خدایا رحمت نازل فرما محمدؐ و آل محمدؐ پر

اور جب میں دعا کروں تو میری دعا کو قبول کرلے

اور جب میں پکاروں تو میری آواز کو سن لے۔

جب میں مناجات کروں تو میری طرف توجہ فرما کہ

میں تیری ہی طرف بھاگ آیا ہوں

اور تیرے ہی سامنے کھڑا ہوں۔ فقیر و مسکین ہوں

فریادی ہوں

اور تیرے ثواب کا امیدوار ہوں۔

تو میرے دل کا حال جانتا ہے۔

میری حاجت سے باخبر ہے۔

میرے ضمیر کو پہچانتا ہے

اور تجھ سے میرا انجام مخفی نہیں ہے

اور جو میں کہنا چاہتا ہوں وہ بھی تجھے معلوم ہے

اور جو بیان کررہا ہوں وہ بھی تو جانتا ہے

اور عاقبت کے لیے جس چیز کا امیدوار ہوں

اے میرے سید و سردار! وہ بھی تیرے علم میں ہے ،

اور اس کا فیصلہ ہوچکا ہے آخرِ عمر تک کے لیے،

تیرے علاوہ کسی کے ہاتھ میں نہیں ہے میرے ظاہر و باطن

سب کے لیے زیادتی و کمی

اور نفع و نقصان

خدایا اگر تو محروم کردے گا تو مجھے کون عطا کرے گا

اور اگر تو چھوڑ دے گا تو کون مدد کرے گا۔

خدایا میں تیرے غضب سے اور تیری ناراضگی کے نازل ہونے سے تیری ہی پناہ چاہتا ہوں۔

مالک اگر میں تیری رحمت کا اہل نہیں ہوں تو

تو اس بات کا اہل ہے کہ اپنی مہربانی سے مجھ پر کرم کرے۔

خدایا جیسے کہ میں تیرے سامنے کھڑا ہوں

اور میرے نفس پر حُسنِ توکّل کا سایہ ہے۔

تو نے اپنی بات کہہ دی ہے اور مجھے اپنی معافی سے ڈھانپ لیا ہے

خدایا اگر تو معاف کردے گا تو تیرے علاوہ اس کا اہل کون ہوگا۔

اور اگر میری موت قریب آگئی اور میرے اعمال نے تجھ سے قریب نہیں بنایا ہے

تو میں گناہوں کے اقرار ہی کو اپنا وسیلہ بنارہا ہوں۔

خدایا میں نے اپنے نفس کو مہلت دے کر ہلاک کردیا ہے۔

اب اگر تو معاف نہ کرے گا تو وائے بر حالِ ما۔

خدایا زندگی بھر تو تو احسان کرتا رہا ہے

تو اب مرنے کے بعد اس احسان کو قطع نہ کرنا

بھلا میں مرنے کے بعد تیری نگاہِ کرم سے کیسے مایوس ہوسکتا ہوں

جب کہ زندگی بھر تجھ سے سوائے نیکیوں کے کچھ نہیں دیکھا ہے۔

خدایا میرے ساتھ وہی برتاؤ کرنا جس کا تو اہل ہے

اور اپنے فضل سے اس بندہ پر مہربانی کرنا جو گنہگار ہے اور جس کو جہالتوں نے ڈھانپ لیا ہے۔

مالک تو نے دنیا میں میرے گناہوں کو چھپایا ہے

تو میں آخرت میں ان کی پردہ پوشی کا اس سے زیادہ محتاج ہوں۔

جب تو نے اپنے نیک بندوں پر ظاہر نہیں کیا ہے

تو اب قیامت کے دن منظرِ عام پر مجھے رسوا نہ کرنا۔

خدایا تیرے کرم نے میری امیدوں کو پھیلا دیا ہے

اور تیری معافی میرے عمل سے کہیں زیادہ بہتر ہے،

لہٰذا میرے مالک جس دن بندوں کے درمیان فیصلہ کرنا ہمیں اپنی ملاقات کے شرف سے محروم نہ کرنا۔

خدایا یہ میری معذرت اس بندے کی ہے جو قبولیت سے بے نیاز نہیں ہے

لہٰذا میرے عذر کو قبول کرلے۔ اے وہ کریم ترین مالک جس سے ہر خطاکار معذرت کرتا ہے۔

خدایا میری حاجتوں کو پلٹانا نہیں۔

میری امید کو نا اُمید نہ کرنا

مالک اگر تو مجھے ذلیل کرنا چاہتا تو ہدایت نہ دیتا

اور اگر رسوا کرنا چاہتا تو عافیت نہ دیتا۔

میں یہ سوچ بھی نہیں سکتا ہوں کہ

تو میری اس حاجت کو رد کردے گا۔ جس کو مانگنے میں ساری زندگی گزاری ہے۔

میرے مالک تیرے لیے دائمی، ابدی، سرمدی حمد ہے

جس میں اضافہ ہوتا ہے کمی نہیں ہوتی ہے جیسے تو چاہتا ہے۔

خدایا اگر تو میرے جرم کا مؤاخذہ کرے گا تو میں تیری معافی کا سوال کروں گا

اور اگر تو میرے گناہوں کی گرفت کر لے گا تو میں تیری مغفرت کے بارے میں پوچھوں گا

اور اگر تو مجھے جہنّم میں داخل کردے گا تو میں اہلِ جہنّم سے کہوں گا کہ میں تیرا چاہنے والا تھا۔

خدایا اگر تیری اطاعت کے سامنے میرا عمل چھوٹا ہے

تو تیری کرامت کے سامنے میری امید بہت بڑی ہے۔

خدایا میں تیری بارگاہ سے ناکام اور محروم کس طرح جاسکتا ہوں

جب کہ میرا حسنِ ظن تیرے کرم سے یہی تھا کہ تو مجھے نجات دے کر رحمت کے ساتھ مخصوص کردے گا۔

خدایا میں نے غفلتوں کے عالم میں اپنی زندگی کو گزاردیا ہے

اور تجھ سے دوری کے نشہ میں اپنی جوانی کو برباد کردیا ہے

اور ایک دن جب میں تیری ناراضگی

کے راستے پر جارہا تھا مجھے ہوش نہیں آیا

مگر بہرحال میں تیرا بندہ ہوں، تیرے بندہ کا فرزند ہوں، تیرے سامنے کھڑا ہوں

اور تیرے ہی کرم کو وسیلہ بنائے ہوئے ہوں۔

خدایا میں وہ بندہ ہوں جو تیری مہلت سے فائدہ اُٹھا کر

بے حیائی کے ذریعہ تیرا سامنا کرتا تھا

مگر اب میں ہر برائی سے نکل آیا ہوں اور تجھ سے معافی کا طلبگار ہوں اس لیے کہ معافی ہی تیرے کرم کی ضمانت ہے۔

خدایا میرے پاس کوئی ایسی طاقت نہیں ہے جس کے ذریعہ میں معصیت سے نکل آؤں

مگر اسی وقت جب تو مجھے اپنی محبّت کے لیے بیدار کردے۔

جیسا تو نے چاہا میں ہوگیا۔

اب تیرا شکر ہے کہ تو نے اپنے کرم میں داخل کرلیا ہے

اور میرے دل کو غفلت کی کثافت سے پاک کردیا ہے۔

مالک میری طرف اس بندہ کی طرح نظر فرما جس کو تو نے پکارا

تو اس نے سن لیا اور اُسے اپنی راہ میں لگانا چاہا تو اس نے اختیار کرلیا۔

اے وہ قریب جو فریب خوردہ سے بھی دور نہیں ہوتا ہے

اور اے وہ سخی جو کسی امیدوار کے ثواب میں بخل نہیں کرتا ہے۔

میرے مالک مجھے وہ دل دے دے جس کا شوق تجھ سے قریب تر کردے

اور وہ زبان دے دے جس کی صداقت تیری بارگاہ تک پہنچادے۔

وہ نگاہ دے دے جو تجھ سے قریب تر بنادے۔

خدایا جو تیرے ذریعہ معروف ہوتا ہے وہ مجہول نہیں ہوتا ہے

اور جو تیری پناہ لے لیتا ہے وہ لاوارث نہیں ہوتا ہے۔

جس کی طرف تو متوجہ ہوجائے وہ رنجیدہ نہیں ہوتا ہے۔

مالک جو تیرے سہارے چلے اسے روشنی مل جاتی ہے

اور جو تیری پناہ لے لے اُسے پناہ مل جاتی ہے۔

اب میں تیری پناہ میں آیا ہوں لہٰذا اپنی رحمت سے نا اُمید نہ کرنا

اور اپنی رافت میں کسی چیز کو حائل نہ کرنا۔

خدایا مجھے اپنے چاہنے والوں میں ان کی منزل پر کھڑا کردے

جو محبّت میں اضافہ کے امیدوار ہیں۔

خدایا مجھے مسلسل اپنے ذکر کا شوق عنایت فرما

اور میری ہمّت کو اپنے اسمائے گرامی اور محلِ قدس میں کامیابی کے نشاط میں قرار دے دے۔

خدایا تجھے میری قسم کہ مجھے اہلِ اطاعت کی منزل سے

اور اپنی رضا کے نیک ترین مقام سے ملادے کہ

میں نہ اپنے نفس سے کسی بلا کو ٹال سکتا ہوں

اور نہ اُسے کوئی فائدہ پہنچا سکتا ہوں۔

خدایا میں تیرا بندۂ ضعیف و گنہگار ہوں

اور تیرا غلامِ عیب دار ہوں

لہٰذا مجھے ان لوگوں میں قرار نہ دینا جن سے تو اپنا منہ موڑ لے

اور جن کی غفلت تیری معافی کی راہ میں حائل ہوجائے

خدایا مجھے اپنی طرف مکمل توجہ عنایت فرما

اور میرے دل کی نگاہوں کو اپنی طرف دیکھنے کی روشنی سے نورانی بنادے

تا کہ دل کی نگاہیں حجابِ نور کو چاک کرکے

اس محل و معدنِ عظمت تک پہنچ جائیں

اور ہماری روحیں تیرے مقامِ عزّت و قدس سے وابستہ ہوجائیں۔

خدایا مجھے ان لوگوں میں قرار دے دے جن کو تو نے پکارا تو انھوں نے لبیک کہی

اور جن کو دیکھ لیا تو تیرے جلال سے بے ہوش ہوگئے۔

تو نے ان سے خاموشی سے باتیں کیں اور انھوں نے علی الاعلان تیرے لیے عمل کیا۔

خدایا ہم نے اپنے حسنِ ظن پر مایوسی کو مسلّط نہیں کیا

اور نہ میری امیدیں تیرے کرم سے قطع ہوئیں۔

خدایا اگر خطاؤں نے تیری بارگاہ میں گرا دیا ہے

تو اب حسنِ توکّل کی بناپر مجھ سے درگذر فرما۔

مالک اگر میرے گناہوں نے تیرے مقامِ لطف سے گرادیا ہے

تو تیری مہربانی و کرم نے مجھے ہوشیار کردیا ہے۔

مالک اگر مجھے غفلت نے تیری ملاقات کی تیاری سے سُلا دیا ہے

تو تیرے احسانات کی معرفت نے مجھے بیدار کردیا ہے۔

مالک اگر تیرے عظیم عقاب نے مجھے جہنّم کی طرف بلایا ہے

تو تیرے عظیم ثواب نے جنّت کی دعوت دی ہے۔

اب میں تجھ ہی سے امیدوار ہوں اور تجھ ہی سے دعا کرتا ہوں اور تیری ہی طرف رغبت کرتا ہوں

اور میرا مطالبہ یہی ہے کہ محمدؐ و آل محمدؐ پر رحمت نازل فرما

اور ان لوگوں میں قرار دے دے جو ہمیشہ تیرا ذکر کریں۔

تیرے عہد کو نہ توڑیں۔

تیرے شکر سے غافل نہ ہوں

اور تیرے حکم کا استخفاف نہ کریں۔

خدایا مجھے اپنے روشن ترین نور عزّت و جلالت سے ملحق کردے

تاکہ میں تیرا عارف ہوجاؤں

اور تیرے غیر سے منحرف ہوجاؤں

صرف تجھ سے ڈرتا ہوں اور لرزتا رہوں

اے صاحبِ جلال و اکرام۔

خدا رحمت نازل کرے محمدؐ رسول اللہ

اور ان کے آلِ طیبینؑ پر اور بے شمار سلام ان پر۔