دعاءِ امام حسین علیہ السَّلام روزِ عرفہ

اس دن کی مشہور دعاؤں میں سے دعاء امام حسین سید الشہداء ہے جسے غالب اسدی کے فرزند بشر و بشیر نے روایت کی ہے کہ روز عرفہ عصر کے وقت عرفات میں میں امام علیہ السلام کی خدمت میں تھا۔آپؑ خیمہ سے باہر تشریف لائے اپنے اہلِ بیت فرزندوں اور شیعوں کی ایک جماعت کے ساتھ نہایت انکساری اور خضوع کے عالم میں اور پہاڑ کے بائیں جانب کھڑے ہو گئے اور کعبہ کی طرف رُخ کر کےہاتھ کو چہرہ کے برابر بلند کیا اس مسکین کی طرف جو کھانا طلب کر رہاہو اور پھر یہ دعا پڑھی۔</font>)

حمد ہے خدا کے لیے جس کے فیصلے کو کوئی بدلنے والا نہیں

اور کوئی اس کی عطا روکنے والا نہیں

اور نہ کوئی اس کی جیسی کوئی شئے ایجاد کر سکتا ہے۔

اور وہ کشادگی کے ساتھ دینے والا ہے

اس نے بے مثال چیزیں ایجاد کی ہیں

اور اپنی حکمت کاملہ سے ہر صنعت کو محکم بنایا ہے۔

زمانہ کی ایجاد اس کی نظر سے پوشیدہ نہیں

اور امانتیں اس کی بارگاہ میں ضائع نہیں ہوتیں۔

ہر عمل کرنے والے کو جزا دینے والا،

ہر قناعت کرنے والے کو صلہ عطا کرنے والا

اور ہر فریاد کرنے والے پر رحم کھانے والا ہے۔

منافع کا نازل کرنے والا

اور روشن و تانباک نور کے ساتھ کتاب جامع کا اتارنے والا ہے۔

ہر ایک کی دعا سننے والا،

ہر ایک کے رنج کو دفع کرنے والا

درجات کا بلند کرنے والا

اور جباروں کا قلع قمع کرنے والا ہے۔

اس کے علاوہ کوئی خدا نہیں

اس کا کوئی ہمسر نہیں۔

وہ بے مثال،

ہر ایک کی سننے والا،

ہر چیز کا دیکھنے والا

اور ہر شئے پر قدرت رکھنے والا ہے

خدایا میں تیری طرف متوجہ ہوں

اور تیری ربوبیت کی گواہی دیتا ہوں۔

مجھے اقرار ہے کہ تو میرا پروردگار ہے۔

تیری بارگاہ میں مجھے پلٹ کر آنا ہے۔

تو نے مجھ پر اس وقت انعامات شروع کیے ہیں

جب میں کوئی قابلِ ذکر شئے نہ تھا۔

مجھے خاک سے پیدا کیا،

مختلف صلبوں سے گذارا

زمانے کے حوادث،

دہر کے اختلاف، سن و سال کی تغیرات و انقلابات سے محفوظ رکھا

میرا سفر ایک مدّت تک اصلاب سے ارحام کی طرف جاری رہا

ان دنوں میں جو گزرے ہیں

اور ان صدیوں میں جو بیت چکے ہیں

یہ تیرا کرم ہوا کہ تو نے اس دنیا میں بھیج دیا

اور تمام لطف

و احسان کی بنا پر

ان سربراہانِ کفر کی حکومت میں نہیں بھیجا

جنھوں نے تیرے عہد کو توڑا

اور تیرے رسولوں کو جھٹلایا

بلکہ اس ماحول میں بھیجا جہاں آسان ہدایت کے انتظامات تھے

اور پھر اسی میں میری

نشو و نما کا انتظام کیا۔

اس خلقت و تربیت سے پہلے بھی

تیرا بہترین برتاؤ

اور کامل ترین انعام یہ تھا کہ

تو نے ایک قطرۂ نجس سے بنایا

اور کھال کے درمیان تین تین پردوں میں رکھا

یعنی گوشت خون اور جلد کے نیچے

اور خود مجھے بھی میری خلقت سے آگاہ نہ کیا

میرے معاملات کو اپنے ہاتھوں میں رکھا

اور مجھے میرے حال پر نہیں چھوڑ دی۔ اب جو تونے دنیا میں بھیجا تو ہدایت و رہنمائی

کے سارے انتظامات کے ساتھ مکمل برابر کامل الخلقت پیدا کیا۔

میں گہوارہ میں بچہ رہا تو تو نے حفاظت کا انتظام کیا

غذا کے لیے تازہ دودھ فراہم کیا۔

پالنے والی عورتوں کو مہربان بنادیا۔

رحم دل ماؤں کو کفیل اور نگراں بنا دیا

جنّات کے آسیب سے محفوظ رکھا

زیادتی اور کمی سے بچائے رکھا

بے شک اے خدائے رحیم و کریم تیری ہستی بہت بلند و برتر ہے۔

اس کے بعد جب میں بولنے کے لائق ہوا

تو تو نے اور مکمل نعمتیں دیں

اور تربیت کے ذریعہ ہر سال مجھے آگے بڑھایا

یہاں تک کہ جب میری فطرت کامل ہو گئی

اور میرے قویٰ مضبوط ہوگئے

تو تو نے مجھ پر اپنی حجّت کو لازم قرار دے دیا۔

مجھے معرفت کا الہام کیا

اپنی حکمت کے عجائبات سے مدہوش بنایا

اور مجھے بیدار مغز بنا دیا زمین و آسمان کی عجیب ترین

مخلوقات کے سمجھنے کے لیے

اور پھر اپنی یاد اپنے شکریہ

اور اپنی اطاعت کے لیے ہوشیار کر دیا

اور اتنی صلاحیت دی کہ رسولوں کے پیغام کو سمجھ سکوں۔

اتنی آسانی فراہم کی کہ تیری مرضی کی باتوں کو قبول کر سکوں

اور پھر محروم نہیں رکھا ان سب مواقع پر اپنی مدد

اپنے لطف و کرم و احسان سے

مجھے بہترین مٹی سے پیدا کیا

اور پھر اسی ایک نعمت پر اکتفا نہیں کی

بلکہ طرح طرح کی غذائیں دیں۔

قسم قسم کے لباس دیئے۔

تیرا احسان مجھ پر عظیم

اور تیرا لطف قدیم ہے

پھر جب ساری نعمتوں کو مکمل کردیا

اور ساری بلاؤں کو دفع کر دیا

تو بھی میری جہالت و میری جسارت تجھے کرم سے روک نہیں سکی

اور تو نے اس راستے کی راہنمائی کی جو تجھ سے قریب تر بنا سکے۔

اور ان اعمال کی توفیق دی جو تیری بارگاہ میں تقرب کا باعث بن سکیں

اور جب دعا کرتا ہوں تو تو قبول کر لیتا ہے

اور جب سوال کرتا ہوں تو عطا کر دیتا ہے۔

جب اطاعت کرتا ہوں تو شکریہ ادا کرتا ہے

اور جب شکریہ ادا کرتا ہوں تو مزید دے دیتا ہے۔

یہ سب درحقیقت تیرے احسانات

و انعامات کی تکمیل ہے اور اس کے علاوہ کچھ نہیں۔

تو پاک بے نیاز

پیدا کرنے والا واپس لے جانے والا

قابل حمد وثناء مالک مجد و بزرگی ہے۔

تیرے نام پاکیزہ

اور تیری نعمتیں عظیم ہیں۔

خدایا میں تیری کن کن نعمتوں کا شمار کروں اور کسے کسے یاد رکھ سکوں،

تیرے کس کس عطیے کا شکریہ ادا کروں

جب کہ ساری نعمتیں بڑے بڑے شمار کرنے والوں کے احصاء سے بالاتر

اور بڑے بڑے حافظہ والوں کے علم کی رسائی سے بلند تر ہیں۔

اس کے علاوہ مجھ سے ٹالا ہے جن نقصانات،

مصائب اور بلاؤں کو

وہ اس عافیت و مسرت سے کہیں زیادہ اہم ہیں جن کا میں نے مشاہدہ کیا ہے اور جو میری نظروں کے سامنے ہیں۔

پروردگار میں اپنے ایمان کی حقیقت،

اپنے یقین محکم،

خالص اور واضح توحید

ضمیر کے پوشیدہ اسرار،

نور بصارت کی گذرگاہوں،

صفحہ پیشانی کے خطوط،

سانس کے گذرنے کے شگاف،

قوت شامہ کے خزانوں

اور قوت سماعت تک آواز پہنچنے کے سوراخوں

ہونٹوں کے اندر دبے ہوئے رموز،

زبان کی حرکت سے نکلے ہوئے الفاظ،

دہن کے اوپر اور نیچے کے جبڑوں کے ارتباط کی جگہوں،

داڑھ کے اگنے کے مقامات

کھانے پینے کی سہولت کے راستے،

اپنے سر میں دماغ کی قرارگاہ

اپنی گردن میں غذا کی نالیوں اور ان ہڈیوں

جن سے سینہ کا گھیرا بنا ہے

اپنے اندر لٹکی ہوئی شہ رگ

اپنے دل میں آویزاں پردے

جگر کے ٹکڑوں کو جمع کرنے والے اجزاء پہلو،

اپنی ایک دوسری سے ملی اور جھکی ہوئی پسلیوں

اپنے جوڑوں کے حلقوں

جوڑ بند قوائے عمل،

اطراف انگشت کے محتویات و مشتملات،

گوشت، خون

اور بال، کھال،

اعصاب، شرائین،

استخوان، مغز، رگیں،

اور تمام جوارح

اور دورانِ رضاعت و شیرخواری مرتّب ہونے والے اجزاء بدن

اور زمین نے جو میرے وجود کا بار اٹھا رکھا ہے

اور اپنی نیند، بیداری،

حرکات و سکنات، رکوع و سجود

سب کے حوالے سے اس بات کی گواہی دیتا ہوں کہ اگر میں ارادہ بھی کروں اور کوشش بھی کروں

کہ آخر زمانہ تک زندہ رہ کر

تیری کسی ایک نعمت کا شکریہ ادا کروں تو یہ ناممکن ہے مگر یہ کہ

تیرا احسان بھی شامل حال ہو جائے

مگر وہ خود بھی تو ایک شکریہ کا طلبگار ہے۔

میرے اوپر ہر وقت ایک نیا احسان بھی شامل حال ہو جائے

اور جس سے ہر آن ایک نئے شکریہ کا تقاضا۔

بے شک میں کیا اگر میرے ساتھ تمام شمار کرنے والے

انسان شریک ہو کر

احسانات کی انتہا دریافت کرنا چاہیں

چاہے وہ جدید و قدیم ہو

تو ہرگز اس کا شمار نہیں کر سکتے

اور نہ اس کی مدّت کا حساب کرسکتے

اوریہ ممکن بھی کس طرح ہوگا

جب کہ تو نے خود اپنی کتاب ناطق

اور خبر صادق کے ذریعہ یہ اعلان کر دیا ہے

کہ تم سب مل کر بھی میری نعمتوں کا شمار کرنا چاہو گے تو نہیں کرسکتے

بے شک تیری کتاب صادق، تیری خبر سچّی اور تیرا بیان حق ہے۔

تیرے انبیاء ومرسلین نے

تیری وحی اور

شریعت کو مکمل طریقہ سے پہنچایا ہے

اور میں خود بھی اپنی

کوشش، ہمت،جہد،

اطاعت اور وسعت و امکان بھر

اس بات کی گواہی دیتا ہوں اور اس پر اپنے ایمان و یقین کا اعلان کرتا ہوں کہ

ساری تعریف اس خدا کے لیے جس کا کوئی بیٹا نہیں

کہ اس کی میراث کا مالک ہو جائے

کوئی شریک نہیں ہے

کہ ایجادات میں جھگڑا کرے

کوئی ولی و سرپرست نہیں ہے

کہ صنعت میں تعاون کرے

وہ پاک و پاکیزہ اور بے نیاز ہے

اگر زمین و آسمان میں اس کے علاوہ کوئی بھی خدا ہوتا تو زمین و آسمان دونوں برباد ہو جاتے اور ٹوٹ پھوٹ کے برابر ہو جاتے

وہ پاک و بےنیاز ایک اکیلا اور سب سے مستغنی ہے

نہ اس کا کوئی باپ ہے

نہ بیٹا اور نہ ہمسر۔

میں اس کی حمد کا اعلان کرتا ہوں جو ملائکہ مقربین

اور انبیاء جو مرسلین کی حمد کے برابر ہو

خدا خیرالمرسلین

خاتم النبیین حضرت محمد مصطفےٰ ؐ

اور ان کی آل طیبین طاہرین پر رحمتیں نازل فرمائے۔

خدایا مجھے ایسا بنا دے کہ میں تجھ سے اس طرح ڈروں جیسے تجھے دیکھ رہا ہوں۔

اپنے تقویٰ سے میری امداد فرما

اور معصیت سے مجھے شقی و بدبخت نہ بنانا

اپنے فیصلہ کو میرے حق میں بہتر قرار دے

اور اپنے مقدّرات کو میرے لیے مبارک بنادے

تا کہ جس چیز کو تو نے دیر میں رکھا ہے اس کی جلدی نہ کروں

اور جس چیز کو مقدّم کردیا ہے اس کی تاخیر نہ چاہوں۔

خدایا مجھے دل کا غنی بنا دے۔

میرے نفس میں یقین

عمل میں اخلاص،

بصارت میں نور

اور دین میں بصیرت عطا فرما۔

میرے لیے اعضاء و جوارح کو مفید قرار دے

اور سماعت و بصارت کو میرا وارث بنا دے۔

ظلم کرنے والوں کے مقابلہ میں میری مدد فرما

اور ان سے میرا انتقام میری نظروں کے سامنے لے لے

تا کہ میری آنکھوں کو ٹھنڈک نصیب ہو۔

خدایا میرے رنج کو دور فرما۔

میرے مخفی امور کی پردہ پوشی فرما،

میری خطاؤں کو بخش دے۔

شیطان کو مجھ سے دور رکھ۔

میری گرفتاریوں میں رہائی عطا فرما

اور مجھے بلند ترین درجات پر فائز فرما

دنیا وآخرت میں

خدایا تیرا شکر ہے کہ تو نے پیدا کیا

تو سماعت و بصارت سمیت پیدا کیا۔

تیرا شکر کہ تو نے خلق کیا

تو تام وکامل خلق کیا، یہ صرف تیری رحمت ہے

ورنہ تو میری تخلیق سے بے نیاز تھا۔

خدایا جس طرح تو نے تخلیق میں خلقت کو معتدل بنایا ہے

اور تصویر میں صورت کو حسین اور متناسب بنایا ہے۔

مجھ پر احسان کر کے میرے نفس میں عافیت عطا کی ہے

مجھے محفوظ رکھا ہے اور توفیق کرامت فرمائی ہے

مجھ پر انعام کیا ہے اور مجھے ہدایت دی،

مجھے احسان کے قابل بنایا ہے اور ہر خیر کا ایک حصّہ عطا کیا ہے۔

مجھے کھانا کھلایا ہے اور پانی پلایا ہے۔

مجھے بے نیاز بنایا ہے اور سرمایہ و عزّت عطا کی ہے میری مدد کی ہے۔

مجھے معزّز بنایا ہے، مجھے اپنے خاص کرامت سے

ستر پوشی کرنے والا لباس دیا ہے

اور اپنی مخصوص رحمت سے مشکلات کو آسان بنایا ہے۔

خدایا تو اب محمدؐ و آل محمدؐ پر رحمت نازل فرما

اور زمانے کی مہلکات

اور روز و شب کے تصرّفات کے مقابلہ میں میری مدد فرما۔

دنیا کے ہولناک مواقع

اور آخرت کے رنج افزاء مراحل سے نجات عطا فرما

اور روئے زمین کے ظالموں کی تدبیروں سے محفوظ فرما۔

خدایا جس چیز کا مجھے خوف ہے اس کے لیے کفایت فرما

اور جس چیز سے پرہیز کرتا ہوں اس سے بچالے۔

میرے نفس اور دین میں میری حراست فرما

اور میرے سفر میں میری حفاظت کر،

اہل و مال کی کمی پوری فرما

اور جو رزق دیا ہے اس میں برکت عطا فرما۔

مجھے خود میرے نزدیک ذلیل بنا دے

اور لوگوں کی نگاہوں میں صاحبِ عزّت قرار دے

جنّ و انس کے شر سے صحیح و سالم رکھنا

اور گناہوں کی بنا پر مجھے رسوا نہ کرنا۔

میرے اسرار کو بے نقاب نہ فرمانا

اور میرے اعمال میں مجھے مبتلا نہ کرنا۔

جو نعمتیں دے دی ہے انھیں واپس نہ لینا

اور اپنے علاوہ کسی غیر کے حوالے نہ کرنا۔

خدایا تو مجھے اپنے علاوہ کس کے حوالے کرے گا،

اقرباء کے حوالے کرے گا کہ قطع تعلق کر لیں

یا دور والوں کے سپرد کرے گا کہ حملہ آور ہو جائیں

یا مجھے کمزور بنا دینے والوں کے حوالے کر دے گا

کہ جب کہ تو ہی میرا رب اور میرے امور کا مالک ہے۔

خدایا میں تجھ سے اپنی غربت، وطن سے دوری

اور صاحبانِ اختیار کی نگاہوں میں اپنی ذلّت کی فریاد کرتا ہوں۔

خدایا مجھ پر اپنا غضب نازل نہ فرمانا کہ

تو نے غضب سے آزاد کردیا تو مجھ کو کسی کی پرواہ نہیں ہے۔

تو پاک و بے نیاز ہے اور تیری عافیت میرے لیے بہت وسیع ہے۔

پروردگار میں تیرے روئے روشن کے واسطہ سے

جس نے زمین و آسمان کو منوّر کردیا ہے

اور ظلمتوں کو کافور بنا دیا ہے

اور اوّلین و آخرین کے امور کی اصلاح کردی ہے

یہ سوال کرتا ہوں کہ میری موت تیرے غضب کے عالم میں نہ ہو

اور مجھ پر تیری ناراضگی کا نزول نہ ہو

میں بار بار گذارش کرتا ہوں کہ عذاب نازل ہونے سے پہلے مجھ سے راضی ہو

اور اپنی ناراضگی کو لطف و کرم سے تبدیل کر دے

تیرے علاوہ کوئی خدا نہیں ہے۔

تو شہر محترم

مشعر الحرام

اور اس عذاب سے آزاد کرانے والے قدیم ترین گھر کا مالک ہے

جسے تو نے برکتوں سے بھر دیا ہے

اور لوگوں کے لیے جائے امن بنا دیا ہے۔

اے خدا جس نے اپنے حلم سے عظیم ترین گناہوں کو معاف کیا ہے

اور اپنے فضل و کرم سے مکمل ترین نعمتیں عطا کی ہیں۔

اے خدا جس نے اپنے کرم سے بہت کچھ عطا فرمایا ہے۔

اے سختی کے وقت میری مدد پر آمادہ

اے تنہائی کے ہنگام میرے ساتھی

اے مشکل میں میرے فریاد رس

اے مجھے نعمت دینے والے مالک

اے میرے معبود، میرے اور میرے بزرگانِ خاندان

ابراہیمؑ و اسماعیلؑ

اور اسحاقؑ و یعقوب کے مالک،

جبرئیل و میکائیل و اسرافیل

اور خاتم النبیین محمد مصطفےٰ ؐ

اور ان کی آل طیبین و طاہرینؑ کے پروردگار،

توریت اور انجیل

و زبور و قرآن کو نازل کرنے والے۔

کٰہٓیٰعٓصٓ وطٰہٰ و یٰسٓ

اور قرآن حکیم کے عرش سے اتارنے والے

تو اس وقت بھی میری پناہ ہے جب وسیع ترین راستے بھی مشکل ہو جائیں

اور بے پناہ وسعتیں رکھنے والی زمین بھی تنگ ہو جائے

تیری رحمت نہ ہوتی تو میں ہلاک ہو جاتا

تو گرتے ہوئے کو سہارا دینے والا ہے۔

تیری پردہ پوشی نہ ہوتی تو میں رسوا ہو جاتا

کہ تو دشمنوں کے مقابلہ میں مدد کرنے والا ہے

اور تیری کمک نہ ہوتی تو میں بالکل مغلوب ہو جاتا۔

اے خدا جس نے بلندی و رفعت کو اپنے لیے مخصوص رکھا ہے

اور چاہنے والے اس کی عزّت سے صاحب عزّت بنے ہوئے ہیں۔

اے وہ خدا جس کے سامنے بادشاہوں نے ذلّت اور خاکساری کا طوق اپنی گردن میں ڈال رکھا ہے

اور اس کی ہیبت سے لرزہ بر اندام،

وہ آنکھوں کی خیانت کے اشاروں اور دل کے رازوں سے باخبر ہے

اور اسے آنے والے زمانوں کی تمام حالات اور کیفیات کی اطلاع ہے۔

اے وہ خدا جس کے بارے میں کسی کو نہیں معلوم

کہ وہ کیا ہے اور کیسا ہے

کہ اس کا علم صرف اسی کے پاس ہے

اے زمین کو پانی پر روکنے والے

اور ہوا کے راستوں کو آسمانوں سے بند کرنے والے

اے وہ خدا جس کے نام بزرگ ترین ہے

اور جس کی نیکیاں ختم ہونے والی نہیں ہیں

اے صحرائے بے آب و گیاہ میں یوسفؑ کے لیے قافلے کو روکنے والے

اور انھیں کنویں سے نکال کر

غلامی کی کیفیت سے بادشاہت تک پہنچانے والے۔

اے شدّت گریہ سے آنکھوں کے سفید ہوجانے کے بعد

انھیں یعقوؑب تک پلٹا دینے والے

اے ایوبؑ کی بلاؤں اور مصیبتوں کو دور کرنے والے

اے ابراہیمؑ کی ضعیفی میں ان کا ہاتھ پکڑ کر

ذبح کے امتحان سے روکنے والے

اے زکریا کی دعا قبول کرکے

یحییٰؑ جیسا فرزند عطا کرنے والے

اور انھیں تنہائی و لاوارثی کی مصیبت سے بچانے والے۔

اے یونسؑ کو شکمِ ماہی سے نکالنے والے

اے سینۂ سمندر کو چاک کر کے بنی اسرائیل کو نجات دلانے والے

اور فرعون اور اس کے لشکر کو غرق کر دینے والے

اپنی رحمتِ خاص سے ہواؤں کو خوشگوار موسم کی بشارت دے کر بھیجنے والے۔

اے اپنی گنہگار مخلوقات پر جلدی عذاب نہ کرنے والے

اور موسیٰؑ کے مقابلے میں آنے والے جادوگروں کو عذاب سے بچا لینے والے

جب کہ انھوں نے بہت دنوں تک حقائق کا انکار کیا تھا

اور رزق خدا کھا کر غیر خدا کی عبادت کی تھی

اور اس کے رسولوں کی تکذیب کر کے

ان سے بر سر پیکار رہ چکے تھے۔

اے اللہ اے اللہ اے بے مثل ایجاد کرنے والے

اور بے مثل پیدا کرنے والے تیرا کوئی جواب نہیں ہے

اور تو ہمیشہ سے ہے تجھے فنا نہیں ہے

تو اس وقت بھی زندہ رہنے والا ہے جب کوئی ذی حیات نہ رہ جائے

اے مُردہ کو زندہ کرنے والے

اور ہر نفس کے اعمال و افعال کی نگرانی کرنے والے

اے وہ خدا جس کا شکریہ میں نے بہت کم ادا کیا لیکن اس نے نعمتوں سے محروم نہیں رکھا ہے۔

میری خطائیں بہت عظیم رہی ہیں لیکن اس نے رسوا نہیں کیا ہے

مجھے گناہ کرتے ہوئے دیکھا ہے اور اسے مشہور نہیں کیا ہے

اس نے بچپنے میں بھی میری حفاظت کی

اور ضعیفی میں بھی مجھے رزق دیا ہے۔

اے وہ خدا جس کی نعمتیں میرے پاس بے شمار ہیں

اور اس کے الطاف و مکارم ناقابل معاوضہ ہیں۔

اے وہ خدا جس نے میرا سامنا خیر و احسان کے ساتھ کیا

جب کہ میں نے اس کا مقابلہ برائی اور عصیان سے کیا ہے

اے وہ خدا جس نے مجھے ایمان کی ہدایت کی

معرفت شکر احسان سے پہلے۔

اے وہ خدا جسے مرض میں پکارا تو شفا دے دی

برہنگی میں آواز دی تو لباس عطا فرما دیا

بھوک میں پکارا تو غذا دے دی

پیاس میں فریاد کی تو پانی پلا دیا

ذلّت میں پکارا تو عزّت دے دی،

جہالت میں پکارا تو معرفت دے دی،

اکیلے میں آواز دی تو کثرت دے دی،

غائب کے بارے میں التماس کی تو واپس پہنچا دیا،

غربت میں فریاد کی تو غنی بنا دیا،

ظلم کے مقابلہ میں کمک مانگی تو عطا فرما دیا۔

مالداری میں پکارا تو نعمت واپس نہیں کی

اور کچھ نہ مانگا تو از خود عطا کر دیا۔

پس شکر اور تعریف تیرے ہی لیے ہے،

اے وہ خدا جس نے لغزشوں میں سہارا دیا

رنج و غم سے نجات دی،

دعا کو قبول کیا،

مخفی امور کی پردہ پوشی کی،

گناہوں کو معاف کیا

مقصد کو پورا کیا،

دشمنوں کے مقابلے میں میری مدد کی۔

میں تیری نعمتوں، تیرے احسانات اور تیری عظیم بخششوں کو

شمار کرنا بھی چاہوں تو ہرگز شمار نہیں کر سکتا

تو وہ ہے جس نے احسان کیا ہے

تو ہی وہ ہےجس نے انعام دیا ہے،

تو ہی وہ ہےجس نے لطف و احسان کیا ہے

تو ہی وہ ہے جس نے جمال دیا،

تو ہی وہ ہے جس نے بڑائی دی،

تو ہی وہ ہے جس نے کمال عطا کیا،

تو ہی وہ ہے جس نے روزی دی،

تو ہی وہ ہے جس نے توفیق دی ہے۔

تو ہی وہ ہے جس نے عطا کیا ہے،

تو ہی وہ ہے جس نے غنی بنایا ہے،

تو ہی وہ ہے جس نے منتخب نعمتیں عطا کی ہیں،

تو ہی وہ ہے جس نے پناہ دی،

تو ہی وہ ہے جس نے کفایت کی،

تو ہی وہ ہے جس نے ہدایت کی،

تو ہی وہ ہے جس نے محفوظ رکھا،

تو ہی وہ ہے جس نے پردہ پوشی کی،

تو ہی وہ ہے جس نے مغفرت کی ہے

تو ہی وہ ہے جس نے لغزشوں میں سہارا دیا،

تو ہی وہ ہے جس نے طاقت دی،

تو ہی وہ ہے جس نے عزّت دی،

تو ہی وہ ہے جس نے امداد کی،

تو ہی وہ ہے جس نے زور بازو عطا کیا۔

تو ہی وہ ہے جس نے تائید کی،

تو ہی وہ ہے جس نے نصرت کی،

تو ہی وہ ہے جس نے شفا دی ہے

تو ہی وہ ہے جس نے عافیت دی ہے

تو ہی وہ ہے جس نے بزرگی عطا کی ہے

تو صاحب برکت و عظمت ہے۔

تیری حمد ہمیشہ ہمیشہ کے لیے ہے

اور تیرا شکریہ بے حساب و بے نہایت ہے

پھر میں ہوں اے میرے معبود! اپنے گناہوں کا اعتراف کرنے والا

پس مجھے ان سے معافی دے

میں ہی وہ ہوں جس نے برائیاں کی ہیں،

میں ہی وہ ہوں جس نے خطا کی،

میں ہی وہ ہوں جس نے بُرا ارادہ کیا،

میں ہی وہ ہوں جس نے جہالت سے کام لیا،

میں ہی وہ ہوں جس نے غفلت برتی ہے،

میں ہی وہ ہوں جو چوک گیا،

میں نے خود پر اعتماد کیا،

میں نے دانستہ گناہ کیا،

میں ہی وہ ہوں جس نے وعدہ کیا،

میں ہی وہ ہوں جس نے وعدہ خلافی کی ہے

میں ہی وہ ہوں جس نے عہدوں کو توڑا،

میں ہی وہ ہوں جو تیری نعمتوں کا اعتراف کرتا ہوں

کہ نعمتیں مجھ پر نازل ہوتی رہی ہیں اور اب بھی میرے پاس ہیں

لیکن میں برابر گناہوں میں مبتلا رہا ہوں پروردگار مجھے معاف فرما دے

کہ مجھ جیسے بندوں کے گناہوں سے تیرا کوئی نقصان نہیں ہوتا۔

تو ہر ایک کی عبادت سے بے نیاز ہے

اور ہر نیک عمل کرنے والے کو

اپنی توفیق و تائید سے سہارا بھی دیتا رہتا ہے۔

میرے مالک اور میرے پروردگار ساری حمد تیرے لیے ہے۔

خدایا تو نے مجھے حکم دیا ہے تو میں نے سرتابی کی ہےاور منع کیا ہے۔

میں نے اطاعت نہیں کی ہے،

اب میرے پاس برائت کے لیے کوئی عذر نہیں ہے

اور عذاب کو دفع کرنے کے لیے کوئی صاحبِ طاقت بھی نہیں ہے۔

میں کس طرح تیرا سامنا کروں کس کے سہارے تیری بارگاہ میں حاضری دوں۔

اس سماعت کے سہارے یا اس بصارت کے ذریعہ

اس زبان کے سہارے یا اس دل کے سہارے اس ہاتھ کے وسیلے سے یا ان پیروں کے سہارے سے

یہ سب تیری نعمتیں ہیں

اور ان سب ہی سے تو میں نے تیری معصیت کی ہے،

یہ سب ہی تو میرے خلاف تیری حجّتیں اور دلیلیں ہیں۔

میرے پروردگار جس نے میری برائیوں کو میرے ماں باپ سے بھی پوشیدہ رکھا ہے اور انھیں جھڑکنے نہیں دیا۔

عشیرہ و قبیلہ سے مخفی رکھا اور انھیں سرزنش نہیں کرنے دی ہے۔

حکّام و سلاطین سے پوشیدہ رکھا ہے

اور انھیں سزا نہیں دینے دی ہے

ورنہ اگر یہ سب تیری طرح ساری حرکتوں پر مطلع ہوتے

تو ایک لمحہ کی مہلت نہ دیتے اور مجھے بالکل نظر انداز کر دیتے

بلکہ مجھ سے قطع تعلق کر لیتے۔

پس اے میرے معبود

میں تیرے سامنے حاضر ہوں اے میرے سردار

خضوع و خشوع، تواضع و انکسار کے ساتھ

اور اپنی حقارت و ذلّت کے ساتھ

نہ برائت ذمّہ کے لیے کوئی عذر رکھتا ہوں

اور نہ طاقت ہے کہ کامیاب ہوجاؤں

نہ کوئی دلیل ہے کہ وہ پیش کروں

نہ یہ کہہ سکتا ہوں کہ گناہ نہیں کیا اور نہ یہ کہ برائی نہیں کی

اس سے انکار کا کوئی راستہ نہیں اور اگر انکار کروں تو اے میرے مولا اس کا کچھ فائدہ نہیں

اور ایسا کیوں کر ہوسکتا ہے

جب کہ سارے اعضاء وجوراح میرے خلاف گواہی دینے کے لیے تیار ہیں۔

اور مجھے خود بھی اس بات کا یقین ہے اور اس میں کوئی شک نہیں ہے

کہ تو ان بڑے بڑے امور کے بارے میں سوال ضرور کرے گا۔

تو حاکم عادل ہے۔ تیرے یہاں ظلم کا گذر نہیں ہے

لیکن خدایا میرے لیے تو انصاف و عدل بھی تباہ کن ہے۔

میں تو تیرے عدل و انصاف سے بھی پناہ چاہتا ہوں اور صرف فضل و کرم کا معاملہ چاہتا ہوں۔

میرے پروردگار اگر تو عذاب بھی کرے گا تو یہ میرے گناہوں کا نتیجہ ہو گا

تیری حجت تمام ہو چکی ہے

اور تو معاف کر دے گا

تو یہ تیرے حلم وجود وکرم کا نتیجہ ہو گا

تیرے علاوہ کوئی خدا نہیں ہے تو پاک اور بے نیاز ہے

اور میں ظلم کرنے والوں میں ہوں

تیرے علاوہ کوئی خدا نہیں ہے تو پاک اور بے نیاز ہے

اور میں استغفار کرنے والوں میں ہوں

تیرے علاوہ کوئی خدا نہیں ہے تو پاک اور بے نیاز ہے

اور میں توحید کا کلمہ پڑھنے والوں میں ہوں۔

تیرے علاوہ کوئی خدا نہیں ہے تو پاک اور بے نیاز ہے

اور میں خوفزدہ ہوں۔

تیرے علاوہ کوئی خدا نہیں ہے تو پاک اور بے نیاز ہے

اور میں لرزہ بر اندام ہوں۔

تیرے علاوہ کوئی خدا نہیں ہے تو پاک اور بے نیاز ہے

اور میں امیدواروں میں ہوں۔

تیرے علاوہ کوئی خدا نہیں ہے تو پاک اور بے نیاز ہے

اور میں رغبت رکھنے والوں میں ہوں۔

تیرے علاوہ کوئی خدا نہیں ہے تو پاک اور بے نیاز ہے

اور میں تیری تہلیل کرنے والوں میں ہوں۔

تیرے علاوہ کوئی خدا نہیں ہے تو پاک اور بے نیاز ہے

اور میں سوال کرنے والوں میں ہوں

تیرے علاوہ کوئی خدا نہیں ہے تو پاک اور بے نیاز ہے

میں تسبیح کرنے والوں میں ہوں۔

تیرے علاوہ کوئی خدا نہیں ہے تو پاک اور بے نیاز ہے

میں تکبیر کہنے والوں میں ہوں۔

تیرے علاوہ کوئی خدا نہیں ہے تو پاک اور بے نیاز ہے

اور میرا اور میرے آباء و اجداد سب کا پروردگار بھی ہے۔

پروردگار یہ تیری حمد و ثنا تیری بزرگی کے اقرار کے ساتھ ہے

اور یہ میرا اخلاص تیرے ذکر توحید کے اعتراف کے ہمراہ ہے۔

میں تیری نعمتوں کا ایک ایک کر کے اقرار کرتا ہوں

اور پھر یہ بھی اقرار کرتا ہوں کہ کوئی انھیں شمار نہیں کر سکتا۔

وہ بے حدود و حساب اور بے نہایت و بے شمار ہیں۔

تام و کامل بھی ہیں اور واضح و روشن اور قدیم وجدید بھی۔

تیری نعمتوں کا سلسلہ روز اول سے جاری ہے

جس دن سے تو نے مجھے خلق کیا

اور میری زندگی کا آغاز کیا تھا۔ وہ نعمتیں یہ ہیں کہ

تو نے فقیری سے بے نیازی دی ہے،

نقصانات کو رفع کیا ہے،

سہلوت کے انتظامات کئے ہیں،

سختیوں کو دور کیا ہے،

رنج و الم کو برطرف کیا ہے،

بدن میں عافیت دی ہے،

دین محمدؐ میں سلامتی دی ہے۔

اور یہ نعمتیں اس قدر بے حساب ہیں کہ

اگر اولین و آخرین مل کر میری مدد کریں

اور میں ان کا حساب کرنا چاہوں تو نہیں کر سکتا

اور نہ وہی سب کر سکتے ہیں تو پاک و پاکیزہ اور بلند و برتر ہے۔

تو رب کریم و عظیم و رحیم

اور تیری رحمتوں کا شمار نہیں

تیری حمد و ثنا کی منزل تک کوئی پہنچ نہیں سکتا

اور تیری نعمتوں کا بدلہ ممکن نہیں ہے۔

پروردگار محمدؐ و آل محمدؐ پر رحمت نازل فرما

اور ہمارے اوپر نعمتوں کو مکمل کر دے

اور اپنی اطاعت سے نیک بخت بنا دے

کہ تو پاک و بے نیاز اور وحدہٗ لا شریک ہے۔

خدایا تو مضطرب لوگوں کی دعاؤں کو قبول کرتاہے

برائیوں کو دفع کرتا ہے

ستم رسیدہ کی فریاد رسی کرتا ہے،

بیماروں کو شفا دیتا ہے،

فقیروں کو غنی بناتا ہے

ہر شکستگی کو جوڑ دیتا ہے

بچوں پر رحم کرتا ہے،

بڑوں کو مدد بہم پہنچاتا ہے،

تیرے علاوہ کوئی مددگار نہیں ہے

اور تجھ سے بالاتر کوئی صاحبِ طاقت نہیں ہے۔

تو خدائے علی و کبیر ہے۔

اے پابستۂ زنجیر اسیروں کو رہائی دلانے والے۔

اے کمسن بچوں کو روزی دینے والے،

اے خوف زدہ طالبانِ پناہ کو پناہ دینے والے،

اے وہ خدا جس کا کوئی شریک اور وزیر نہیں ہے

محمدؐ وآل محمدؐ پر رحمت نازل فرما

اور آج کی شام مجھے وہ سب کچھ عطا فرما دے

جو تو نے کسی بھی نیک بندے

کو عطا کیا ہے

ظاہری نعمتوں کا تسلسل

باطنی نعمتوں کی تجدید

بلاؤں سے نجات،

رنج و غم کا دفعیہ،

دعاؤں کی استجابت،

نیکیوں کی قبولیت،

برائیوں کی پردہ پوشی وغیرہ

تو لطیف بھی ہے اور خبیر بھی

اور ہر شئے پر قادر و قدیر بھی۔

خدایا جس جس کو پکارا جاتا ہے ان میں تو سب سے زیادہ قریب ہے

اور تو ہی ہر ایک سے جلدی جواب دینے والا ہے۔

ہر معاف کرنے والے سے زیادہ کریم

اور ہر عطا کرنے والے سے زیادہ بخشنے والا،

ہر مسئول سے زیادہ سننے والا ہے

اور دنیا وآخرت میں رحمٰن و رحیم ہے۔

تیرے جیسا کوئی قابل سوال نہیں

اور تیرے علاوہ کوئی امیدوں کا مرکز نہیں ہے۔

میں نے تجھے پکارا تو تو نے قبول کیا۔

تجھ سے مانگا تو تو نے عطا کیا۔

تیری طرف رغبت کی تو تو نے رحم کیا

اور تجھ پر بھروسہ کیا تو تو نے نجات عطا کر دی۔

تیری پناہ مانگی تو تو اکیلا ہی کافی ہو گیا۔

خدایا رحمت نازل فرمانا حضرت محمد مصطفےٰ ؐ

اپنے بندے اپنے رسول و نبی

اور ان کی آل طیبین و طاہرینؑ پر

اور ہمارے اوپر اپنی نعمتوں کو مکمل فرما دے

ہر عطا کو خوشگوار بنا دے

اور ہمارا نام شکر گذاروں میں

اور نعمتوں کو یاد رکھنے والوں میں درج کر دے۔

آمین آمین یا ربّ العالمین۔

خدایا اے پروردگار جس کی ملکیت کے ساتھ اختیارات بھی ہیں

اور جس کے اختیارات کے ساتھ قہّاری بھی ہے۔

جس نے عاصیوں کی پردہ پوشی کی ہے۔

استغفار کرنے والوں کو معاف کیا ہے۔

اے طلبگاروں اور رغبت کرنے والوں کی منزلِ آخر،

امیدواروں کی امیدوں کی آماجگاہ۔

ہر شئے پر علمی احاطہ رکھنے والے

اور عذر خواہوں پر رأفت، رحمت و تحمّل کا مظاہرہ کرنے والے۔

خدایا ہم اس شام کے وقت تیری طرف متوجہ ہیں

جسے تو نے با شرف و عظمت قرار دیا ہے۔

ہمارا وسیلہ تیرا رسولؐ

تیری مخلوقات کا منتخب ترین بندہ

تیری وحی کا امین،

تیرے ثواب کی بشارت دینے والا، تیرے عذاب سے ڈرانے والا

اور روشن چراغ پیغمبر ہے

جس کے ذریعے تو نے مسلمان بندوں پر انعام کیا ہے

اور اسے عالمین کے لیے رحمت قرار دیا ہے

خدایا محمدؐ و آل محمدؐ پر ویسی رحمت نازل فرما

جس کے وہ اہل ہیں۔ اے خدائے عظیم

حضرت محمدؐ اور

ان کی آل طیبین و طاہرین پررحمت نازل فرما۔

اور اپنی مغفرت کے ذریعہ ہمارے گناہوں کی پردہ پوشی فرما۔

تیری طرف مختلف زبانوں میں آوازیں اور فریادیں بلند ہیں۔

لہٰذا آج کی شام مجھے ہر اس نعمت میں حصّہ قرار دے

جسے تو اپنے بندوں پر تقسیم کر رہا ہے

اور جس نور سے ہدایت کر رہا ہے

اور جس رحمت کو نشر کر رہاہے۔

اور جس برکت کو نازل کر رہاہے

اور جس لباس عافیت سے پردہ پوشی کر رہا ہے

اور جس رزق میں وسعت دے رہا ہے۔

اے تمام رحم کرنے والوں سے زیادہ رحم کرنے والے،

خدایا میں اس وقت واپس جاؤں تو

کامیاب نجات یافتہ،

نیک عمل، بہرہ ور (نفع اٹھانے والے)

اور فائز المرام واپس جاؤں

مجھے مایوس رحمت نہ قرار دینا

اور اپنی رحمت سے خالی نہ رکھنا جس عطا کی امید رکھتا ہوں

اس سے مایوس نہ ہو جاؤں

اور تیری بارگاہ سے نامراد واپس نہ جاؤں

ہمیں ناکام کرکے نہ پلٹا

اپنے دروازے سے ہٹا نہ دینا

کہ اے بہترین بخشش کرنے والے

اور بلند ترین کرم کرنے والے۔

میں تیری طرف بڑے یقین کے ساتھ متوجہ ہوں

اور تیرے محترم مکان کا دل سے قصد کیے ہوئے ہوں۔

ان مناسک میں میری امداد فرما،

میرے حج کو شرف قبولیت عطا کر،

میرے گناہوں کو بخش دے، میری خطاؤں کو معاف فرما،

میں نے تیری بارگاہ میں وہ ہاتھ پھیلایا ہے

جس پر ذلت و حقارت کے نشانات لگے ہوئے ہیں۔

لیکن پروردگار جو ہم نے مانگا ہے وہ آج کی شام عطا کردے

اور جس کام کے لیے پکارا ہے اس کے لیے کافی بن جا

تیرے علاوہ اور کوئی کافی نہیں ہے

اور تیرے سوا کوئی پروردگار بھی نہیں ہے۔

تیرا حکم نافذ ہے

اور تیرا علم محیط ہے

اور تیرا فیصلہ مبنی پر انصاف ہے

ہمارے حق میں خیر کا فیصلہ فرما

اور ہمیں اہل خیر میں قرار۔

خدایا اپنے جود ہمارے لیے عظیم ترین اجر

اور کرم بہترین ذخیرہ ثواب

اور دائمی سہولت و رفاہیت کو لازم قرار دے دے

ہمارے گناہوں کو معاف فرما

اور ہمیں اہل ہلاکت کے ساتھ ہلاک نہ کرنا۔

اپنی رحمت و رافت کا رخ ہماری طرف سے نہ موڑ دینا

کہ تو ارحم الراحمین اور خیر الغافرین ہے۔

خدایا آج کی شام ان لوگوں میں قرار دے جن کے سوال پر تو نے عطا کیا ہے

اور جن کے شکر پر تو نےمزید دیا ہے

جن کی توبہ کو قبول کیا ہے

اور جن کے گناہوں سے جدا ہوجانے پر انھیں معاف کر دیا

اے صاحبِ جلال و اکرام۔

خدایا ہمیں پاکیزہ بنا دے ہماری مدد فرما۔

ہماری فریاد و زاری پر رحم فرما

اے بہترین مسئول

اور سب سے زیادہ رحم کرنے والے

اے وہ خدا جس پر پلکوں کی بندش

اور آنکھوں کے اشارے مخفی نہیں

نہ وہ چیز جو پردے کے نیچے ہو

جو دلوں کے مضمرات کو بھی جانتا ہے

اور سینے کے اندر چھپے ہوئے رازوں سے بھی باخبر ہے

اور اس کا حلم ہر شئے پر احاطہ رکھتا ہے۔

تو پاک وبے نیاز ہےاور مخالفین کے اقوال و تصورات سے

بہت زیادہ بلند تر ہے

ساتوں آسمانوں

تمام زمینیں اور دونوں کی مخلوقات سب تیری تسبیح کر رہی ہیں

ہر ذرۂ کائنات تیری حمد کا تسبیح خواں ہے۔

حمد تیرے لیے ہے

اور بزرگی بھی تیرے ہی لیے ہے۔

تو صاحبِ جلال و اکرام

اور مالک فضل وانعام ہے۔

تیری نعمتیں عظیم ہیں

اور تو جواد و کریم

اور رؤف و رحیم ہے۔

پروردگار ہمارے لیے رزقِ حلال میں وسعت عطا فرما۔

ہمارے بدن اور دین دونوں میں عافیت عطا فرما۔

ہمیں خوف میں امن و امان عطا فرما

اور ہماری گردن کو آتش جہنم سے رہائی عطا فرما۔

خدایا ہمیں اپنی تدبیروں کا نشانہ نہ بنانا

اور اپنے عذاب میں دھیرے دھیرے کھینچ نہ لینا۔

ہم کسی دھوکے میں نہ رہنے پائیں۔

اور جنّات و انسان کے فاسقوں کے شر سے محفوظ رہیں۔

اے سب سے بہتر سننے والے

اور سب سے زیادہ نگاہ رکھنے والے

سب سے تیز تر حساب کرنے والے

اور سب سے زیادہ رحم کرنے والے

محمدؐ و آل محمدؐ پر رحمت نازل کر۔

جو برکت والے سید و سردار ہیں

پروردگار میں تجھ سے ایسی حاجتیں طلب کر رہاہوں

کہ اگر تو انھیں پورا کردے گا تو باقی سب کا رد کردینا بھی مضر نہ ہو گا

اور انھیں رد کردے گا تو باقی سب کا عطا کر دینا بھی مفید نہ ہوگا

اور میری گردن کو آتش جہنم سے آزاد کر دے

کہ تیرے علاوہ کوئی خدا نہیں ہے

اور تو وحدۂ لا شریک ہے۔

بادشاہت تیرے لیے ہے اور حمد تیرے لیے ہے

اور تو ہر شئے پر قادر ہے۔

اے میرے پروردگار اے میرے پروردگار۔

خدایا میں اپنی مالداری میں بھی فقیر ہی ہوں

تو غربت میں کس طرح فقیر نہ ہوں گا۔

اور اپنے علم کے باوجود جاہل ہوں

تو جہالت میں کس طرح جاہل نہ ہوں گا۔

تیری تدبیروں کی نیرنگی

اور تیرے مقدّرات کی بسرعت تبدیلی نے

تیرے با معرفت بندوں کو ان باتوں سے روک رکھا ہے

کہ نہ کسی عطیہ کی طرف سے پر سکون ہونے پاتے ہیں

اور نہ کسی بلا سے مایوس ہونے پاتے ہیں۔

پروردگار میری طرف سے وہ سب کچھ ہے جو میری ذلت و پستی کے مطابق ہے

تو تیری طرف سے بھی وہ سب کچھ ہونا چاہیئے جو تیرے رحم وکرم کے شایانِ شان ہے۔

خدایا تو نے اپنی تعریف لفظ لطیف و رؤف سے کی ہے

اور میرے ضعف کے وجود کے پہلے سے اس کا مظاہرہ کیا

تو کیا اب ضعف ظاہر ہو جانے کے بعد انھیں روک دے گا۔

خدایا اگر مجھ سے نیکیوں کا ظہور ہو

تو وہ تیرے کرم ہی کا نتیجہ ہے

اور اگر برائیاں ظاہر ہوں

تو یہ میرے اعمال کا نتیجہ ہیں اور ان پر تیری حجت تمام ہے۔

خدایا جب تو میرا کفیل ہے تو دوسرے کے حوالے کس طرح کرے گا۔

اور جب تو میرا مددگار ہے تو میں ذلّت سے دوچار کس طرح ہوں گا۔

تو میرے حال پر مہربان ہے تو مایوس اور ناکام ہونے کی کیا وجہ ہے۔

اب میں اپنی فقیری ہی کو واسطہ قرار دیتا ہوں

لیکن اسے کس طرح واسطہ قرار دوں

جب کہ تیری بارگاہ تک پہنچنے کا سوال ہی نہیں ہے۔

میں اپنے حالات کا شکوہ کس طرح کروں

کہ تو خود ہی بہتر جانتا ہے

اپنی زبان سے کس طرح ترجمانی کروں

کہ سب کچھ تو تجھ پر خود ہی واضح اور روشن ہے

تو کیسے میری امیدوں کا ناامید کرے گا

کہ وہ تیرے ہی کرم کی بارگاہ میں پیش کی گئی ہیں

اور کیسے حالات کی اصلاح نہیں کرے گا

جب کہ ان کا قیام تیری ہی ذات سے وابستہ ہے۔

خدایا تو کس قدر مہربان ہے

میری عظیم ترین جہالت کے باوجود

تو کس قدر رحیم وکریم ہے

میرے بد ترین اعمال کے باوجود

خدایا تو کس قدر مجھ سے قریب ہے

اور میں کس قدر تجھ سے دور ہوں

اور جب تو اس قدر مہربان ہے

تو اب کون درمیان میں حائل ہو سکتا ہے۔

خدایا آثار کے اختلاف

اور زمانہ کے تغیرات سے میں یہ سمجھا ہوں کہ

تو ہر چیز اور ہر رنگ میں اپنے کو واضح کرنا چاہتا ہے

کہ میں کسی طرح جاہل نہ رہ جاؤں اور بہرحال تجھے پہچان سکوں۔

پروردگار جب میری پستی میری زبان گُنگ کردیتی ہے

تو تیرا کرم قوتِ گویائی پیدا کر دیتا ہے

اور جب میرے حالات و کیفیات مجھے مایوس بنانا چاہتے ہیں

تو تیرے احسانات پھر پر امید بنا دیتے ہیں۔

خدایا! میں، جس کی نیکیاں بھی برائیوں جیسی ہیں

تو اس کی برائیوں کا کیا حال ہوگا۔

اور جس کی نگاہ کے حقائق بھی دعوے سے زیادہ حیثیت نہیں رکھتے ہیں

تو اس کے دعوؤں کی کیا حیثیت۔

پروردگار تیرے نافذ حکم اور تیری قہرمان مشیّت نے

کسی کے لیے بولنے کا موقع نہیں چھوڑا

اور کسی نہ کسی حال پر ثابت رہنے دیا ہے۔

کتنی ہی مرتبہ میں نے اطاعت کی بنا رکھی

اور حالات کو مضبوط بنایا

لیکن تیرے عدل و انصاف نے میرے اعتماد کو منہدم کردیا

اور پھر فضل وکرم نے مجھے سہارا دیا

پروردگار تجھے معلوم ہے

کہ فعل و عمل کے اعتبار سے میری اطاعت دائمی نہیں ہے

تو عزم و جزم کے اعتبار سے بہرحال دائمی ہے۔

میری حالت تو یہ ہے کہ میں کس طرح عزم کروں جب کی صاحبِ اقتدار اور قاہر تو ہے

اور کس طرح عزم نہ کروں جب کہ حاکم و آمر بھی تو ہی ہے۔

خدایا آثار کائنات میں غور و فکر

مجھے تیری ملاقات سے دور تر کیے جا رہے ہیں

لہٰذا کسی ایسی خدمت کا سہارا دے دے کہ میں تیری بارگاہ میں پہنچ جاؤں،

میں ان چیزوں کوکس طرح راہنما بناؤں جو خود ہی اپنے وجود میں تیری محتاج ہیں۔

کیا کسی شئے کو تجھ سے زیادہ بھی ظہور حاصل ہے

کہ وہ دلیل بن کر تجھے ظاہر کر سکے

تو کب ہم سے غائب رہا ہے کہ تیرے لیے کسی دلیل اور رہنمائی کی ضرورت ہو۔

اور کب ہم سے دور رہا ہے کہ آثار تیری بارگاہ تک پہنچانے کا ذریعہ بنیں۔

وہ آنکھیں اندھی ہیں جو تجھے اپنا نگراں نہیں سمجھ رہی ہیں

اور وہ بندہ اپنے معاملاتِ حیات میں سخت خسارہ میں ہے جسے تیری محبت کا کوئی حصّہ نہیں ملا۔

خدایا تو نے آثارِ کائنات کی طرف رجوع کرنے کا حکم دیا ہے

تو اب اپنی بارگاہ میں واپس بلا لے نور کے لباس

اور ہدایت کی بصیرت کے سہارے

تا کہ میں اسی شان سے واپس آؤں کہ میرا باطن

اس کائنات کی طرف توجہ سے محفوظ ہو

اور میری ہمت اس دنیا پر بھروسہ کرنے سے بلند ہو۔

تو ہر شئے پر قدرت و اختیار رکھتا ہے

پروردگار یہ میری ذات ہے جو تیری جانب میں بالکل واضح اور روشن ہے

یہ میری حالت ہے جس پر کوئی پردہ نہیں ہے

مین تیرے ہی ذریعہ تیری بارگاہ تک پہنچنا چاہتا ہوں

اور تیری ہی رہنمائی کا طلب گار ہوں۔

اپنے نور سے اپنی طرف ہدایت فرما

اور اپنی سچّی بندگی کے ساتھ اپنی بارگاہ میں حاضری کی سعادت کرامت فرما۔

خدایا مجھے اپنے علم کے خزانوں سے علم عطا کر

اور اپنے محفوظ پردوں سے میری حفاظت فرما۔

خدایا مجھے اہل تقرّب کا حاصل ہونے والے حقائق عطا فرما

اور جذب و کشش رکھنے والوں کے مسلک پر چلنے کی توفیق کرامت فرما۔

اپنی تدبیر کے ذریعہ سے مجھے میری تدبیر سے بے نیاز کر دے

اور اپنے اختیار کے ذریعہ میرے اختیار و انتخاب سے مستغنی بنا دے

اور اضطرار و اضطراب کے مواقع کی اطلاع اور آگاہی عطا فرما۔

پروردگار مجھے میرے نفس کی ذلّت سے باہر نکال دے

ہر شک و شر سے پاک و پاکیزہ بنا دے

موت سے پہلے

میں تیری ہی مدد چاہتا ہوں تو تو میری امداد کر

اور تجھی پر بھروسہ کرتاہوں تو تو کسی اور کے حوالے نہ کر دینا

بس تجھ سے سوال کرتا ہوں تو ناامید نہ کرنا

اور صرف فضل کی رغبت رکھتا ہوں تو مجھے محروم نہ رکھنا۔

میں تیری جناب سے رشتہ رکھتا ہوں تو مجھے دور نہ کرنا

اور تیرے دروازے پر کھڑا ہوں تو مجھے بھگا نہ دینا۔

تیری مرضی اس سے بلند تر ہے کہ اس میں تیری طرف سے کوئی نقص پیدا ہو سکے

تو میری طرف سے کیا نقص پیدا ہو سکتا ہے

تو اپنی ذات سے اس بات سے بے نیاز ہے کہ تجھے تیرے ہی طرف سے کوئی فائدہ پہنچے

تو میری طرف سے کیا فائدہ پہنچ سکتا ہے۔

خدایا یہ صرف قضا و قدر ہے جو امید وار بنائے ہوئے ہے

ورنہ خواہش تو آرزوؤں کی رسّی میں جکڑی ہوئی تھی۔

اب تو ہی میرا مددگار بن جا

تا کہ تو ہی مدد کرے اور تو ہی راستہ دکھائے۔

اپنے فضل و کرم سے ایسا غنی بنا دے

کہ اپنی طلب سے بھی بے نیاز ہوجاؤں۔

تو ہی وہ ہے جس نے اپنے دوستوں کے دلوں میں انوار الوہیت کی روشنی پیدا کر دی

تو وہ تجھے پہچان گئے اور تیری وحدانیت کا اقرار کرنے لگے

اور تو ہی وہ ہے جس نے اپنے محبّوں کے دلوں سے اغیار کو نکال کر باہر کردیا

تو اب تیرے علاوہ کسی کے چاہنے والے نہیں ہیں

اور کسی کی پناہ نہیں مانگتے۔

تو نے اس وقت اس کا سامان فراہم کیا

جب سارے عالم سبب وحشت بنے ہوئے تھے

اور تو نے ان کی اس طرح ہدایت کی

کہ سارے راستے روشن ہوگئے۔

پروردگار جس نے تجھے کھو دیا اس نے پایا کیا

اور جس نے تجھے پا لیا اس نے کھویا کیا۔

جو تیرے بدل پر راضی ہوگیا وہ نا مُراد ہوگیا

اور جس نے تجھ سے منہ موڑا وہ گھاٹے میں رہا۔

تیرے علاوہ غیر سے امید کیوں کی جائے

جب کہ تو نے احسان کا سلسلہ روکا نہیں

اور تیرے سوا دوسرے سے مانگا ہی کیوں جائے

جب کہ تیرے فضل و کرم کی عادت میں فرق نہیں آیا ہے۔

وہ پروردگار جس نے اپنے دوستوں کو انس و محبت کی حلاوت کا مزہ چکھا دیا ہے

تو اس کی بارگاہ میں ہاتھ پھیلائے کھڑے ہوئے ہوں

اور اپنے اولیاء کی ہیبت کا لباس پہنا دیا ہے

تو اس کے سامنے استغفار کرنے کے لیے ایستادہ ہیں۔

تو تمام یاد کرنے والوں سے پہلے یاد کرنے والا ہے۔

تو عابدوں کی توجہ سے پہلے احسان کرنے والا ہے

اور سوال کرنے والوں کے سوال سے پہلے عطا کرنے والا ہے

اور تو ہی عطا کرنے والا اور خود ہی دے کر قرض مانگنے والا ہے۔

خدایا مجھے اپنی رحمت سے طلب کر لے تا کہ میں تیری بارگاہ تک پہنچ جاؤں

اور مجھے اپنے احسان کے سہارے اپنی طرف کھینچ لے تا کہ میں تیری طرف متوجہ ہو جاؤں۔

خدایا میری اُمید تجھ سے منقطع ہونے والی نہیں ہے چاہے گنہگار ہی کیوں نہ ہوں

جس طرح کے میرا خوف ختم ہونے والا نہیں ہے چاہے اطاعت ہی کیوں نہ کروں

اس لیے تمام جہان نے تیری طرف ڈھکیل دیا ہے

اور تیرے کرم کی اطلاع نے تیرے سامنے کھڑا کر دیا ہے

جب تو میری امید ہے تو میں مایوس کس طرح ہو جاؤں

اور جب تجھ پر بھروسہ ہے تو ذلیل کس طرح ہو سکتا ہوں

اگر تو نے ذلت میں ڈال دیا تو صاحب عزت کیسے بنوں گا

اور تو نے اپنا بنا لیا تو ذلیل کیسے ہو سکوں گا۔

پروردگار میں کس طرح فقیر نہ بنوں کہ تو نے فقیروں کے درمیان رکھا ہے اور کیسے فقیر رہ سکوں گا

جب کہ تو نے اپنے فضل وکرم سے غنی بنا دیا ہے۔

تیرے علاوہ کوئی خدا نہیں ہے۔

تو نے اپنے کو ہر ایک کو پہچنوا دیا ہے

تو اب کوئی تجھ سے ناواقف نہیں ہے اور میرے لیے اور بھی واضح اور نمایاں ہو گیا ہے

تو مجھے تیرا جلوہ ہر شئے میں نظر آنے لگا ہے۔

تو در حقیقت ہر ایک کے لیے روشن ہے۔

اے خدا جس نے اپنی رحمانیت سے ہر شئے پر احاطہ کر لیا

تو عرشِ اعظم بھی اس کی ذات میں گُم ہو گیا۔

تو نے آثار وجود کو دوسرے آثار کے ذریعے نابود کر دیا

اور اغیار کو افلاک نور کے احاطہ سے محو کر دیا ہے۔

اے وہ خدا جو عرش کے سراپا پردوں میں اس طرح پوشیدہ ہوا

کہ نگاہیں اس کو دیکھنے کے لیے ترس گئیں

اور کمال تجلّی سے اس طرح روشن ہوا

کہ اس کی عظمت ہر شئے پر حاوی ہوگئی۔

تیرا ظہور ہےاور کس طرح غائب ہوسکتا ہے

جب کہ ہر ایک کے سامنے رہ کر اس کے اعمال کی نگرانی کر رہا ہے۔

تو ہر شئے پر قادر ہے

اور ساری تعریف تیری ذاتِ واحد کے لیے ہے۔

خدایا میرے گناہ تجھ کو نقصان نہ پہنچا سکیں گے

اور میری مغفرت تجھ میں کچھ کمی نہ پیدا کر سکے گی

لہٰذا مجھ کو وہ عطا کر جس سے تیرے یہاں کمی نہیں ہوتی ہے

اور مجھے بخش دے وہ جس سے تیرا کوئی نقصان نہیں ہونے والاہے۔

خدایا مجھ کو کسی ایسی نیکی سے محروم نہ کرنا جو تیرے پاس ہے کسی اس برائی کی بنا پر جو میرے پاس ہے

اگر تو مجھ پر میری تکلیف اور زحمت کی بنا پر رحم نہ بھی کرے تو کم سے کم

تو معصیت کے اٹھانے کے اجر سے محروم نہ کرنا۔