میں حاضر ہوں

اس لیے کہ تیری وحدانیت اور بے نیازی کو مانتا ہوں

اور یہ جانتا ہوں کہ کوئی تیرے علاوہ میری حاجت کو پورا نہیں کرسکتا۔

میں جانتا ہوں کہ

جب نعمتوں کا اضافہ اور غلبہ ہوتا ہے

تو حاجت اور بڑھ جاتی ہے۔

اب اس وقت پھر ایک نئی مصیبت میں مبتلا ہوگیا۔ اس مشکل سے نجات دے۔

تو جانتا ہے کہ اس مصیبت کو کیسے دور کیا جاسکتا ہے۔

تیرے پاس طاقت ہے۔

میں تیرے اس نام کے سہارے سے سوال کرتا ہوں جس کو پہاڑ پر رکھ دیا جائے تو ریزہ ریزہ ہوجائے،

آسمانوں پر رکھ دیا جائے تو شق ہوجائے،

ستاروں پر رکھ دیا جائے تو بکھر جائیں،

زمین پر رکھ دیا جائے تو برابر ہوجائے۔

خدایا اس حق کے واسطے سے سوال کرتا ہوں جس کو تو نے

محمدؐ و آل محمدؐ ،

علیؑ، حسنؑ، حسینؑ،

علیؑ، محمدؑ، جعفرؑ،

موسیٰؑ، علیؑ، محمدؑ،

علیؑ، حسنؑ اور اپنی حجّت کے پاس رکھا ہے

کہ تو آل محمدؐ پر رحمت نازل فرما،

میری حاجتوں کو پورا فرما،

مشکلات کو آسان فرما،

مہمّات میں کافی ہوجا۔

اگر تو نے ایسا کردیا تب بھی تیری حمد

اور اگر نہیں کیا تب بھی تیری حمد۔

اس لیے کہ تیرے فیصلے میں کوئی ظلم نہیں ہے،

تیرے فیصلے میں کوئی غلطی نہیں ہے

اور تیرے انصاف میں کسی طرح کی زیادتی کا کوئی اندیشہ نہیں ہے۔

خدایا یونسؑ تیرا بندہ تھا

جس نے تجھ سے شکمِ ماہی کے اندر دعا کی

اور تونے اس کی دعا کو قبول کرلیا۔

تو میں بھی تیرا بندہ ہوں۔ میں تجھ سے دعا کررہا ہوں لہٰذا میری دعا کو قبول فرما۔