خدایا میں تجھ سے سوال کرتا ہوں

تیرے عظیم اعظم نام سے،

اجل اکرم نام کے سہارے

خزانوں میں چھپا ہوا

تو نور ہے، حق ہے،

قرآن مبین ہے،

ایسا نور جو ہر نور کے ساتھ ہے،

وہ نور جو نور سے ہے

وہ نور جو نور میں ہے،

وہ نور جو ہر نور پر ہے،

وہ نور جو ہر نور سے بالاتر ہے،

وہ نور جس سے ہر تاریکی دور ہوتی ہے،

ہر سختی ختم ہوتی ہے،

ہر شیطان کا خاتمہ ہوتا ہے ،

ہر جبّار کی طاقت ٹوٹ جاتی ہے،

جس کے مقابلے میں زمین کو قرار

نہ آسمان کو قرار،

ہر خوف زدہ اسی کی پناہ میں ہے

ہر جادو اسی سے باطل ہوتا ہے،

ہر ظلم کا خاتمہ اس سے ہوتا ہے،

ہر حسد کا علاج اسی سے ہوتا ہے ۔

اس کی عظمت کے سامنے بر و بحر لرز رہے ہیں،

اسی سے کشتیاں ٹھہرتی ہیں،

جب فرشتہ اسے زبان پر لاتا ہے

پھر لہریں اس کشتی پر کچھ اثر نہیں کرپاتیں

اور وہ ہے تیرا عظیم سے عظیم تر نام

کہ جو روشن سے روشن تر

سب سے بڑا نور ہے

وہی جس سے تو نے اپنی ذات کو موسوم کیا

اور اسی کے ذریعے تو نے اپنے عرش کو سنوارا ہے

میں محمدؐ اور ان کے اہل بیتؑ کے ذریعے تیری طرف آیا ہوں

اور سوال کرتا ہوں تیرے اور ان کے واسطے سے

کہ تو رحمت نازل فرما محمدؐ وآل محمدؐ پر اور یہ کہ میرا یہ اور یہ کام بنادے۔

خدایا تو وہ خدا ہے جس کے علاوہ کوئی خدا نہیں۔ تو علیم وکریم تو عزیز و حکیم ہے ، تو واحد و قہار ہے ، تو مالک و جبار ہے ، تو رحیم و فخار ہے ، تو شدید قوّت والا ہے، تو بلند و برتر ہے، تو سمیع و بصیر ہے ، تو طاقت در اور قوت والا ہے ، تو معاف کرنے والا اور شکور ہے تو حمید و مجید ہے، تو غنی و حمید ہے ، تو غفور و ودود ہے تو حنان ومنان ہے ، تو علیم اور کریم ہے، تو جواد اور ماجد ہے ، تو واحد اور احد ہے ، تو غائب اور حاضر ہے تو ظاہر اور باطن ہے، تو ہر شئے کا جاننے والا ہے، تیرا نور تمام ہے ، تیرا ہاتھ کھلا ہوا ہے ۔ تو عطا کرنے والا ہے پروردگار تیری ذات عظیم ترین ، تیری جهت بهترین جهت ہے، تیرا عطیہ بہترین عطیہ - تیری اطاعت کی جاتی ہے تو تو قبول کر لیتا ہے ، تیری معصیت کی جاتی ہے تو تو معاف کر دیتا ہے مضطروں کی دعا قبول کرتا ہے رنج و غم کو دور کرتا ہے ۔ گنہگاروں کی توبہ کو قبول کرتا ہے ۔ ان کے گناہوں کو معاف کرتا ہے۔ تیری نعمتوں کا کوئی بدلہ نہیں، تیرے احسانات بے شمار ہیں ۔ تیری مدحت تک کوئی انسان نہیں پہنچ سکتا ۔ خدایا محمدؐ و آل محمدؐ پر رحمت نازل فرما۔ انھیں کشائش حال اور راحت و سرور عطا فرما اور مجھے بھی اس لذّت سے آشنا بنا دے۔ جن وانس میں ان کے تمام دشمنوں کو ہلاک کر دے ۔ ہمیں دنیا و آخرت میں نیکی عطا فرما اور عذاب جہنّم سے نجات عطا فرما ہیں ان لوگوں میں قرار دے جن کے لیے خوف و حزن نہیں ہے ان لوگوں میں قرار دے جو صبر کرنے والے اور اپنے رب پر بھروسہ کرنے والے ہیں ۔ ہمیں ثبات قول عطا فرما دنیا و آخرت میں ، زندگی اور موت میں اور آخرت اور حساب اور میزان اور قیامت کے ہولناک منزلوں میں میرے لیے برکت عطا فرما۔ صراط پر ثبات عطا فرما، صراط پر گزرنے کی توفیق عطا فرما۔ وہ علم دے جو نفع بخش ہو ، وہ یقین دے جو سچّا ہو، تقویٰ اور نیکی عطا فرما، احتیاط اور اپنا خوف عطا فرما۔ وہ خوف جو تجھ سے قریب تر بنا دے دور نہ ہونے دے ۔ پروردگار مجھے محبوب بنا دے ۔ مجھ سے بیزار نہ ہونا۔ مجھے اپنا بنالے ۔ مجھے چھوڑ نہ دینا ۔ مجھے تمام دنیا و آخرت کا وہ خیرعنایت فرما جو میں جانتا ہوں یا نہ جانتا ہوں اور ہر بُرائی سے مجھے محفوظ فرما چاہے مجھے اس کا علم ہو یا نہ ہو۔

اے یگانہ! اے بزرگوار !

اے یکتا! اے بے نیاز!

اے وہ جس نے نہ جنا نہ وہ جنا گیا

اور نہ ہی کوئی اس کا ہمسر ہے

اے با عزّت! اے سخی! اے مہربان!

اے دعاؤں کے سننے والے !

اے سب سے سخی جن سے سوال ہوتا ہے

اے عطا کرنے والوں میں بہتر

یا اللہ یا اللہ یا اللہ !

تو نے فرمایا ہے کہ نوحؑ نے ہمیں پکارا تو ہم کیا ہی اچھے قبول کرنے والے ہیں ۔

پروردگار تو بہترین قبول کرنے والا۔

بہترین وہ جس سے دعا کی جائے۔

بہترین مسئول

میں تجھ سے تیری نورانیت کا سہارا دے کر

اور تیری عزّت و قدرت کے واسطے سے سوال کرتا ہوں ،

تیرے ملکوت کے واسطے سے، تیری محبوب زرہ کے واسطے سے،

تیرے تمام ارکان کے واسطے سے ، تیرے پیغمبرؐ

اور ان کے اوصیاء کے واسطے سے،

میں سوال کرتا ہوں کہ محمدؐ و آل محمدؐ پر رحمت نازل فرما اور میرے ساتھ بہترین برتاؤ کرنا

اے وہ خدا جس سے ہر خیر کی امید کی جاتی ہے

اور ہر شر کی منزل میں اس کی ناراضگی کا خوف رہتا ہے۔

اے قلیل عمل پر کثیر جزا دینے والے۔

اے خدا جو مانگنے والوں کو بھی

اپنی رحمت عنایت فرماتا ہے

اور نہ مانگنے والوں کو بھی عطا فرماتا ہے

محمدؐ وآل محمدؐ پر رحمت نازل فرما

اور میرے سوال کی بنا پر

دنیا و آخرت کا ہر خیر عنایت فرما دے۔

تیری عطا میں کوئی کمی نہیں ہے

اور پھر اس کے بعد اپنے فضل وکرم سے مزید عنایت فرما دے

خدایا میرے خیالات کو بلند فرمادے

اور کسی دشمن یا حاسد کو مجھ میں طمع نہ پیدا ہونے پائے ۔

اٹھتے بیٹھتے

سوتے جاگتے میری حفاظت فرما،

خدایا مجھے معاف کردے، مجھ پر رحم فرما،

مجھے اپنے سیدھے راستے کی ہدایت فرما

اور جہنّم کی آگ سے بچالے ۔

ہر نقصان اور ہر گناہ سے محفوظ فرما

اور اپنے بہترین بندوں میں قرار دے۔