مناجات منظوم علی بن ابئ طالب علیہ السلام منقول از صحیفہ علویہ

بنام خدائے رحمان و رحیم

حمد تیری مالک مجد و کرم ربِّ علا

تیری ہی برکت سے وابستہ ہے ہر منع و عطا

میرے مالک میرے خالق میرا ملجا تو ہی ہے

تیری ہی درگاہ ہے ماوائے ہر فقر و غنا

میرے مالک لاکھ ہوجائیں گنہ میرے عظیم

عفو سے تیرے نہیں بالا میری کوئی خطا

میرے مالک کر کے پوری نفس کی ہر آرزو

آج بستان پشیمانی میں ہیں میری غذا

میرے مالک فقرو فاقہ کا ہے میرے تو علیم

اور پھر سنتا ہے تو ہی میری ہر مخفی دعا

میرے مالک ہوں تیرے الطاف کا امیدوار

نا امیدی اور گمراہی سے اب تو ہی بچا

میرے مالک کردیا گر تو نے رسوا و ذلیل

کس سے مانگوں گا مدد اور کون ہے شافع میرا

میرے مالک دے مجھے نار جہنّم سے نجات

میں ذلیل و خائف و خاضع ہوں ایک بندہ تیرا

میرے مالک حرفِ حق کی مجھ کو تلقیں چاہیے

گوشۂ تاریک تربت میں ہو جس دم میری جاں

میرے مالک گر ہزاروں سال ہوں مجھ پر عذاب

رشتۂ امید تجھ سے ہو نہیں سکتا جدا

میرے مالک مال اور اولاد جب بے سود ہوں

تو چکھا دینا مجھے اپنے کرم کا ذائقہ

میرے مالک میں فنا ہو جاؤں گا تیرے بغیر

تو محافظ ہے تو پھر مجھ کو نہیں خوفِ فنا

میرےمالک غیر محسن کو نا گر بخشے گا تو

خواہشوں سے کھیلنے والے کا آخر ہو گا کیا

میرے مالک راہِ تقویٰ میں جو ہے کوتاہیاں

ان کی خاطر ڈھونڈتا ہوں مغفرت کے نقشِ پا

میرے مالک گر جہالت سے کiے میں نے گناہ

اس قدر رویا تیری رحمت کو جوش آہی گیا

میرے مالک ہے گنہ میرے پہاڑوں سے بلند

پر معافی ہے تیری اُن رفعتوں سے ماسوا

میرے مالک گر چاہے بادِ کرم وجہِ سکون

پھر بھی رُلا دیتا ہے مجھ کو اپنا احساسِ خطا

میرے مالک لغزشوں کو میری کردے اب معاف

میں ہوں خائف، معترف، گریہ کناں بندہ تیرا

میرے مالک کر عطا مجھ کو سکون و مرحمت

میں نہیں کرتا کبھی غیروں کے در پر التجا

میرے مالک کردیا گر تو نے مردود و ذلیل

کس سے امید کرم ہے؟ کون ہے شافع میرا؟

میرےمالک دوست تیرے ایسے ہیں شب زندہ دار

غافلوں کے خواب کے ہنگام کرتے ہیں دعا

میرے مالک گر تیرے کچھ بندے محوِ خواب ہیں

کچھ ہیں ایسے بھی جو ہیں بیدار اور صرفِ بکا

میرے مالک سب ہیں تیرے لُطف کے اُمیدوار

تیری جنّت کے سوالی تیری رحمت کے گواہ

میرے مالک ہے امیدوں سے امید عافیت

ورنہ ہے ساری خطائیں طعنہ زن برحالِ ما

میرے مالک تیری بخشش ہی سے ممکن ہے نجات

ورنہ یہ مہلت خطائیں مجھ کو کر دیں گی فنا

میرے مالک تیرے پیغمبر نبیِؐ ہاشمی

اور ان کی پاک و خاشع آلؑ کا ہے واسطہ

میرے مالک مصطفےٰؐ اور ان کے ابنِ عمؑ کے ساتھ

واسطہ ان نیک بندوں کا جو ہیں تجھ پر فدا

میرے مالک دینِ احمد پر اٹھانا قبر سے

متقی، پاکیزہ سیرت، باعمل اور باصفا

میرے مالک میں نہ محروم شفاعت ہو سکوں

حشر میں ان کو بنانا میرا شافع اے خدا

میرے مالک تا ابد ہو ان پہ رحمت کا نزول

جب تلک بندے رہیں محوِ مناجات و دعا

خدایا میری عزت کے لئے یہ کافی ہے کہ میں تیرا بندہ ہوں

اور میرے فخر کے لئے یہ کافی ہے کہ تو میرا رب ہے۔

مالک تو ویسا ہے جیسا میں چاہتا ہوں۔ اب مجھے بھی ویسا ہی بنادے جیسا تو چاہتا ہے۔