Həzrət Rəsulallahın (s) buyurduğu bu duanı oxu: Bu duanı oxumağın savabı barədə o həzrət buyurmuşdur ki, kim bu duanı Ərəfə gecəsi və ya cümə gecəsi oxusa, Allah onu bağışlayar:

<font color="000000"><b>Ey Allahım, ey hər sirri bilən, hər şikayətin yeri, hər gizlini bilən və hər diləyin sonu; ey bəndələrə neməti başlayan, ey əfv kərimi, ey yaxşı güzəşt edən və ey səxavətli; ey o kəs ki, nə qaranlıq gecə, nə dalğalanan dərya, nə bürcləri olan səma və nə də bir-birinə qarışmış zülmətlər Ondan nəyisə gizlədə bilər; ey o kəs ki, qaranlıqlar Onun qarşısında işıqlıdır! Səndən istəyirəm Sənin kərim zatının nuruna xatir: o nur ki, onunla dağa təcəlla etdin və onu parçaladın, Musa da qəşş edib yerə yıxıldı; (Səndən istəyirəm) o adına xatir ki, onunla asimanları sütunsuz ucaltdın və yeri donmuş suyun üzərində açdın; (Səndən istəyirəm) o adına xatir ki, Sənin dərgahında xəzinədə və pərdədədir, yazılmış və pakizədir: o ad ki, Səni o adla çağırdıqda cavab verirsən və Səndən o adla hacət istədikdə əta edirsən; (Səndən istəyirəm) o münəzzəh, müqəddəs və bürhan adına xatir ki, hər nura nurdur, hər nurdan nurdur və hər nur ondan nur alır: (bu nur) yerə çatdıqda yarılır, səmalara çatdıqda açılır və ərşə çatdıqda titrəyir; (Səndən istəyirəm) o adına xatir ki, mələklərin vücudu ondan lərzəyə düşür. Səndən istəyirəm Cəbrailin, Mikailin və İsrafilin haqqına xatir, Məhəmməd Mustəfanın haqqına xatir, Allahın salamı olsun ona və onun xanidanına, bütün peyğəmbərlərə və mələklərə; (Səndən istəyirəm) o ada xatir ki, Həzrət Xızır onun vasitəsilə düz yerdə yol getdiyi kimi dəryanın dalğaları üzərində yeridi; (Səndən istəyirəm) o adına xatir ki, onunla Musa üçün dəryanı yardın və Fironu qövmü ilə birlikdə qərq etdin, onunla Musa ibn İmrana ətrafındakılarla birlikdə nicat verdin; (Səndən istəyirəm) o adına xatir ki, Musa ibn İmran Tur dağının sağ tərəfindən onunla Səni çağırdı və Sən ona cavab verdin, Öz məhəbbətini onun qəlbinə saldın; (Səndən istəyirəm) o adına xatir ki, İsa ibn Məryəm onunla ölüləri diriltdi, uşaq ikən beşikdə danışdı, anadangəlmə korluğa və bərəs xəstəliyinə Sənin izninlə şəfa verdi; (Səndən istəyirəm) o adına xatir ki, ərşini daşıyanlar, Cəbrail, Mikail və İsrafil, Sənin həbibin Məhəmməd – Allahın salamı olsun ona və xanidanına! -, Sənin yaxın mələklərin, göndərdiyin peyğəmbərlər, göylər və yerlərin əhlindən olan saleh bəndələrin onunla Səni çağırdılar; (Səndən istəyirəm) o adına xatir ki, Yunis qəzəbli halda gedərkən Səni onunla çağırdı və güman etdi ki, Sən onu sıxışdırmazsan, bu vaxt o Səni zülmətlərdə çağırdı: "Səndən qeyri İlah yoxdur, Sən münəzzəhsən və mən həqiqətən zülmkarlardanam." Sən də cavab verdin və onu qəm-qüssədən qurtardın, Sən möminlərə belə nicat verirsən; (Səndən istəyirəm) o əzəmətli adına xatir ki, Davud onunla Səni çağırdı və Sənin qarşında səcdəyə qapıldı, beləliklə, Sən onun günahını bağışladın; (Səndən istəyirəm) o adına xatir ki, Fironun zövcəsi Asiya onunla Səni çağırdı və dedi: "Ey Rəbbim, Öz yanında Cənnətdə mənim üçün bir ev tik, mənə Firondan və onun əməllərindən nicat ver, mənə zalım qövmün əlindən nicat ver." Beləliklə, onun duasını qəbul etdin; (Səndən istəyirəm) o adına xatir ki, bəla nazil olduğu vaxt Əyyub onunla Səni çağırdı, beləliklə, Sən onu sağaltdın və onun camaatını, həmçinin onlara bənzərləri ona qaytardın: Öz tərəfindən bir rəhmət və ibadətkarlara öyüd-nəsihət olaraq; (Səndən istəyirəm) o adına xatir ki, Yəqub onunla Səni çağırdı, beləliklə, Sən onun görmə qabiliyyətini və gözünün nuru olan Yusifi ona geri qaytardın, pərişanlığını aradan qaldırdın; (Səndən istəyirəm) o adına xatir ki, Süleyman onunla Səni çağırdı və Sən ona elə bir səltənət bəxş etdin ki, ondan sonra kimsə belə bir səltənətə çatmadı, həqiqətən Sən çox bəxş edənsən; (Səndən istəyirəm) o adına xatir ki, onunla Büraqı Məhəmməd üçün – Allahın salamı olsun ona və xanidanına! – ram etdin və buyurdun: "Münəzzəhdir o kəs ki, gecə Öz bəndəsini Məscidul-həramdan Məscidul-əqsaya apardı." Həmçinin buyurdun: "Münəzzəhdir o kəs ki, bunu bizim üçün ram etdi, yoxsa bizim onu ram etməyə gücümüz yox idi, biz Rəbbimizə tərəf qayıdacağıq."; (Səndən istəyirəm) o adına xatir ki, onunla Cəbrail Məhəmmədə - Allahın salamı olsun ona və xanidanına! – nazil olurdu; (Səndən istəyirəm) o adına xatir ki, Adəm onunla Səni çağırdı və Sən onun günahlarını bağışladın, Cənnətdə ona yer verdin.Səndən istəyirəm əzəmətli Quranın haqqına xatir, peyğəmbərlərin sonuncusu Məhəmmədin haqqına xatir, İbrahimin haqqına xatir, mühakimə günü haqqı batildən ayırmağının haqqına xatir, quruldu vaxt mizanların və açıldığı vaxt namələrin haqqına xatir, qələmin və onun yazdığının, lövhün və onun saydığının haqqına xatir, o adının haqqına xatir ki, insanları, dünyanı, günəşi və ayı xəlq etməzdən min illər əvvəl onu ərşin pərdələri üzərinə yazdın; şəhadət verirəm ki, Allahdan qeyri ilah yoxdur, yeganədir və şəriki yoxdur, Məhəmməd Onun bəndəsi və elçisidir. Səndən istəyirəm xəzinələrində qorunan o adına xatir ki, dərgahındaki qeyb elmində onu Özünə xas etmisən və məxluqatından heç kim ondan agah deyillər: nə bir müqərrəb mələk, nə bir göndərilmiş elçi və nə də seçilmiş bir bəndə. Səndən istəyirəm o adına xatir ki, onunla dəryaları yardın, dağlar dirçəldi və gecə-gündüz bir-birini əvəz etdi; (Səndən istəyirəm) "səb`ul-məsani" (Fatihə surəsi) və əzəmətli Quranın haqqına xatir, girami yazarların haqqına xatir, "Taha", "Yasin", "Kəf-hə-yə-əyn-sad" və "Ha-mim-əyn-sin-qaf"ın haqqına xatir, Musanın Tövratı, İsanın İncili, Davudun Zəburu və Məhəmmədin Furqanının haqqına xatir – salam olsun ona və onun xanidanına, bütün peyğəmbərlərə -, Ahi və Şərahinin (iki əzəmətli adın və ya din böyüklərindən ikisinin) haqqına xatir. Ey Allahım, Səndən istəyirəm o minacatın haqqına xatir ki, Sina dağının başında Səninlə Musa ibn İmran arasında oldu; Səndən istəyirəm o adına xatir ki, canları almaq üçün onu ölüm mələyinə öyrətdin; Səndən istəyirəm o adına xatir ki, zeytun yarpağının üzərində yazılmışdır və od bu adın qarşısında kiçilmiş, qısılmışdır, Sən buyurdun: "Ey od, soyuq və səlamət ol!"; Səndən istəyirəm o adına xatir ki, ucalıq və kəramət pərdələrində onu yazdın. Ey o kəs ki, (dilək) diləyən Onu çarəsiz qoymaz və bəxş etmək Ondan nəyisə azaltmaz! Ey o kəs ki, Ondan kömək istənilir və Ona pənah aparılır! Səndən istəyirəm ərşinin izzətinin səbəbinə və Kitabından rəhmətinin son həddinə xatir; (Səndən istəyirəm) ən əzəmətli adına, ən uca məqamına, kamil və uca kəlmələrinə xatir. Ey Allahım, ey küləklərin və onların pərakəndə etdiklərinin Rəbbi, ey səmanın və onun kölgə saldıqlarının Rəbbi, ey yerin və onda olanların Rəbbi, ey şeytanların və onların azdırdıqlarının Rəbbi, ey dəryaların və onların özü ilə cari etdiklərinin Rəbbi! Sənin üzərində olan hər haqqın haqqına xatir; müqərrəb mələklərin, rövhanilərin və kərubilərin, süstlük etmədən gecə və gündüz Sənə təsbih deyənlərin haqqına xatir; Sənin xəlilin İbrahimin haqqına xatir; Səfa və Mərvə arasında Səni çağıran və Sənin də ona cavab verdiyin hər dostunun haqqına xatir. Ey icabət edən (cavab verən), Səndən istəyirəm bu adların və bu duaların haqqına xatir ki, əvvəllər işlətdiyimiz və sonralar işlədəcəyimiz, gizlətdiyimiz və aşkar etdiyimiz, zahir etdiyimiz və məxfi sağladığımız, Sənin bizdən daha yaxşı bildiyin günahlarımızı bağışla, həqiqətən Sən hər şeyə qadirsən, Öz rəhmətinə xatir ey rəhimlilərin ən rəhimlisi. Ey hər qəribi qoruyan, ey hər tənhanın həmdəmi, ey zəifin qüvvəsi, ey hər məzlumun köməyi, ey hər məhrumun ruzi verəni, ey hər qorxanın munisi, ey müsafirin yol yoldaşı, ey öz vətənində olanın dayağı, ey hər günah və xətanı bağışlayan, ey köməyə çağıranların köməyinə çatan, ey dada çağıranların dadına çatan, ey kədərlilərin kədərini aradan aparan, ey qəmlilərin qəmini dağıdan, ey göyləri və yerləri vücuda gətirən, ey axtaranların məqsədinin sonu, ey çarəsizlərin səsinə cavab verən, ey rəhimlilərin ən rəhimlisi, ey aləmlərin Rəbbi, ey din günündə əvəz verən, ey səxavətlilərin ən səxavətlisi, ey kərimlərin ən kərimi, ey eşidənlərin ən yaxşı eşidəni, ey görənlərin ən yaxşı görəni, ey qüdrətlilərin ən qüdrətisi! Bağışla mənim o günahlarımı ki, nemətləri dəyişdirir; bağışla mənim o günahlarımı ki, peşmançılıq gətirir; bağışla mənim o günahlarımı ki, xəstəliklərə səbəb olur; bağışla mənim o günahlarımı ki, pərdələri yartır; bağışla mənim o günahlarımı ki, duaları geri qaytarır; bağışla mənim o günahlarımı ki, səmada yağışın qarşısını alır; bağışla mənim o günahlarımı ki, fani olmağı sürətləndirir; bağışla mənim o günahlarımı ki, bədbəxtçilik gətirir; bağışla mənim o günahlarımı ki, havanı qaraldır; bağışla mənim o günahlarımı ki, pərdələri yuxarı qaldırır; bağışla mənim o günahlarımı ki, Səndən qeyri kimsə onları bağışlamır, ey Allah! Xəlqindən hər birinin haqqını mənim çiynimdən götür, işimdə mənim üçün açıq yol, asanlıq və çıxış yolu qərar ver, yəqinini sinəmə və ümidini qəlbimə endir, ta ki, Səndən qeyrisinə ümid bağlamayım. Ey Allahım, öz yerimdə məni qoru və mənə salamtlıq ver; gecə və gündüz, öndən və arxadan, sağdan və soldan, yuxarıdan və aşağıdan mənimlə birgə ol; yolu mənim üçün hamar et, qarşıma gözəl asanlıq çıxar və çətinliklərdə məni xar etmə; ey ən yaxşı bələdçi, məni hidayət et, işlərdə məni öz öhdəmə buraxma və hər sevinci qəlbimə sal; dünya və axirətdə məni öz ailəmin yanına nicat tapmış, bəhrələnmiş və sevinc içində olduğum bir halda qaytar, həqiqətən Sən hər şeyə qadirsən; Öz fəzlindən mənə ruzi et və pak ruzilərini mənə bol et; məni Sənə itaətə vadar et, Öz əzabından və cəhənnəmin odundan mənə pənah ver, bu dünyadan məni Öz cənnətinə tərəf apardıqda məni Öz rəhmətinə qaytar. Ey Allahım, nemətinin zəvala uğramasından, afiyətinin dəyişməsindən, cəzanın gəlməsindən və əzabının nazil olmasından Sənə pənah aparıram; bəlanın çətinliyindən, bədbəxtliyin özünü çatdırmasından, pis müqəddəratdan, düşmənlərin qınağından, səmadan nazil olan hər şərdən və nazil olan Kitabında (Quranda) bəyan etdiyin hər şərdən Sənə pənah aparıram. Ey Allahım, məni şər insanlardan və cəhənnəm əhlindən qərar vermə; yaxşı insanlarla birlikdə olmaqdan məni məhrum etmə; məni pakizə həyatla yaşat və pakizə ölümlə öldür, ta ki yaxşı əməl sahiblərinə qovuşum; qüdrətli bir padşahlıqda bəyənilən bir məqamda peyğəmbərlərlə dostluğu mənə ruzi et. Ey Allahım, gözəl sınağın və gözəl rəftarına görə həmd-səna Sənə məxsusdur, İslam dininə və (Peyğəmbərin) sünnəsinə görə həmd-səna Sənə məxsusdur; ey Rəbbim, necə ki, peyğəmbərləri Öz dininə hidayət etdin və Öz Kitabını onlara öyrətdin, bizi də hidayət et və bizə də öyrət. Mənim barəmdə olan gözəl sınağın və rəftarına görə həmd-səna Sənə məxsusdur, belə ki, Sən məni xəlq etdin və xilqətimi gözəlləşdirdin, mənə öyrətdin və gözəl öyrətdin, məni hidayət etdin və gözəl hidayət etdin. Qədimdə və indi mənə bəxş etdiyin nemətlərə görə həmd-səna Sənə məxsusdur. Ey Ağam, Sən mənim nə qədər kədərimi aradan apardın; ey Ağam, Sən mənim nə qədər qəm-qüssəmi dağıtdın; ey Ağam, Sən mənim nə qədər çətinliyimi aradan qaldırdın; ey Ağam, Sən mənim nə qədər eyibimi örtdün. Bütün məkanlarda və zamanlarda, bütün mənzillərdə və məqamlarda bütün hallarda, bu halda və hər bir halda həmd-səna Sənə məxsusdur. Ey Allahım, bu gündə qismət etdiyin xeyirdən, aradan apardığın zərərdən, geri qaytardığın pis hadisədən, uzaqlaşdırdığın bəladan, göndərdiyin xeyirdən, açdığın rəhmətdən və geyindirdiyin salamatlıq libasından bəhrələnməkdə məni ən üstün bəndələrindən qərar ver; həqiqətən Sən hər şeyə qadirsən, göylərin və yerin xəzinələri Sənin əlindədir, Sən o yeganə, kərim və əta edən Allahsan ki, Səndən diləyəni əliboş geri qaytarmırsan, Səni arzu edəni naümid etmirsən, Sənin ətalarında nöqsan yoxdur, Sənin xəzinən tükənməzdir, hətta hər zaman çoxluğu, pakizəliyi, ətanı və səxavəti artırırsan; fani olmayan xəzinəndən və geniş rəhmətindən mənə ruzi et, həqiqətən Sənin ətan kimsəyə yasaq olunmayıbdır, Sən hər şeyə qadirsən, Öz rəhmətinə xatir ey rəhimlilərin ən rəhimlisi. </b></font>