اے ساتوں آسمان اور ان کے درمیان کی ہر شئے

اور عرشِ عظیم کے مالک۔

اے جبریل و میکائیل و اسرافیل کے مالک،

اے قرآن عظیم کے مالک،

اے خاتم النبیینؐ کے پروردگار،

میں تجھ سے سوال کرتا ہوں اس چیز کے سہارے سے

جس سے زمین و آسمان قائم ہیں ۔

وہ طاقت جس کے ذریعہ مجتمع چیزیں الگ ہوتی ہیں

اور متفرقات جمع ہوتی ہیں،

تمام زندوں کو روزی دی جاتی ہے

جس کے ذریعہ ریت کے ذرّوں کا

پہاڑ کے وزن کا

اور سمندر کے قطرات کا حساب ہوتا ہے۔

خدایا میرے دل کو اپنی محبّت، اپنے خوف، اپنی تصدیق ایمان اور اپنے شوق سے معمور کر دے۔ اے صاحب جلال و اکرام میری نگاہ میں اپنی ملاقات کو محبوب بنا دے۔ اس ملاقات میں میرے لیے بہترین رحمت اور برکت قرار دے اور مجھے سابقین سے ملحق کر دے۔ مجھے اشرار کے ساتھ نہ قرار دینا، ان لوگوں سے ملحق کر دینا جو مجھ سے پہلے نیک کردار گذر چکے ہیں اور میرے بعد نیک کردار آنے والے ہیں۔ مجھے نیکوں کے راستے پر چلانا اور میری ویسی ہی مدد کرنا جیسے نیک بندوں کی مدد ان کے نفس کے مقابلے میں کی ہے۔ جس برائی سے تو نے مجھے نکال لیا دوبارہ اس میں واپس نہ جانے دینا ۔ اے عالمین کے پروردگار میرا سوال اس ایمان کے بارے میں ہے جو تیری ملاقات سے پہلے تمام نہ ہونے پائے ۔ اسی پر زندہ رہوں ، اسی پر مر جاؤں اور اسی پر روزِ قیامت اٹھایا جاؤں ۔ میرے دل کو ریا کاری ، شک اور شبہات سے پاک و پاکیزہ کر دے، اپنے دین کے بارے میں میری مدد فرما ۔ عبادت کی قوّت اور تخلیق کو سمجھنے کی صلاحیت عطا فرما۔ اپنی رحمت سے تمام حصّے عطا فرما اور اپنے نور سے میرے چہرے کو روشن کر دے ۔ ثواب کی رغبت عطا فرما اور اپنے دین اور پیغمبرؐ کے راستے پر مجھے دنیا سے اٹھانا ۔ خدایا میں تیری پناہ چاہتا ہوں کسل مندی سے، بزدلی سے، کمزوری سے کنجوسی سے غفلت سنگدلی سستی اور فقیری سے اور اے خدا میں تیری پناہ چاہتا ہوں اس نفس کے مقابلے میں جو کبھی سیر نہ ہو، اس دل کے مقابلے میں جس میں خشوع و خضوع نہ ہو، اس دعا کے مقابلے میں جو قابل قبول نہ ہو، اس نماز کے مقابلہ میں جو فائدہ بخش نہ ہو ۔ میں تیری پناہ میں اپنے نفس کو اپنے اہل کو اور اپنی ذریّت کو دیتا ہوں کہ انھیں شیطان الرجیم سے محفوظ فرما۔ خدایا تیرے علاوہ مجھے کوئی پناہ دینے والا نہیں اور نہ میرا کوئی ٹھکانہ ہے۔ مجھے نظر انداز نہ کرنا۔ ہلاکت میں ڈال نہ دینا اور کسی عذاب کی طرف پلٹا نہ دینا۔ میں تجھ سے دین پر ثبات ، کتاب کی تصدیق اور پیغمبرؐ کے اتباع کا سوال کرتا ہوں ۔ خدایا مجھے اپنی رحمت سے یاد کرنا ، میری خطاؤں کو درگذر فرما میرے عمل کو قبول فرما اور اس میں اضافہ فرمادے اس لیے کہ میری توجہ تیری ہی طرف ہے، میری گفتگو اور میری نشست کا ثواب اپنی رضا کو قرار دے دے، میرے عمل اور میری دعا کو خالص بنادے اور میرے ثواب کو جنت قرار دے دے ۔ جو کچھ میں نے سوال کیا ہے سب عطا کردے بلکہ اپنے فضل سے اضافہ بھی کر دے اس لیے کہ میری توجہ تیری ہی طرف ہے۔ پروردگار اب ستارے ڈوب چکے ہیں، آنکھیں سو چکی ہیں فقط خدائے حی و قیوم ہے جس کے سامنے نہ کوئی رات پردہ ہے ، نہ کوئی آسمان ، نہ کوئی زمین ، نہ کوئی سمندر نہ تاریکیاں ۔ تو جسے چاہتا ہے رحمت عنایت فرما دیتا ہے۔ تو نگاہوں کی خیانت اور دل کے رازوں سے باخبر ہے ۔ میں ان تمام باتوں کی گواہی دیتا ہوں جن کی تو نے خود اپنے بارے میں گواہی دی ہے یا تیرے ملائکہ اور صاحبان علم نے گواہی دی ہے کہ تیرے علاوہ کوئی خدا نہیں ہے اور تو عظیم و حکیم ہے اور اگر کسی نے ان باتوں کی شہادت نہیں دی ہے تو میری شہادت کو اس کی شہادت کی جگہ پر لکھ لے ۔ خدایا تو سلام ہے، تیری طرف سے سلامتی ہے ۔ اے صاحبِ جلال و اکرام میرا ایک سوال ہے کہ میری گردن کو آتشِ جہنّم سے آزاد کردے

خدایا میرا سوال امن، ایمان،

پیغمبرؐ کی تصدیق،

ہر بلا سے عافیت

اور ہر عافیت پر شکر کے بارے میں ہے

اور مجھے بدترین لوگوں سے بے نیاز بنا دے ۔

شروع کرتا ہوں خدا کے نام سے جو بڑا مہربان اور نہایت رحم کرنے والا ہے میں اس بات کی شہادت دیتا ہوں کہ اللہ کے علاوہ کوئی خدا نہیں ہے۔ حضرت محمدؐ اس کے بندے اور رسول ہیں ۔ اللہ پر اور تمام رسولوں پر اور تمام الٰہی تعلیمات پر جو رسول پر نازل ہوئیں، سب پر ایمان لایا۔ اللہ کا وعدہ سچّا ہے اور اس کی ملاقات برحق ہے ۔ اس نے سچ فرمایا ہے اور مرسلین نے اس کے پیغام کو صحیح پہنچایا ہے ساری حمد اللہ کے لیے ہے جو رب العالمین ہے ۔ میں اس کی تسبیح کرتا ہوں جیسا کہ کوئی شئے اس کی تسبیح کرتی ہے اور جس طرح وہ تسبیح کو پسند کرتا ہے۔ میں اس کی حمد کرتا ہوں جیسے بھی کوئی شئے حمد کرتی ہے اور جس طرح وہ حمد کو پسند کرتا ہے میں اس کی تہلیل کرتا ہوں جیسے بھی کوئی شئے تہلیل کرتی ہے اور اسی طرح تحلیل کرتا ہوں جس طرح وہ پسند کرتا ہے ۔ میں اس کی کبریائی کا اقرار کرتا ہوں جیسے بھی کوئی شئے اقرار کرتی ہے اور اسی طرح جس طرح وہ پسند کرتا ہے۔ خدایا میں ہرشئے کے آغاز و انجام اور اس کے تمام و کمال اور اس کے فوائد و برکات کا سوال کرتا ہوں ۔ جہاں تک میرے علم کی رسائی ہے اور جہاں تک رسائی نہیں ہے۔ خدایا مجھے معرفت کے راستے پر چلادے اس کے دروازوں کو کھول دے اپنی رحمت کی برکات سے مجھے ڈھانک لے، مجھ پر احسان فرما۔ تو مجھے دین میں لغزش سے بچالے، میرے دل کو شک سے پاک کردے میرے دل کو دنیا میں اور دنیا کی معاشیات میں مبتلا کر کے آخرت سے غافل نہ ہونے دینا۔ میرے دل کو مشغول کر دے ان چیزوں کو محفوظ رکھنے میں جن کی جہالت قابلِ معافی نہیں ہے۔ میری زبان کو خیر کے لیے ہموار کر دے ، میرے دل کو ریا کاری سے پاک کر دے ۔ میرے عمل کو خالص بنادے۔ خدایا میں تیری پناہ چاہتا ہوں شر سے اور طرح کے جرم سے، ظاہر و باطن اور تمام غفلتوں سے اور تمام ان چیزوں سے جو شیطان مجھ سے چاہتا ہے یا ظالم بادشاہ چاہتے ہیں ، تو سب کو جانتا بھی ہے اور سب سے بچا بھی سکتا ہے۔ خدایا میں تیری پناہ چاہتا ہوں جن وانس کے تمام حوادث سے ، ان کے مہلکات سے ان کے کید و مکر سے اور فاسقوں کے مراکز سے اور اس بات سے کہ دین میں لغزش نہ پیدا ہو جائے کہ آخرت خراب ہو جائے اور یہ میرے لیے ضرر کا باعث ہو جائے یا کوئی بلا ایسی نازل ہو جائے جو ظالموں کی طرف سے مجھ پر وارد ہو اور میں اس کا دفاع نہ کر سکوں اور نہ میں اسے برداشت کر سکوں ایسی کسی مصیبت میں مجھے مبتلا نہ کرنا کہ میں تیری یاد سے غافل ہو جاؤں یا تیری عبادت سے غافل ہو جاؤں ۔ تو بہترین محافظ، دفاع کرنے والا اور ہر بلا سے بچانے والا ہے ۔ خدایا میں جب تک زندہ رہوں تجھ سے معیشت میں رفاہیت کا سوال کرتا ہوں لیکن ایسی معیشت جس سے اطاعت کی طاقت پیدا ہو، تیری رضا حاصل کر سکوں اور کل جنّت تک پہنچ سکوں ۔ ایسا رزق نہ دینا جس سے سرکشی پیدا ہو جائے فقیری میں مبتلا نہ کر دینا کہ تنگی کا شکار ہو جاؤں۔ آخرت می بہترین حصّہ عطا فرمانا اور دنیا میں خوش گوار معیشت عطا فرمانا نہ اس دنیا کو میرے واسطے قید خانہ بنا دے اور نہ اس کے فراق کو باعثِ رنج قرار دینا ۔ مجھے اس کے فتنے سے محفوظ رکھنا میرے عمل کو مقبول بنا دے۔ میری سعی کو مشکور بنادے اور جو بھی میرے بارے میں کوئی برائی چاہتا ہے تو اسے اسی برائی میں مبتلا کر دے اور جو مجھ سے مکر کرتا ہے اس مکر کو اسی کی طرف پلٹا دے اگر کوئی شخص مجھ پر ہم وغم کو وارد کرنا چاہتا ہے تو اسے موت دے اور اگر کوئی مجھ سے مکر کرنا چاہتا ہے تو اس کو اس کی سزادے کہ تو بہترین تدبیر کرنے والا ہے۔ خدایا کافروں اور ظالموں ، باغیوں اور حاسدوں کی آنکھوں کو بند کردے میرے اوپر سکون و وقار نازل فرما ۔ مجھے اپنی مضبوط گرہ عطا فرما اور مجھے اپنی حفاظت میں لے لے ۔ عافیت عطا فرما اور فعل کی صداقت اور اولاد اور مال و اہل میں برکت عطا فرما۔ خدایا میرے قبل و بعد اور وہ تمام چیزیں جن سے میں راضی ہوں یا جن کا میں نے ارادہ کیا ہے جن میں سستی کی ہے یا جن کا اعلان کیا ہے یا جن کا اظہار کیا ہے ان تمام برائیوں کو معاف فرما دے کہ تو ارحم الراحمین ہے۔

خدایا میرے رزق میں وسعت عطا فرما

میری عمر کو طویل فرما۔

میرے گناہوں کو معاف فرما

اور مجھے ان لوگوں میں قرار دے جو دین کے مدد گار ہوں

اور اس مسئلہ میں کسی کو میرا بدل نہ قرار دینا ہے

وہ خدا جو معمولی عمل کو قبول کرتا ہے

اور بڑے گناہوں کو معاف کرتا ہے ۔

وہ غفورو رحیم ہے۔

میرے ان گناہوں کو معاف کردے

جن کی لذّت تو ختم ہوگئی لیکن ان کا اثر باقی ہے۔

اے نور اے پاکیزہ صفات،

اے تمام اوّلین سے اوّل،

اے تمام آخرین کے بعد رہنے والے

اے رحمن و رحیم

میرے ان گناہوں کو معاف کر دے جو نعمتوں کو بدل دیتے ہیں

اور ان گناہوں کو معاف کر دے جو عذاب کو نازل کر دیتے ہیں،

ان گناہوں کو معاف کردے جن سے عزّت خطرے میں پڑ جاتی ہے،

ان گناہوں کو معاف کر دے جن سے بلائیں نازل ہوتی ہیں،

ان گناہوں کو معاف کر دے جن سے دشمنوں کو اختیار حاصل ہوتا ہے،

ان گناہوں کو معاف کر دے جن سے انسان فنا ہو جاتا ہے،

ان گناہوں کو معاف کر دے جن سے امید قطع ہو جاتی ہے،

ان گناہوں کو معاف کر دے جن سے فضاء تاریک ہو جاتی ہے،

ان گناہوں کو معاف کر دے جو پردے اٹھا دیتے ہیں

اور ان گناہوں کو معاف کر دے جو دعاؤں کو پلٹا دیتے ہیں۔

ان گناہوں کو معاف کردے جن سے بارش رُک جاتی ہے۔

اے رنج و کرب میں میرے سہارے

اور شدّت میں میرے ساتھی،

اے نعمت میں میرے مالک،

اے مصیبت میں میرے فریاد رس۔

پروردگار تو نے تمام آثار کو لکھ لیا ہے،

تو تمام اخبار کو جانتا ہے،

اسرار کو پہچانتا ہے ۔

تو ہمارے درمیان اور ہمارے دلوں کے درمیان حائل ہو جاتا ہے

راز تیرے پاس ہے راز تیری بارگاہ میں واضح ہیں۔

قلوب تیری بارگاہ میں حاضر ہیں۔

تو جس چیز کا ارادہ کرلیا ہے

وہ بہرحال ہوجاتی ہے۔

لہٰذا اپنی اطاعت کو

میرے پورے وجود میں شامل کر دے

اور ہمیں اس سے تاروزِ قیامت الگ نہ ہونے پاؤں

معصیت کو میرے سارے

وجود سے الگ کردے

اور قیامت تک مجھ سے قریب نہ آنے پائیں ۔

مجھے مال ِ دنیا دے اور اس سے بے پروا کر دے۔

اور مجھ سے دور نہ کر جب میں اسے چاہوں اے بڑے رحم کرنے والے ۔

حمد اللہ کے لئے جو حمد کا مالک ہےوہ اس کا اہل ہے اس کی انتہا اور مقام ہے وہ کھرا ہے جو اسے یکتا جانے وہ ہدایت پا گیا جس نے اس کی عبادت کی کامیاب ہوا جس نے اطاعت کی اس نے امان پائی جو اس کی پنا ہ میں آیا اے معبود! تو سخاوت شان اور بہترین تعریف و خوبی کا مالک ہے۔ تجھ سے سوال کرتا ہوں اس سوالی کی طرح جو تیرے آگے پوری طرح جھکا ہوا ہے تیرے سامنے ناک رگڑتا ہے تیرے لئے منہ پر خاک ملی ہے تیرےسامنے پست ہوا تیرے خوف سے اس کے آنسو نکل کر اس کے رخساروں پر بہ رہے ہیں تیرے سامنے اپنے گناہوں کا اقراری ہے اس کی خطاؤں نے اس کو تیرے سامنے رسوا کیا اس کے جرائم نے اسے تیرے سامنے داغدار کیا تو ایسے میں اس کی طاقت جواب دے گئی اس کی تدبیریں ناکام ہوئیں اس کے قریب کے اسباب قطع ہوگئے اس کا ہر باطل عمل ماند پڑ گیا اس کے گناہوں نے اس کو پست مقام پر پھینک دیا جہاں تیرے سامنے پڑا ہے اس کے گریہ و زاری نے اسے تیرے آگے جھکا دیا ہے تجھ سے سوال کرتا ہوں اے معبود !اس کے مانند جو ایسے شخص کی جگہ پر ہو تیری طرف رغبت کرتا ہوں تیرے آگے اس سے زیادہ نالہ کرتا ہوں تیرےسامنے اس سے زیادہ گڑ گڑاتا ہوں اے معبود! پس رحم فرما میری گفتار کی کمزوری پر میرے مقام کی پستی پر میری نشست پر اور تیرے آگے جو عاجزی کی ہے اس پر رحم کر سوال کرتا ہوں تجھ سے اے معبود کہ گمراہی میں ہدایت دے کم نظری میں بینائی عطا کر اور بے راہی میں سیدھی راہ پہ ڈال دے سوال کرتا ہوں اے معبود کہ خوش حالی میں تیری زیادہ حمد کروں مصیبت کے وقت اچھے طریقے سے صبر کروں شکر کے موقع پر بہتر سے بہتر انداز میں شکر ادا کروں شبہ کے وقت تیرے آگے جھک جاؤں۔میں تیری بندگی کے لئے طاقت مانگتا ہوں گناہوں میں کمزوری چاہتا ہوں تجھ سےڈر کے تیری طرف آنا چاہتا ہوں تیرے نزدیک آنا چاہتا ہوں اے پروردگار ایسی جستجو مانگتا ہوں جو اس چیز کے لیے ہو جو تجھ کو مجھ سے خوشنود کرے جب کہ دوسرے لوگ مجھ پر ناراض ہوں تیری خوشنودی کا طالب ہوں پروردگاراگر تو مجھ پر رحم نہ کرے تو کس سے امید رکھو ں یا اگر دھتکاردے تو کون میری طرف توجہ کرے گا یااگر تو مجھے سزا دے تو کس کی معافی میرے کام آئے گی یا اگر تومجھے محروم کرے توکس کی عطاؤں کی آرزو کروں گا یا اگر تو مجھے پست کرے تو کون مجھے عزت دار بنائے گا۔یا اگر تو مجھے عزت بخشے توکون میری توہین کر سکتا ہے پروردگار میرے فعل کتنے برے ہیں میرا عمل کتنا ناپسندیدہ ہے میرا دل کیسا سخت ہے میری آرزو کتنی لمبی ہے میری مدّت ِعمر کتنی کم ہے پیدا کرنے والےمجھے گناہوں پر کتنادلیر بنا دیا ہے۔ پروردگار میری طرف تیری آزمائش کیسی اچھی ہے مجھ پر تیری نعمتیں کس قدر نمایا ں ہیں مجھ پر تیری اتنی زیادہ نعمتیں ہیں کہ میں انہیں شمار نہیں کر سکتا اور ان پر میرا شکر کتنا کم ہے اس لئے میں نعمتوں پر مغرور ہو گیا ہوں عذاب کے سامنے آکھڑا ہوں میں تیری یاد چھوڑ بیٹھا ہوں میں علم رکھتے ہوئے نادانی کی سواری پر سوار ہوگیا ہوں میں عدل سے منہ موڑ کر ظلم کی طرف چل نکلا ہوں نیکی سے گزر کر گناہوں تک پہنچ گیاہوں اور خوف اور اندیشہ چھوڑ کر خوش وقتی میں لگ گیا ہوں پس کتنی چھوٹی اور کم ترہیں میری نیکیاں جب کہ میرے گناہ بہت زیادہ ہیں کتنے بڑے ہیں میرے گناہ جب کہ میری عمر کم ہے اور اعضاء بدن کمزور ہیں پروردگار میری مدت عمرکتنی کم ہے اور میری آرزو کتنی لمبی ہے میری عمر کی کوتا ہی میں بھی آرزو کتنی لمبی ہے ۔ میرے ظاہر کے مقابل میرا باطن کس قدر آلودہ ہے پروردگار اگر میں اس پر دلیل لاؤں تو میرے پاس کوئی دلیل نہیں اور اگر عذر کرنے لگوں تو میرے پاس کوئی عذر نہیں اگر سختی میں پڑوں تو میں اس پر شکر نہیں کرتا اور اگر تو مجھے شکر کرنے کی تو فیق نہ دے تو میں تیرا شکر ادا نہیں کر پاتا ۔ میرے پروردگار کل قیامت میں میرامیزان عمل کتنا ہلکا ہوگا اور اگر تو اسے بھاری نہ بنائے میری زبان تتلائے گی اگر تو اسے ثابت نہ رکھے اور کتنا سیاہ ہو گا میراچہرہ اگر تو اسےروشن نہ کرے پالنے والے میرے ان گناہوں کا کیا بنے گا جو میں کر چکا ہوں جن کے بوجھ سے میرے اعضا ٹوٹ گئے ہیں پالنے والے میں دنیاوی خواہشوں کے پیچھے کیوں کر جاتا ہوں جب کہ ان میں ناکامی پر رو رہا ہوں مگر میں اپنے گناہوں اورنافرمانیوں کی حسرت رکھتا ہوں اور ان پر گریہ و زاری نہیں کرتا پالنے والے دنیاکی خواہشوں نے پکارا تو میں ان کی طرف لپک کر چلا گیا ان کا کہنا مانا اور ان کی طرف جھک پڑا اور آخرت کی حاجات نے آواز دی تو میں ڈھیلا ہوگیا اور انہیں قبول کرنے میں سستی سے کام لیا جب کہ دنیا کی پکار پر اس طرف جانے میں جلدی کی تھی۔ میں دنیا کی رنگینیوں اور ناپائیدار سامان ٹوٹی ہوئی بے کار شاخ اور جھوٹے سراب پر ریجھ[مائل ہو] گیا اے پروردگار! تونے مجھے ڈرایا اور شوق بھی دلایا تو نے میرے بندے ہونے پر دلیل ٹھہرائی میری روزی کا ذمہ داربنا لیکن میں نے تیرا خوف بھلا دیا تیرے شوق کی طرف سے منہ موڑ لیا تیری ذمہ داری پر بھروسہ نہ کیا تیری قائم کی ہوئی دلیل کو کم تر جانا پس اے معبود! اس دنیا میں جو میں تیری طرف سے مطمئن ہوں تو اسے خوف میں بدل دے میری سستی کو شوق میں بدل دے میں نے تیری دلیل کو کمتر جانا تو اسے لحاظ میں بدل دے پھر مجھے رزق کی تقسیم پرراضی فرما جو تو نے کی ہے۔ اے سخی میں تیرے باعظمت نام پر تیری خوشنودی مانگتا ہوں تیری ناراضگی کے وقت اورکشائش وآسائش چاہتا ہوں سختی میں سوال ہے تاریکی کے وقت نور کا اور شبہ کے فتنے میں سمجھ داری کا پروردگار میری خطاؤں کے لئے محکم ڈھال بنا دےجنت میں میرے درجات بلند کر دے میرے تمام اعمال قبول فرما اور میری نیکیوں کو دگنا اورخالص بنا دے میں تیری پناہ لیتاہوں تمام فتنوں میں جو ان میں سے ظاہر ہیں اور جو پوشیدہ ہیں حد سے بڑھ کر کھانے پینے سے ہر اس چیز کے شر سے جسے جانتا ہوں اور جسے نہیں جانتاتیری پناہ لیتا ہوں اس سے کہ علم کے بدلے جہالت حاصل کروں بردباری کے بدلےسختی عدل کے بدلے ظلم خوش کرداری کے بدلے بد سلوکی صبر کے بدلے بے تابی یا ہدایت کے بدلے گمراہی یا ایمان کے بدلے کفر خرید کروں ۔