Ziyarat Jaami'ah Kabeerah

(Sheikh Saduq (r.h) ne 'Faqih' aur 'Uyoon' mein Musa bin Abdullah Nakha'i se riwayat ki hai ke main ne Imam Ali Naqi (a.s) se arz kiya ke farzand-e-Rasool (s.a.w.w) mujhe woh ziyarat taleem farmayein jo mukammal ho aur aap mein se kisi ki bhi ziyarat karna chahoon to isi ziyarat ko parh loon. Farmaya jab haram ke paas pahuncho to Kalima-e-Shahadatain parho:)

Main gawahi deta hoon ke Allah ke alawa koi khuda nahi hai aur us ka koi shareek nahi hai aur main gawahi deta hoon ke Hazrat Muhammad (s.a.w.w) us ke bande aur Rasool hain.

(Is ke baad ghusl kar ke haram mein dakhil ho aur qabr ko dekhne ke baad thehar kar 30 martaba "Allah-u-Akbar" kaho...)

اَللهُ اَكْبَرُ

(Is ke baad do qadam aage barh kar phir thehro aur 30 martaba Allah-u-Akbar kaho aur phir qabr-e-mutahhar ke paas pahunch kar 40 martaba Allah-u-Akbar kaho take 100 takbeerain mukammal ho jayein aur shayad ba-qaul-e-Majlisi Awwal is takbeer ki wajah yeh ho ke aksar tabiyatain ghulu ki taraf mayil hoti hain kahin aisa na ho ke is ziyarat ki ibarat-on ko dekh kar ghulu mein mubtala ho jayein ya Parwardigar ki buzurgi se ghafil ho jayein ya koi aur ghalat tasawwur paida ho jaye. Lehaza pehle us ki kibriyai ka ehsas paida kare is ke baad yoon kaho:)

Salam ho aap par ae Ahl-e-Bait-e-Nubuwwat aur markaz-e-risalat aur manzil-e-raft-o-amad-e-malaika aur markaz-e-nuzool-e-wahi-o-ma'dan-e-rehmat-o-khazana-dar-e-ilm-o-muntaha-e-hilm-o-usool-e-karam-o-qaideen-e-ummat-o-awliya-e-nemat aur naik kirdaron ki asl, pasandida logon ke sahare, bandon ke muntazim, shehron ke arkan, iman ke darwaze. Rahman ke ameen. Anbiya ka khulasa, mursaleen ke muntakhab, Rabb-ul-Aalameen ki itrat aap par Allah ki rehmat-o-barakat ho. Salam ho hidayat ke Imam, tareekiyon ke chiragh, taqwa ke parcham, sahiban-e-khird, arbab-e-aqal, makhlooq ki panah-gah, anbiya ke waris Khuda ki buland tareen misal, us ki haseen tareen dawat aur duniya-o-akhirat mein us ki hujjaton par aur Allah ki rehmat-o-barakat in sab ke liye. Salam ho marifat-e-Khuda ke mahall, barakat-e-Ilahi ke maskan, hikmat-e-Khuda ke ma'dan, raaz-e-Khuda ke muhafiz, kitab-e-Khuda ke hamil, Rasool-e-Khuda ke ausiya aur Paighambar-e-Akram (s.a.w.w) ki zurriyat par (Allah ki rehmat-o-barakat in sab ke liye hai). Salam ho Allah ki taraf dawat dene wale, marzi-e-Khuda ke rehnuma, amr-e-Ilahi ke sabit-qadam, mohabbat-e-Khuda mein kamil, tauheed-e-Khuda ke makhliis, amr-o-nahi ke zahir karne wale aur Allah ke in muhtaram bandon par jo us ke hukm par sabqat nahi karte hain aur us ke ahkam par amal karte hain aur us ki rehmat inhein ke liye hai. Salam ho daiyan-e-haq imam aur qaideen-e-khalq hadi hukkam sardar hamiyan-e-deen-e-haq sahiban-e-zikr aur ulil-amr par aur Allah ki baqi nishani aur us ke muntakhab, us ke giroh, us ke ilm ke markaz, us ki hujjat, us ke sirat-e-mustaqeem, us ke noor aur us ke burhan par (us ki rehmat-o-barakat inhein sab ke liye hai).

Main gawahi deta hoon ke Allah ke alawa koi khuda nahi hai. Us ka koi shareek nahi hai. Jis tarah us ne khud apne liye gawahi di hai aur us ke malaika aur sahiban-e-ilm ne gawahi di hai. Khudaye Azeez-o-Hakeem ke alawa koi khuda nahi hai aur main gawahi deta hoon ke Muhammad (s.a.w.w) us ke muntakhab banda aur pasandida rasool hain jin ko hidayat aur deen-e-haq ke sath bheja gaya hai take saare adyan par deen-e-Khuda ko ghalib banayein chahe yeh baat mushrikeen ko nagawar hi kyun na ho.

Main gawahi deta hoon ke aap hazrat Imam-e-Rashid, Mahdi, Ma'soom, muhtaram, muqarrab, muttari aur sadiq hain. Allah ke mutee, amr-e-Khuda ke qaim karne wale, us ke irada se amal karne wale, us ki karamat ki manzil par faiz hain. Us ne apne ilm se aap ko chuna, apne ghaib ke liye muntakhab kiya aur apne raaz ke liye ikhtiyar kiya. Apni qudrat se makhsoos kiya. Apni hidayat se izzat di. Apne burhan ke liye khilafat ke liye pasand kiya. Makhlooqat par apni hujjat qarar diya. Deen ka madadgar banaya. Raaz ka muhafiz, ilm ka khazana-dar, hikmat ka amanat-dar, wahi ka tarjuman, tauheed ka rukan, makhlooqat par gawah, bandon ke liye parcham-e-hidayat, apne shehron mein minara-e-noor aur apne rasta ke liye rehnuma qarar diya. Allah ne aap ko laghzhon se bachaya. Fitnon se mehfooz rakkha. Kasafaton se paak kiya. Rijs ko door rakkha aur haq-e-taharat ata kiya.

To aap ne us ki jalalat ki tazeem ki. Us ki shaan ki buzurgi ka izhar kiya. Us ke karam ki tamjeed ki. Us ke zikr ko musalsal rakkha. Us ke ahd ko mustahkam banaya. Us ki itaat ke paiman ko muhkam kiya. Zahir-o-batin mein us ke sath ikhlas rakkha. Us ki raah ki taraf hikmat aur mauiza-e-hasana ke sath dawat di. Us ki marzi mein jaan qurban ki. Us ki raah mein museebaton par sabr kiya. Namaz qaim ki, zakat ada ki. Naiki ka hukm diya. Burayi se roka. Raah-e-Khuda mein haq-e-jihad ada kiya yahan tak ke us ki dawat ka elaan kar diya. Us ke faraiz ko wazeh kar diya, us ke hudood ko qaim kar diya, us ke ahkam ko nashr kiya aur us ki sunnaton ko jari kiya aur aakhir manzil-e-raza tak pahunch gaye aur apne ko us ke faisla ke hawala kar diya. Aur us ke guzishta rasoolon ki tasdeeq kar di.

Lehaza jo aap se kinara-kash hua woh deen se kharij hai aur jo aap se wabasta hua woh haq se wabasta hai. Aap ke haq mein kotahi karne wala halak ho gaya ke haq aap ke sath, aap mein, aap se aur aap ki taraf hai. Aap hi us ke ahl aur us ke ma'dan hain. Nubuwwat ki meras aap ke paas hai. Makhlooqat ki bargasht aap ki taraf hai un ke hisab ki zimmedari aap par hai. Behtareen harf-e-haq aap ke paas hai. Allah ki nishaniyan aap ke paas hain. Us ke azaim aap ke yahan hain. Us ka noor, us ka burhan aap ke paas hai. Us ke amr ki bazgasht aap ki taraf hai.

Aap ka dost Allah ka dost aur aap ka dushman Allah ka dushman hai. Aap ka muhib aur aap se bizar hone wala Allah se bizar hai aur aap se tamassuk karne wala Allah se tamassuk hai ke aap hi Sirat-e-Mustaqeem hain. Dar-e-fana ke gawah aur dar-e-baqa ke shafee. Allah ki musalsal rehmat, us ki makhzoon ayat aur us ki mehfooz amanat hain aur woh dar-e-rehmat hain jis se logon ki azmayish hoti hai ke jo aa gaya woh najat pa gaya aur jo nahi aaya woh halak ho gaya. Aap Khuda ki taraf daiy aur us ki taraf rehnumayi karne wale hain. Us par iman rakhte hain us ke liye sarapa tasleem hain us ke hukm par amal karte hain. Us ke rasta ki hidayat karte hain. Us ke qaul se faisla karte hain.

Aap ka chahne wala naik-bakht hai aur aap ka dushman halak hai. Aap ka munkir nakam hai aur aap se alag hone wala gumrah hai. Aap se mutamassik kamyab hai aur aap ki panah mein aane wala mamoon hai. Aap ki tasdeeq karne wala salim hai aur aap se wabasta hone wala hidayat-yafta hai. Jo aap ka itteba kare jannat us ki jagah hai aur jo aap ki mukhalifat kare jahannum us ka thikana hai. Aap ka munkir kafir, aap se jung karne wala mushrik, aap ko radd karne wala jahannum ke aakhri tabqa mein hoga. Main gawahi deta hoon ke guzishta mein yehi aap ka martaba raha hai aur ayinda bhi yehi silsila rehne wala hai. Aap ke arwah, aap ka noor, aap ki teenat sab ek hai. Tayyib-o-tahir, paak-o-pakeeza aur musalsal hai.

Allah ne aap ko noor-e-mujassam banaya aur apne arsh ke gird rakkha yahan tak ke hum par ihsan kiya aur aap ko in gharon mein utaar diya jin ki bulandi ka hukm diya gaya hai aur jin mein un ka zikr hota rehta hai aur hamari salawat ko aur hamari mohabbat ko, hamari khilqat ki pakeezagi, hamare nafs ki taharat aur hamare gunahon ka kaffara qarar de diya. Hum us ki bargah mein aap ke fazl ke mu'tarif aur aap ki tasdeeq ke liye maroof hain. Allah aap ko muqarrabeen ki ala manzil aur mursaleen ke buland tareen darajat tak pahunchaye jahan koi pahunch na sake aur jis se koi ooncha na ho sake aur jis se koi aage na nikal sake aur haasil karne ki kisi mein tama' na ho.

Yahan tak ke koi malak-e-muqarrab, nabi-e-mursal, siddique, shaheed, aalim, jahil, kamtar, fazil, momin-e-salih, fajir-e-badkirdar, jabbar-e-zalim, shaitan-e-sarkash, aur koi makhlooq aisi na reh jaye jis ko aap ki jalalat-e-amr bata na di jaye aur aap ki azmat, aap ki shaan ki buzurgi, aap ke noor ki tamamiyat, aap ki manzil ki sadaqat, aap ke muqam ka sabat, aap ke mahall ka sharaf aur aap ki manzilat-o-karamat-o-khusoosiyat-o-qurb-e-Ilahi ka ta'aruf na kara diya jaye.

Mere maan baap, mere ahl-o-maal-o-khandan sab aap par qurban. Main Allah aur aap ko gawah bana kar kehta hoon ke main aap ki aur har us cheez par iman rakhta hoon jis par aap ka iman hai. Aap ke dushman aur jis ka aap inkar kar dein sab ka munkir hoon. Aap ki shaan ko aur aap ke dushman ki gumrahi ko jaanta hoon. Aap ka aur aap ke auliya ka dost hoon aur aap ke dushmanon ka dushman hoon. Jis se aap ki sulah hai us se meri sulah hai aur jis se aap ki jung hai us se meri jung hai. Jisay aap haq kahein woh meri nazar mein bhi haq hai aur jis ko aap baatil kahein woh meri nazar mein bhi baatil hai.

Main aap ka itaat-guzar, aap ke haq ka aarif, aap ke fazl ka mu'tarif, aap ke ilm ka hamil, aap ki zimmedari mein panah lene wala, aap ka mu'tarif, aap ki wapsi ka momin, aap ki raj'at ka tasdeeq karne wala, aap ke amr ka muntazir, aap ki hukumat ka umeedar, aap ke qaul ko ikhtiyar karne wala, aap ke hukm par amal karne wala, aap ki panah mein rehne wala, aap ka zair, aap ki qabr ki panah mein rehne wala aur aap ko shafee qarar dene wala, aap ke zariya qurb-e-Ilahi talash karne wala, apni haajaton mein aap ko hawala kar dene wala, aap ke liye sarapa tasleem hoon. Mera dil aap ke liye tasleem hai aur meri rai aap ki tabe hai.

Meri nusrat aap ke liye muhayya hai yahan tak ke Khuda apne deen ko aap ke zariya zinda kar de aur aap ko apne dinon mein wapas le aaye aur aap ko apne adl ke liye samne le aaye aur aap ko zameen mein ghalib banaye. Main aap ke sath hoon. Aap ke sath hoon. Ghair ke sath nahi hoon. Aap par mera iman hai aap ke awwal-o-aakhir se meri mohabbat hai, aur aap ke tamam dushmanon se, tamam taghooton se, shayateen se, in zalimon ke girohon se, aap ke haq ke munkiron se, aap ki wilayat se nikal jaane walon se, aap ki meras ke ghasibon se, aap ke baare mein shakk karne wale, aap se inhiraf karne wale aur aise tamam logon se aur aise tamam hakimoon se bizar hoon aur in rehnumaoon se bhi bizar hoon jo jahannum ki dawat dene wale hain.

Allah ta-hayat mujhe aap ki mohabbat, aap ki muwalat aur aap ke deen par sabit rakkhe. Aap ki itaat ki taufiq de. Aap ki shafa'at naseeb kare. Aap ke behtareen ghulamon mein, aap ki dawat ka itteba karne walon mein qarar de aur un mein qarar de jo aap ke aasar ka itteba karein. Aap ke rasta par chalein. Aap se hidayat haasil karein. Aap ke zumre mein mahshoor hoon. Aap ki raj'at mein wapas hoon. Aap ki hukumat mein hakim banein aur aap ki aafiyat ka sharaf haasil karein. Aap ke zamana mein ikhtiyar haasil karein aur un ki aankhen kal aap ki ziyarat se thandi hon. Mera nafs, mere maan baap, mere ahl aur mera maal sab aap par qurban.

Jo Allah ko chahta hai woh aap se shuru karta hai aur jo tauheed ka iqrar karta hai woh aap se seekhta hai. Jo Allah ka tasawwur karta hai woh aap ka rukh karta hai. Mere Aqa! main aap ki sana ka haq ada nahi kar sakta. Aap ki madah ki haqiqat tak nahi pahunch sakta. Aap ke ausaf ki manzil nahi jaanta. Aap naik kirdaron ke noor, shareefon ke hadi aur Allah ki hujjat hain. Khuda ne aap hi ke zariya aghaz bhi kiya aur ikhtitam bhi kare ga. Aap hi ke wasila se pani barsata hai aap hi ke zariya asmanon ko zameen par girne se rokay hue hai aur aap hi ke zariya ranj-o-gham ka ilaj karta hai aur aap ke paas woh sab kuch hai jo mursaleen laye aur jisay malaika ne pahunchaya. Aap ke jad-e-buzurgwar ki taraf

(Agar Ameer-ul-Momineen (a.s) ki ziyarat ho to 'Jaddika' ke bajaye **wa ila akhika** kahe)

Rooh-ul-Ameen ko bheja gaya. Allah ne aap ko woh sab kuch diya jo aalameen mein kisi ko na diya. Har shareef aap ke sharaf ke samne sar-nigoon hai aur har mutakabbir aap ki itaat ke samne sar jhukaye hue hai. Har jabbar aap ke fazl ke aage khaze' hai aur har shae aap ke samne khaksar hai. Zameen aap ke noor se raushan hai. Log aap ki mohabbat se kamyab hote hain. Aap ke zariya rizaye Ilahi tak pahuncha jata hai. Aap ke munkir-e-wilayat par Allah ka ghazab hai. Mere maan baap, meri jaan-o-maal aur mere ahl sab aap par qurban.

Aap ka zikr zakireen mein hai. Aap ka naam naamon mein numayan hai. Aap ke ajsad jismon mein. Aap ki roohein arwah mein. Aap ke nafs nufoos mein. Aap ke aasar aasar mein. Aap ki qabrein qabron mein numayan hain. Kya shireen aap ke naam hain aur kya kareem aap ka nafs hai. Kya azeem aap ki shaan hai aur kya buland aap ka martaba hai. Kya ba-wafa aap ka ahd hai aur kya sacha aap ka wada hai. Aap ka kalam noor, aap ka amr hidayat, aap ki wasiyat taqwa, aap ka kaam khair, aap ki aadat ihsan, aap ki tabiyat karam, aap ki shaan haq-o-sadaqat-o-meharbani, aap ka qaul hukm-o-adl, aap ki rai ilm-o-hilm-o-hazm, kisi khair ka zikr aaye to aap hi awwal hain, asl hain, far'a hain, ma'dan hain, malja-o-mawa aur muntaha hain.

Mere maan baap aur meri jaan aap par qurban main kaise aap ki sana karoon aur kaise aap ke ihsanat ka shumar karoon. Aap ke zariya Khuda ne humein zillat se nikala hai. Ranj-o-gham ko door kiya hai. Halakaton se najat di hai. Jahannum se bachaya hai. Aap par meri jaan mere maan baap qurban. Aap ki mohabbat se Khuda ne humein deen ke ahkam bataye hain aur hamari fasid duniya ki islah ki hai. Aap ki muwalat se kalimat tamam hue hain nematen azeem hui hain. Ikhtilaf door hua hai aur aap hi ki mohabbat se itaat maqbool hui hai.

Aap ke liye mohabbat wajib ka haq hai. Aap ke darajat buland, muqam-e-mahmood, makan-e-maloom, martaba-e-azeem, shaan-e-kabeer, maqbool shafa'at hai. Khudaya! hum teri tanzeel par iman laye. Tere Rasool ka itteba kiya. Humein bhi gawahon mein darj kar le. Hamare dilon ko hidayat ke baad gumrah na hone dena aur humein apne paas se rehmat ata farmana ke tu behtareen ata karne wala hai. Pakeeza hai mera Parwardigar ke us ka wada yaqeenan hatmi hai. Ae Wali-e-Khuda mere aur Allah ke darmiyan kuch gunah hain jin ko aap ki raza ke alawa koi mita nahi sakta hai.

Us ke haq ka wasita jis ne aap ko ameen-e-raaz banaya. Makhlooqat ke amr ka nigran banaya aur apni itaat ko aap ki itaat se mila diya hai. Agar aap ne hamare gunahon ko apni bakhshish mein le liya hai aur hamare shafee ban gaye hain to hum aap ke mutee hain ke jis ne aap ki itaat ki us ne Allah ki itaat ki aur jis ne aap ki nafarmani ki us ne Allah ki nafarmani ki hai. Jo aap se mohabbat kare us ne Allah se mohabbat ki aur jo aap se nafrat kare us ne Allah se nafrat ki hai.

Khudaya agar Muhammad (s.a.w.w) o Aal-e-Muhammad (a.s) ke naik kirdar Aima-e-Athar (a.s) se qareeb-tar koi wasila pa jata to inhein ko shafee banata lehaza ab in ke is haq ka wasita jo tu ne apne upar lazim qarar diya hai ke mujhe in ke haq ke aarifon mein shamil kar le aur is zumre mein dakhil kar le jo in ki shafa'at ki rehmat haasil kar sake ke tu behtareen reham karne wala hai aur Allah Hazrat Muhammad (s.a.w.w) aur un ki Aal-e-Tahireen par salawat aur salam-e-kaseer nazil kare. Hamare liye Allah kafi hai aur wahi behtareen zimmedar hai.

Mu'allif! Is ziyarat ko Sheikh ra ne Tahdhīb mein naql kiya hai aur us ke baad ek Du'a-e-Wida' naql ki hai jis ko ikhtisaar ki bina par hum ne tark kar diya hai. Yeh ziyarat ba-qaul Allama Majlisi ra ba-e'tibaar-e-'ibaarat wa sanad wa fasaahat wa balaaghat behtareen ziyarat ahsan wa akmal ziyarat hai aur main jab tak 'atabaat-e-'aaliyaat mein raha Aimma ki yahi ziyarat padhta raha.

Mu'allif! Is ziyarat ko Sheikh ra ne Tahdhīb mein naql kiya hai aur us ke baad ek Du'a-e-Wida' naql ki hai jis ko ikhtisaar ki bina par hum ne tark kar diya hai. Yeh ziyarat ba-qaul Allama Majlisi ra ba-e'tibaar-e-'ibaarat wa sanad wa fasaahat wa balaaghat behtareen ziyarat ahsan wa akmal ziyarat hai aur main jab tak 'atabaat-e-'aaliyaat mein raha Aimma ki yahi ziyarat padhta raha.