Du'a 47: Roz-e-'Arafah ki Du'a

Sab tareef us Allah ke liye hai jo tamam jahanon ka parwardigar hai. Bar-ilaha! Tere hi liye tamam tareefain hain. Ae aasman-o-zameen ke paida karne wale! Ae buzurgi-o-aezaz wale! Ae palne walon ke palne wale! Ae har parastar ke maabood! Ae har makhlooq ke khaliq aur har cheez ke maalik-o-waris. Us ke misl koi cheez nahi hai aur na koi cheez us ke ilm se poshida hai. Woh har cheez par haavi hai aur har shay par nigran hai.

Tu hi woh Allah hai ke tere alawa koi maabood nahi, jo ek akela yekta-o-yagana hai. Aur tu hi woh Allah hai ke tere alawa koi maabood nahi jo bakhshne wala aur intihaayi bakhshne wala, azmat wala aur intihaayi azmat wala, aur bada aur intihaayi bada hai. Aur tu hi woh Allah hai ke tere siwa koi maabood nahi jo buland-o-bartar aur badi quwwat-o-tadbeer wala hai. Aur tu hi woh Allah hai ke tere siwa koi maabood nahi, jo faiz-rasaan, meharban aur ilm-o-hikmat wala hai.

Aur tu hi woh maabood hai ke tere alawa koi maabood nahi jo sunne wala, dekhne wala, qadeem-o-azali aur har cheez se aagah hai. Aur tu hi woh maabood hai ke tere alawa koi maabood nahi jo kareem aur sab se badh kar kareem aur daim-o-javeed hai. Aur tu hi woh maabood hai ke tere siwa koi maabood nahi jo har shay se pehle aur har shumar mein aane wali shay ke baad hai. Aur tu hi woh maabood hai ke tere alawa koi maabood nahi jo (kainat ke dastras se) bala hone ke bawajood nazdeek aur nazdeek hone ke bawajood (fahm-o-idrak se) buland hai.

Aur tu hi woh maabood hai ke tere siwa koi maabood nahi jo jamal-o-buzurgi aur azmat-o-stayish wala hai. Aur tu hi woh Allah hai ke tere alawa koi maabood nahi, jis ne baghair muwad (material) ke tamam cheezon ko paida kiya aur baghair kisi namuna-o-misal ke suraton ki naqsh-arayi ki aur baghair kisi ki pairwi kiye maujoodat ko khilat-e-wajood bakhsha. Tu hi woh hai jis ne har cheez ka andaza thehraya hai aur har cheez ko us ke wazaif ki anjam-dahi par aamada kiya hai aur kainat-e-alam mein se har cheez ki tadbeer-o-karsazi ki hai.

Tu woh hai ke aafrinish-e-alam mein kisi shareek-e-kaar ne tera hath nahi bataya aur na kisi muavin ne tere kaam mein tujhe madad di hai aur na koi tera dekhne wala aur na koi tera misl-o-nazeer tha. Aur tu ne jo irada kiya woh hatmi-o-lazmi aur faisla kiya woh adl ke taqazon ke ain mutabiq aur jo hukm diya woh insaf par mabni tha. Tu woh hai jisay koi jagah ghaire hue nahi hai aur na tere iqtidar ka koi muqabla kar sakta hai aur na tu daleel-o-burhan aur kisi cheez ko waazeh taur par pesh karne se aajiz hai.

Tu woh hai jis ne ek ek cheez ko shumar kar rakkha hai aur har cheez ki ek muddat muqarrar kar di hai aur har shay ka ek andaza thehra diya hai. Tu woh hai ke teri kunh-e-zaat ko samajhne se wahme qasir aur teri kaifiyat ko janne se aqlein aajiz hain aur teri koi jagah nahi hai ke aankhein us ka khoj laga sakien. Tu woh hai ke teri koi hadd-o-nihayat nahi hai ke tu mehdood qarar paye aur na tera tasawwur kiya ja sakta hai ke tu tasawwur ki hui surat ke sath zehen mein maujood ho sakay.

Na tere koi aulad hai ke tere mutalliq kisi ki aulad hone ka ihtimal ho. Tu woh hai ke tera koi mad-e-muqabil nahi hai ke tujh se takraye aur na tera koi hamsar hai ke tujh par ghalib aaye aur na tera koi misl-o-nazeer hai ke tujh se barabri kare. Tu woh hai jis ne khalq-e-kainat ki ibtida ki, alam ko ijad kiya aur us ki buniyad qaim ki, aur baghair kisi mada-o-asl ke usay wajood mein laya aur jo banaya usay apne husn-e-sanat ka namuna banaya.

Tu har aib se munazza hai, teri shan kis qadar buzurg aur tamam jaghon mein tera paya kitna buland aur teri haq-o-baatil mein imtiyaz karne wali kitab kis qadar haq ko ashkaara karne wali hai. Tu munazza hai ae sahib-e-lutf-o-ehsan tu kis qadar lutf farmane wala hai. Ae meharban tu kis qadar meharbani karne wala hai. Ae hikmat wale tu kitna janne wala hai. Paak hai teri zaat ae sahib-e-iqtidar tu kis qadar qawi-o-tawana hai. Ae Kareem! Tera daman-e-karam kitna wasee hai. Ae buland-martaba, tera martaba kitna buland hai.

Tu husn-o-khoobi, sharaf-o-buzurgi, azmat-o-kibriyaayi aur hamd-o-stayish ka maalik hai. Paak hai teri zaat tu ne bhalaiyon ke liye apna hath badhaya hai, tujh hi se hidayat ka irfan haasil hua hai lehaza jo tujhe deen ya duniya ke liye talab kare tujhe pa le ga. Tu munazza-o-paak hai jo bhi tere ilm mein hai woh tere samne sar-nigoon aur jo kuch arsh ke neeche hai woh teri azmat ke aage sar-ba-kham aur jumla makhlooqat teri itaat ka jua apni gardan mein dale hue hai.

Paak hai teri zaat ke na hawas se tujhe jana ja sakta hai, na tujhe tatola aur chhua ja sakta hai, na tujh par kisi ka heela chal sakta hai, na tujhe door kiya ja sakta hai, na tujh se naza ho sakti hai na muqabla, na tujh se jhagda kiya ja sakta hai aur na tujhe dhoka aur faraib diya ja sakta hai. Paak hai teri zaat tera rasta seedha aur hamwar, tera farman sarasar haq-o-sawab aur tu zinda-o-be-niyaz hai. Paak hai tu teri guftar hikmat-aamaiz, tera faisla qatayi aur tera irada hatmi hai.

Paak hai tu na koi teri mashi-yat ko radd kar sakta hai aur na koi teri baaton ko badal sakta hai. Paak hai tu ae darakhshanda nishaniyon wale! Ae aasmanon ke khalq farmane wale aur zi-rooh cheezon ke paida karne wale! Tere hi liye tamam tareefain hain aisi tareefain jin ki hamesha-gi teri hamesha-gi se wabasta hai. Aur tere hi liye stayish hai aisi stayish jo teri nematon ke sath hamesha baqi rahe. Aur tere hi liye hamd-o-shana hai aisi jo tere karam-o-ehsan ke barabar ho.

Aur tere hi liye hamd hai aisi jo teri raza-mandi se badh jaye. Aur tere hi liye hamd-o-supas hai aisi jo har hamd-guzar ki hamd par mushtamil ho aur jis ke muqabla mein har shukr-guzar ka shukr peechay reh jaye. Aisi hamd jo tere alawa kisi ke liye sazawaar na ho aur na tere siwa kisi ke taqarrub ka wasila bane. Aisi hamd jo pehli hamd ke dawam ka sabab qarar paye aur us ke zariya aakhri hamd ke dawam ki iltija ki jaye. Aisi hamd jo zamana ki gardishon ke sath badhti jaye aur pay-dar-pay ishafon se zyada hoti rahe, aisi hamd ke nigahbani karne wale farishte us ke shumar se aajiz aa jayein.

Aisi hamd jo kaatibaan-e-aamal ne teri kitab mein likh diya hai us se badh jaye. Aisi hamd jo tere arsh-e-buzurg ke ham-wazan aur teri buland-paye kursi ke barabar ho. Aisi hamd jis ka ajr-o-sawab teri taraf se kamil aur jis ki jaza tamam jazaon ko shamil ho. Aisi hamd ke jis ka zahir, batin se ham-nawa aur batin sidq-e-niyat se ham-ahang ho. Aisi hamd ke kisi makhlooq ne waisi teri hamd na ki ho aur tere siwa koi is ki fazeelat-o-bartari se aashna na ho. Aisi hamd ke jo usay bakasrat baja lane ke liye koshah ho, usay (teri taraf se) madad haasil ho aur jo usay anjam tak pahunchane ke liye sa'ee-e-baleegh kare usay taufiq-o-tayeed naseeb ho. Aisi hamd jo tamam aqsam-e-hamd ki jame ho jinhein tu maujood kar chuka hai aur un aqsam ko bhi shamil ho jinhein tu baad mein maujood kare ga. Aisi hamd ke us se badh kar koi hamd teri murad se qareeb-tar na ho aur jo shakhs is tarah ki hamd kare us se badh kar koi hamd-guzar na ho. Aisi hamd jo tere fazl-o-karam se apni frawani ke bais afzayish-e-nemat ka sabab ho aur tu apne lutf-o-ehsan se us ke sath paiham izafe ka silsila qaim rakkhe. Aisi hamd jo teri buzurgi-e-zaat ke shayan tere sharaf-e-jalal ke ham-dosh ho.

Parwardigara! Muhammad aur un ki Aal par sab rehmaton se afzal-o-bartar rehmat nazil farma! Woh Muhammad jo barguzida, muazzaz-o-garami aur muqarrab hain aur un par apni kamil tareen barkaton ka izafa farma aur apni nafa-rasaan rehmaton ke sath un par reham-o-karam farma. Parwardigara! Muhammad aur un ki Aal par rehmat-e-frawan nazil kar jis se frawani mein koi rehmat na badh sakay. Aur un par aisi badhne wali rehmat nazil farma jis se zyada koi rehmat badhne wali na ho aur un par aisi pasandida rehmat nazil farma jis se bala-tar koi rehmat na ho. Parwardigara! Muhammad aur un ki Aal par rehmat nazil farma jo unhein khosh-o-khoshnood kare aur un ki khoshnudi se badh jaye.

Aur un par aisi rehmat nazil farma ke tu un ke liye us ke siwa kisi rehmat ko pasand na kare aur na un ke alawa kisi ko is rehmat ka sazawaar samjhe. Parwardigara! Muhammad aur un ki Aal par aisi rehmat nazil farma ke teri jaanib se jis raza-mandi ke woh mustahiq hain us se badh jaye aur us ka paiwand tere baqa-o-dawam se juda rahe aur us ka silsila kahin khatm na ho jis tarah tere kalme khatm na honge. Parwardigara! Muhammad aur un ki Aal par aisi rehmat nazil farma jo tere farishton, nabiyon, rasoolon aur itaat karne walon ke durood-o-rehmat ko shamil ho aur tere bandon mein se jinon, insaanon aur teri dawat ko qubool karne walon ke durood-o-salam par mushtamil ho aur teri har qism ki makhlooqat ke jinhein tu ne khalq kiya aur aalam-e-wajood mein laya sab ki rehmaton par haavi ho. Parwardigara! Aan-hazrat par, un ki Aal par aisi rehmat nazil farma jo guzishta aur ayanda sab rehmaton ko muheet hon. Un par aur un ki Aal par aisi rehmat nazil farma jo tere nazdeek aur tere alawa doosron ke nazdeek pasandida ho. Aur in rehmaton ke sath aisi rehmatain bhejta rahe ke un ke bhejne ke waqt tu pehli rehmaton ko dugna kar de. Aur unhein zamana ke guzarne ke sath sath do-chand karke itna badhata jaye ke jinhein tere alawa koi shumar na kar sakay.

Parwardigara un ke Ahl-e-Bait-e-At-haar par rehmat nazil farma jinhein tu ne amr-e-deen-o-shariat ke liye muntakhab farmaya. Ae ilm ka khazina-dar aur apne deen ka muhafiz aur zameen mein apna khaleefa-o-janasheen aur bandon par apni hujjat banaya aur jinhein apne irada-e-azali se har qism ki najasat-o-aaloodgi se paak-o-saaf rakkha aur jinhein apne tak pahunchne ka wasila aur jannat tak aane ka rasta qarar diya. Parwardigara! Muhammad aur un ki Aal par aisi rehmat nazil farma jis ke zariya tu un ke liye apni bakhshish-o-karamat ko frawan aur un ke liye ataya-o-inamaat kamil kare aur apne tahaif-o-manafay mein se unhein wafir hissa bakhshe. Parwardigara! Un par aur un ke Ahl-e-Bait par aisi rehmat nazil farma ke na us ki ibtida ki koi muddat, na us muddat ki koi intiha aur na us ka koi aakhri kinara ho. Parwardigara! Un par aisi rehmat nazil farma ke tere arsh aur jo kuch zer-e-arsh hai sab ke ham-wazan ho aur us miqdar mein ho ke aasmanon aur jo kuch aasmanon ke oopar hai sab ko bhar de aur zameenon aur jo kuch zameenon ke neeche aur un ke andar hai un ke shumar ke barabar ho. Aisi rehmat jo unhein tere taqarrub ki manzil-e-ala par pahuncha de aur tere liye aur un ke liye sarmaya-e-khoshnudi ho aur apne jaisi doosri rehmaton se hamesha muttasil rahe.

Bar-ilaha! Tu ne har zamana mein ek aise Imam ke zariya apne deen ki tayeed farmayi hai jisay tu ne apne bandon ke liye nishan-e-raah qarar diya aur shehron mein minar-e-hidayat bana kar qaim kiya, jabke tu ne apne paiman-e-itaat ko us ke paiman-e-itaat se wabasta kar diya jisay apni raza-o-khoshnudi ka zariya qarar diya, jis ki itaat farz kar di, jis ki nafarmani se daraya, jis ke ahkam ki baja-awari aur jis ke mana karne par baaz rehne ka hukm diya. Aur yeh ke koi aage badhne wala us se aage na badhe aur koi peechay reh jane wala us se peechay na rahe. Woh panah talab karne walon ke liye sar-o-saman-e-hifazat, ahl-e-iman ke liye jaye-panah, wabastagan-e-daman ke liye mazboot sahara aur tamam jahan ki rounaq-o-zebayish hai. Bar-ilaha! Apne wali-o-peshwa ke dil mein is inaam par jo usay bakhsha hai ada-e-shukr ka ilham farma aur us ke wajood ke bais waisa hi ada-e-shukr ka jazba hamare dil mein paida kar aur usay apni taraf se aisa tasallut ata farma jis se har tarah ki madad pahunche aur us ke liye kamyabi-o-kamrani ki raah ba-aasani khol de aur apne mazboot sahare se us ki madad farma. Us ki pusht ko mazboot aur bazu ko qawi kar, apni nazar-e-tawajjoh se us ki hifazat aur apni nigah-dasht se us ki himayat farma aur apne farishton ke zariya us ki madad aur apne ghalib aane wale sipah-o-lashkar se us ki kumak farma aur us ke zariya apni kitab aur hudood-o-ahkam aur apne Rasool (un par ae Allah teri taraf se durood-o-rehmat ho) ki rawishon ko qaim kar aur un ke zariya zalimon ne deen ke jin nishanat ko mita dala hai az-sar-e-no zinda kar de aur zulm-o-jour ke zang ko apni shariat se door aur apni raah ki dushwariyon ko bartaraf kar de. Aur jo log teri raah-e-sawab se roo-gardani karne wale hain unhein khatm aur jo teri raah-e-rast mein kajji paida karte hain unhein neist-o-nabood kar de.

Aur usay apne doston ke liye narm-o-bardbar qarar de. Aur dushmanon (par ghalba-o-tasallut) ke liye us ke hathon ko khol de aur humein us ki taraf se rafat-o-rehmat aur shafqat-o-meharbani ata farma aur us ki baat par kaan dharne wala aur itaat karne wala aur us ki khoshnudi ke liye koshah rehne wala aur us ki nusrat-o-tayeed aur dushmanon se difa ke silsila mein madad dene wala aur is wasila se tujh se aur tere Rasool (ae khuda un par tera durood salam ho) se taqarrub chahne wala qarar de. Ae Allah un ke doston par bhi rehmat nazil farma jo un ke martaba-o-muqam ke mutarif, un ke tariq-o-maslak ke tabay, un ke naqsh-e-qadam par gam-zani, un ke sar-rishta-e-deen se wabasta, un ki dosti-o-wilayat se mutamassik, un ki imamat ke pairu, un ke ahkam ke farmanbardar, un ki itaat mein sargarm-e-amal, un ke zamana-e-iqtidar ke muntazir aur un ke liye chashm-ba-raah hain. Aisi rehmat jo ba-barkat, pakeeza aur badhne wali aur har subh-o-shaam nazil hone wali ho aur un par aur un ki arwah (tayyaba) par salamati nazil farma aur un ke kaamon ko salah-o-taqwa ki buniyadon par qaim kar aur un ke haalat ki islah farma aur un ki tauba qubool farma. Beshak tu tauba qubool karne wala, reham karne wala, aur sab se behtar bakhshne wala hai aur humein apni rehmat ke wasila se un ke sath Dar-us-Salam (Jannat) mein jagah de. Ae sab raheemon se zyada raheem. Parwardigara! Yeh Roz-e-Arafa woh din hai jisay tu ne sharaf, izzat aur azmat bakhshi hai jis mein apni rehmatain phaila dien aur apne afw-o-darguzar se ehsan farmaya, apne atiyon ko frawan kiya aur is ke wasila se apne bandon par tafazzul farmaya hai.

Ae Allah! Main tera woh banda hoon jis par tu ne us ki khilqat se pehle aur khilqat ke baad inaam-o-ehsan farmaya hai, is tarah ke usay un logon mein se qarar diya jinhein tu ne apne deen ki hidayat ki, apne ada-e-haq ki taufiq bakhshi, jin ki apni reesman ke zariya hifazat ki, jinhein apni jama'at mein dakhil kiya aur apne doston ki dosti aur dushmanon ki dushmani ki hidayat farmayi hai. Ba-een hamah, tu ne usay hukm diya to us ne hukm na mana, aur mana kiya to woh baaz na aaya aur apni masiyat se roka to woh tere hukm ke khilaf amr-e-mamnoo ka murtakib hua. Yeh tujh se anaad aur tere muqabla mein takabbur ki roo se na tha, balkay khwahish-e-nafs ne usay aise kaamon ki dawat di jis se tu ne roka aur daraya tha. Aur tere dushman aur us ke dushman (Shaitan-e-maloon) ne in kaamon mein us ki madad ki.

Chunancha us ne teri dhamki se aagah hone ke bawajood tere afw ki umeed karte hue aur tere darguzar par bharosa rakhte hue gunah ki taraf iqdam kiya. Halanke in ehsanat ki wajah se jo tu ne us par kiye thay, tamam bandon mein woh is ka sazawaar tha ke aisa na karta. Achha phir main tere samne khada hoon bilkul khwar-o-zaleel, sarapa ajz-o-niyaz aur larzan-o-tarsan. In azeem gunahon ka jin ka bojh apne sar uthaya hai aur in badi khataon ka jin ka irtikab kiya hai aiteraf karta hua tere daman-e-afw mein panah chahta hua aur teri rehmat ka sahara dhoondta hua aur yeh yaqeen rakhta hua ke koi panah dene wala (tere azab se mujhe panah nahi de sakta) aur koi bachane wala (tere ghazab se mujhe bacha nahi sakta). Lehaza (is aiteraf-e-gunah-o-izhaar-e-nadamat ke baad) tu meri parda-poshi farma jis tarah gunahgaron ki parda-poshi farmata hai aur mujhe maafi ata kar jis tarah un logon ko maafi ata karta hai jinhon ne apne aap ko tere hawale kar diya ho.

Aur mujh par is bakhshish-o-aamrizh ke sath ehsan farma ke jis bakhshish-o-aamrizh se tu apne umeedo-war par ehsan karta hai, to tujhe badi nahi maloom hoti. Aur mere liye aaj ke din aisa hazz-o-naseeb qarar de ke jis ke zariya teri raza-mandi ka kuch hissa pa sakoon aur tere ibadat-guzar bande jo (ajr-o-sawab ke) tahaif le kar palte hain mujhe un se khali hath na pher. Agarchay woh naik aamal jo unhon ne aage bheje hain main ne aage nahi bheje, lekin main ne teri wahdat-o-yektayi ka aqeeda aur yeh ke tera koi hareef shareek-e-kaar aur misl-o-nazeer nahi hai pesh kiya hai. Aur unhi darwazon se jin darwazon se tu ne aane ka hukm diya hai aaya hoon aur aisi cheez ke zariya jis ke baghair koi tujh se taqarrub haasil nahi kar sakta, taqarrub chaha hai. Phir teri taraf ruju-o-baazgasht, teri bargah mein tazallul-o-aajizi aur tujh se naik guman aur teri rehmat par aetimad ko talab-e-taqarrub ke hamrah rakkha hai. Aur us ke sath aisi umeed ka zamima bhi laga diya hai jis ke hote hue tujh se umeed rakhne wala mahroom nahi rehta. Aur tujh se isi tarah sawal kiya hai jis tarah koi be-qadr, zaleel, shikasta-haal, tahi-dast, khauf-zada aur talabgar-e-panah sawal karta hai. Aur is halat ke bawajood mera yeh sawal khauf, ajz-o-niyaz mandi, panah-talbi aur aman-khwahi ki roo se hai, na mutakabbiron ke takabbur ke sath bartari jatlane, na itaat-guzaron ke (apni ibadat par) fakhr-o-aetimad ki bina par itrate aur na sifarish karne walon ki sifarish par sar-bulandi dikhate hue. Aur main is aiteraf ke sath tamam kamtaron se kamtar, khwar-o-zaleel logon se zaleel-tar aur ek cheonti ke manind balkay us se bhi past-tar hoon.

Ae woh jo gunahgaron par azab karne mein jaldi nahi karta aur na sarkashon ko (apni nematon se) rokta hai. Ae woh jo laghzi-shon se darguzar farma kar ehsan karta hai aur gunahgaron ko mohlat de kar tafazzul farmata hai, main woh hoon jo gunahgar, gunah ka mutarif, khata-kaar aur laghzi-shon karne wala hoon. Main woh hoon jis ne tere muqabla mein jurat se kaam lete hue pesh-qadmi ki. Main woh hoon jis ne deeda-danista gunah kiye. Main woh hoon jis ne apne gunahon ko tere bandon se chhupaya aur tere samne khullam khulla mukhalfat ki. Main woh hoon jo tere bandon se darta raha aur tujh se be-khauf raha. Main woh hoon jo teri haibat se harasan aur tere azab se khauf-zada na hua. Main khud hi apne haq mein mujrim aur bala-o-museebat ke hathon mein girwi hoon. Main hi sharm-o-haya se aari aur taweel ranj-o-takleef mein mubtala hoon. Main tujhe us ke haq ka wasita deta hoon jisay tu ne makhlooqat mein se muntakhab kiya. Us ke haq ka wasita deta hoon jisay tu ne apne liye pasand farmaya. Us ke haq ka wasita deta hoon jisay tu ne kainat mein se barguzida kiya aur jisay apne ahkam (ki tableegh) ke liye chun liya. Us ke haq ka wasita deta hoon jis ki itaat ko apni itaat se mila diya aur jis ki nafarmani ko apni nafarmani ke manind qarar diya.

Us ke haq ka wasita deta hoon jis ki mohabbat ko apni mohabbat se maqroon aur jis ki dushmani ko apni dushmani se wabasta kiya hai. Mujhe aaj ke din is daman-e-rehmat mein dhanp le jis se aise shakhs ko dhanpta hai jo gunahon se dast-bardar ho kar tujh se nala-o-faryad kare aur taib ho kar tere daman-e-maghfirat mein panah chahe. Aur jis tarah apne itaat-guzaron aur qurb-o-manzilat walon ki sar-parasti farmata hai isi tarah meri sar-parasti farma. Aur jis tarah un logon par jinhon ne tere ehd ko poora kiya, teri khatir apne ko taab-o-mushaqqat mein dala aur teri raza-mandiyon ke liye sakhtiyon ko jhela, khud tan-e-tanha ehsan karta hai is tarah mujh par bhi tan-e-tanha ehsan farma. Aur tere haq mein kotahi karne, tere hudood se tajawuz hone aur tere ahkam ke pas-e-pusht dalne par mera muakhaza na kar. Aur mujhe is shakhs ke mohlat dene ki tarah mohlat de kar rafta-rafta apne azab ka mustahiq na bana, jis ne apni bhalayi ko mujh se rok liya aur samajhta yeh hai ke bas wahi nemat ka dene wala hai yahan tak ke tujhe bhi in nematon ke dene mein shareek na samjha ho.

Mujhe ghaflat-sha'aron ki neend, be-rah-ravon ke khwab aur hirman-naseebon ki ghaflat se hoshiyar kar de aur mere dil ko us rah-e-amal par laga jis par tu ne itaat-guzaron ko lagaya hai. Aur us ibadat ki taraf mayel farma jo ibadat-guzaron se tu ne chahi hai. Aur un cheezon ki hidayat kar jin ke wasila se sahl-angaron ko rahayi bakhshi hai. Aur jo baatein teri bargah se door kar dein aur mere aur tere haan ke hazz-o-naseeb ke darmiyan hayel aur tere haan ke maqsad-o-murad se maane ho jayein un se mehfooz rakh. Aur nekyon ki rah-paimayi aur un ki taraf sabqat jis tarah tu ne hukm diya hai aur un ki badh-chadh kar khwahish jaisa ke tu ne chaha hai mere liye sahl-o-aasaan kar. Aur apne azab-o-wa'eed ko sabuk samajhne walon ke sath ke jinhein tu tabah kare ga mujhe tabah na karna. Aur jinhein dushmani par aamada hone ki wajah se halak kare ga un ke sath mujhe halak na karna. Aur apni seedhi rahon se inhiraf karne walon ke zumra mein ke jinhein tu barbaad kare ga mujhe barbaad na karna. Aur fitna-o-fasad ke bhanwar se mujhe najat de aur bala ke munh se chhuda le. Aur zamana-e-mohlat (ki bad-aamaliyon) par giraft se panah de. Aur is dushman ke darmiyan jo mujhe behkaye aur us khwahish-e-nafs ke darmiyan jo mujhe tabah-o-barbaad kare aur is nuqs-o-aib ke darmiyan jo mujhe ghair le hayel ho ja. Aur jaise us shakhs se ke jis par ghazab-nak hone ke baad tu razi na ho rukh pher leta hai isi tarah mujh se rukh na pher. Aur jo umeedain tere daman se wabasta kiye hue hoon un mein mujhe be-aas na kar ke teri rehmat se yaas-o-na-umeedi mujh par ghalib aa jaye.

Aur mujhe itni nemtain bhi na bakhsh ke jin ke uthane ki main taqat nahi rakhta ke tu frawani-e-mohabbat se mujh par woh baar laad de jo mujhe garaan-baar kar de. Aur mujhe is tarah apne hath se na chhod de jis tarah usay chhod deta hai jis mein koi bhalayi na ho aur na mujhe us se koi matlab ho aur na us ke liye tauba-o-baaz-gasht ho. Aur mujhe is tarah na phenk de jis tarah usay phenk deta hai jo teri nazar-e-tawajjoh se gir chuka ho, aur teri taraf se zillat-o-ruswayi us par chhayi hui ho balkay girne walon ke girne se aur kaj-ravon ke khauf-o-haras se aur faraib-khorda logon ke laghzi-sh khane se aur halak hone walon ke warta-e-halakat mein girne se mera hath thaam le aur apne bandon aur kanizom ke mukhtalif tabqon ko jin cheezon mein mubtala kiya hai un se mujhe aafiyat-o-salamati bakhsh. Aur jinhein tu ne موردِ عنایت (maurid-e-inayat) qarar diya, jinhein nemtain ata kien, jin se razi-o-khoshnood hua, jinhein qabil-e-stayish zindagi bakhshi aur saadat-o-kamrani ke sath maut di un ke maratib-o-darjaat par mujhe faiz kar.

Aur woh cheezain jo nekyon ko mahw aur barkaton ko zail kar dein un se kinara-kashi is tarah mere liye lazim kar de jis tarah gardan mein pada hua tauq. Aur bure gunahon aur ruswa karne wali masiyaton se alaihidgi-o-nafrat ko mere dil ke liye is tarah zaroori qarar de jis tarah badan se chimta hua libas aur mujhe duniya mein masroof karke ke jisay teri madad ke baghair haasil nahi kar sakta un aamal se ke jin ke alawa tujhe koi aur cheez mujh se khosh nahi kar sakti, rok na de aur is past duniya ki mohabbat ke jo tere haan ki saadat-e-abdi ki taraf mutawajje hone se maane aur teri taraf wasila talab karne se sadd-e-raah aur tera taqarrub haasil karne se ghafil karne wali hai mere dil se nikal de aur mujhe malka-e-ismat ata farma jo mujhe tere khauf se qareeb, irtikab-e-muharramat se alag aur kabeera gunahon ke bandhanon se reha kar de aur mujhe gunahon ki aaloodgi se pakeezgi ata farma aur masiyat ki kasafaton ko mujh se door kar de aur aafiyat ka jama mujhe pehna de aur apni salamati ki chadar odha de aur apni wasee nematon se mujhe dhanp le aur mere liye apne ataya-o-inamaat ka silsila paiham jari rakh aur apni taufiq-o-rah-e-haq ki rehnumayi se mujhe taqwiyat de aur pakeeza niyat, pasandida guftar aur shaista kirdar ke silsila mein meri madad farma.

Aur apni quwwat-o-taqat ke bajaye mujhe meri quwwat-o-taqat ke hawale na kar. Aur jis din mujhe apni mulaqat ke liye uthaye mujhe zaleel-o-khwar aur apne doston ke samne ruswa na karna, aur apni yaad mere dil se faramosh na hone de aur apna shukr-o-supas mujh se zail na kar. Balkay jab teri nematon se be-khabar, sahw-o-ghaflat ke aalam mein hoon, mere liye ada-e-shukr lazim qarar de, aur mere dil mein yeh baat daal de ke jo nemtain tu ne bakhshi hain un par hamd-o-tauseef aur jo ehsanat mujh par kiye hain un ka aiteraf karoon, aur apni taraf meri tawajjoh ko tamam tawajjoh karne walon se balatar aur meri hamd-sarayi ko tamam hamd karne walon se buland-tar qarar de aur jab mujhe teri ehtiyaj ho to mujhe apni nusrat se mahroom na karna aur jin aamal ko teri bargah mein pesh kiya hai un ko mere liye wajah-e-halakat na qarar dena, aur jis amal-o-kirdar ke pesh-e-nazar tu ne apne nafarmanon ko dhutkara hai yun mujhe apni bargah se dhutkar na dena, is liye ke main tera mutee-o-farmanbardar hoon aur yeh jaanta hoon ke hujjat-o-burhan tere hi liye hai aur tu fazl-o-bakhshish ka zyada sazawaar aur lutf-o-ehsan ke sath faida-rasaan aur is layeq hai ke tujh se dara jaye aur us ka ahl hai ke maghfirat se kaam le aur us ka zyada sazawaar hai ke saza dene ke bajaye parda-poshi teri rawish se qareeb-tar hai. To phir mujhe aisi pakeeza zindagi de jo mere hasb-e-dil-khwah umoor par mushtamil aur meri dil-pasand cheezon par muntahi ho is tarah ke jis kaam ko tu napasand kare usay baja na laoon aur jis se mana kare us ka irtikab na karoon. Aur mujhe us shakhs ki si maut de jis ka noor us ke aage aur us ke dahni taraf chalta ho aur mujhe apni bargah mein aajiz-o-nigoon-saar aur logon ke nazdeek ba-waqar bana de.

Aur jab tujh se takhliya mein raaz-o-niyaz karoon to mujhe past-o-sar-afganda aur apne bandon mein buland-martaba qarar de aur jo mujh se be-niyaz ho us se mujhe be-niyaz kar de aur mere faqr-o-ehtiyaj ko apni taraf badha de aur dushmanon ke khanda-e-zeer-e-lab, balaon ke wurood aur zillat-o-sakhti se panah de aur mere un gunahon ke baare mein ke jin par tu muttala hai us shakhs ke manind meri parda-poshi farma ke agar us ka hilm maane na hota to woh sakht giraft par qadir hota aur agar us ki rawish mein narmi na hoti woh gunahon par muakhaza karta. Aur jab kisi jama'at ko tu museebat mein giriftar ya bala-o-nakbat se do-char karna chahe, to dar-soorat-e-ke main tujh se panah talab hoon us museebat se najat de aur jabke tu ne mujhe duniya mein ruswayi ke mauqif mein khada nahi kiya to is tarah akhirat mein bhi ruswayi ke muqam par khada na karna. Aur mere liye dunyawi nematon ko okhrawi nematon se aur qadeem faidon ko jadeed faidon se mila de aur mujhe itni mohlat na de ke us ke natija mein mera dil sakht ho jaye.

Aur aisi museebat mein mubtala na kar jis se meri izzat-o-aabru jati rahe aur aisi zillat se do-char na kar jis se meri qadr-o-manzilat kam ho jaye aur aise aib mein giriftar na kar jis se mera martaba-o-muqam jana na ja sakay. Aur mujhe itna khauf-zada na kar ke main mayoos ho jaoon aur aisa khauf na dila ke harasan ho jaoon. Mere khauf ko apni wa'eed-o-sarzanish mein aur mere andesha ko tere uzr-e-tamam karne aur darane mein munhasir kar de aur mere khauf-o-haras ko aayat (Qurani) ki tilawat ke waqt qarar de aur mujhe apni ibadat ke liye biddar rakhne, khilwat-o-tanhayi mein dua-o-munajat ke liye jagne, sab se alag reh kar tujh se lou lagane, tere samne apni haajatain pesh karne, dozakh se guloo-khalasi ke liye baar baar iltija karne, aur tere us azab se jis mein ahl-e-dozakh giriftar hain panah mangne ke wasila se meri raaton ko aabaad kar aur mujhe sarkashi mein sargardan chhod na de aur na ghaflat mein ek khaas waqt tak ghafil-o-be-khabar pada rehne de aur mujhe naseehat haasil karne walon ke liye ibrat aur dekhne walon ke liye fitna-o-gumrahi ka sabab na qarar de aur mujhe un logon mein jin se tu (un ke makr ki padash mein) makr kare ga shumar na kar aur (inaam-o-bakhshish ke liye) mere iwaz doosre ko intikhab na kar. Mere naam mein taghayyur aur jism mein tabdeeli na farma aur mujhe makhlooqat ke liye maz-haka aur apni bargah mein layeq-e-istihza na qarar de.

Mujhe sirf in cheezon ka paband bana jin se teri raza-mandi wabasta hai aur sirf us zahmat se do-char kar jo (tere dushmanon se) intiqam lene ke silsila mein ho aur apne afw-o-darguzar ki lizzat aur rehmat, rahat-o-aasayish, gul-o-raihan aur Jannat-e-Naeem ki sheerini se aashna kar aur apni wusat-o-tongari ki badaulat aisi faraghat se raushanas kar jis mein tere pasandida kaamon ko baja la sakoon aur aisi sa'ee-o-koshish ki taufiq de jo teri bargah mein taqarrub ka bais ho aur apne tuhfon mein se mujhe nit-naya tuhfa de. Aur meri okhrawi tijarat ko nafa-bakhsh aur meri baaz-gasht ko be-zarar qarar de aur mujhe apne muqam-o-mauqif se dara aur apni mulaqat ka mushtaq bana.

Aur aisi sachi tauba ki taufiq ata farma ke jis ke sath mere chhote aur bade gunahon ko baqi na rakkhe aur khuli aur dhaki masiyaton ko mahw kar de aur ahl-e-iman ki taraf se mere dil se keena-o-bughz ko nikal de aur inkisar-o-frootani karne walon par mere dil ko meharban bana de aur mere liye tu aisa ho ja jaisa neko-kaaron ke liye hai aur parhezgaron ke zewar se mujhe aarasta kar de aur ayanda aane wali naslon mein mera zikr roz-afzoon barqarar rakh aur sabiqun-al-awwaloon ke mahall-o-muqam mein mujhe pahuncha de aur farakhi-e-nemat ko mujh par tamam kar, aur us ki manfaat-on ka silsila paiham jari rakh, apni nematon se mere hathon ko bhar de aur apni garaan-qadr bakhshishon ko meri taraf badha de aur jannat mein jisay tu ne apne barguzida bandon ke liye sajaya hai mujhe apne pakeeza doston ka hamsaya qarar de aur in jaghon mein jinhein apne dost-daron ke liye muhayya kiya hai mujhe umda-o-nafees atiyon ke khilat odha de aur mere liye woh aram-gah ke jahan main itminan se be-khatke rahoon aur woh manzil ke jahan main thehroon aur apni aankhon ko thanda karoon apne nazdeek qarar de, aur mujhe mere azeem gunahon ke lihaz se saza na dena aur jis din dilon ke bhed janche jayein ge mujhe halak na karna, har shakk-o-shubha ko mujh se door kar de aur mere liye har samt se haq tak pahunchne ki raah paida kar de aur apni ata-o-bakhshish ke hisse mere liye zyada kar de aur apne fazl se neki-o-ehsan se hazz-e-frawan ata kar. Aur apne haan ki cheezon par mera dil mutmain aur apne kaamon ke liye meri fikr ko yak-soo kar de aur mujh se wahi kaam le jo apne makhsoos bandon se leta hai aur jab aqlein ghaflat mein pad jayein us waqt mere dil mein itaat ka walwala samoo de aur mere liye tongari, pak-damani, aasayish, salamati, tandurusti, farakhi, itminan aur aafiyat ko jama kar de. Aur meri nekyon ko gunahon ki amaizish ki wajah se aur meri tanhaiyon ko in mufsido ke bais jo az-rah-e-imtihan pesh aate hain tabah na kar.

Aur ahl-e-alam mein se kisi ek ke aage hath phailane se meri izzat-o-aabru ko bachaye rakh aur in cheezon ki talab-o-khwahish se jo bad-kirdaron ke paas hain mujhe rok de aur mujhe zalimon ka pusht-panah na bana aur na (ahkam-e) kitab ke mahw karne par un ka nasir-o-madadgar qarar de aur meri is tarah nigah-dasht kar ke mujhe khabar bhi na hone paye. Aisi nigah-dasht ke jis ke zariya tu mujhe (halakat-o-tabahi) se bacha le jaye aur mere liye tauba-o-rehmat, lutf-o-raat aur kushada rozi ke darwaze khol de. Is liye ke main teri jaanib raghbat-o-khwahish karne walon mein se hoon aur mere liye apni nematon ko paya-e-takmeel tak pahuncha de is liye ke tu inaam-o-bakhshish karne walon mein sab se behtar hai aur meri baqiya umr ko hajj-o-umrah aur apni raza-joi ke liye qarar de. Ae tamam jahanon ke palne wale! Rehmat kare Allah Ta'ala Muhammad aur un ki paak-o-pakeeza Aal par aur un par aur un ki aulad par hamesha hamesha durood-o-salam ho.