Du'a 20: Paakeezah Akhlaaq se Aaraastagi ki Du'a

Ae Allah! Muhammad aur un ki Aal par rehmat nazil farma aur mere iman ko kamil tareen iman ki had tak pahuncha de aur mere yaqeen ko behtareen yaqeen qarar de aur meri niyat ko pasandida tareen niyat aur mere aamal ko behtareen aamal ke paya tak buland kar de. Khudawanda! Apne lutf se meri niyat ko khalis-o-be-riya aur apni rehmat se mere yaqeen ko istwar aur apni quddrat se meri kharabiyon ki islah kar de. Bar-ilaha! Muhammad aur un ki Aal par rehmat nazil farma aur mujhe un masroofiyaton se jo ibadat mein manay hain be-niyaz kar de aur unhi cheezon par amal-paira hone ki taufiq de jin ke baare mein mujh se kal ke din sawal kare ga, aur mere ayyam-e-zindagi ko gharz-e-khilqat ki anjam-dahi ke liye makhsoos kar de. Aur mujhe (doosron se) be-niyaz kar de aur mere rizq mein kushaish-o-wusat ata farma. Ehtiyaj-o-dast-nagari mein mubtala na kar. Izzat-o-tauqir de, kibr-o-ghuroor se dochaar na hone de. Mere nafs ko bandagi-o-ibadat ke liye raam kar aur khud-pasandi se meri ibadat ko fasid na hone de aur mere hathon se logon ko faiz pahuncha aur usay ehsan jatane se raigan na hone de. Mujhe buland paya akhlaq marhamat farma aur ghuroor aur tafaakhur se mehfooz rakh.

Bar-ilaha! Muhammad aur un ki Aal par rehmat nazil farma aur logon mein mera darja jitna buland kare utna hi mujhe khud apni nazron mein past kar de aur jitni zahiri izzat mujhe de utna hi mere nafs mein batini be-waqti ka ehsas paida kar de. Bar-ilaha! Muhammad aur un ki Aal par rehmat nazil farma aur mujhe aisi naik hidayat se bahra-mand farma ke jisay doosri cheez se tabdeel na karoon aur aise sahih raste par laga jis se kabhi munh na modoon, aur aisi pukhta niyat de jis mein zara shubha na karoon aur jab tak meri zindagi teri itaat-o-farmanbardari ke kaam aaye mujhe zinda rakh aur jab woh shaitan ki charagah ban jaye to us se pehle ke teri narazgi se sabqa pade ya tera ghazab mujh par yaqeeni ho jaye mujhe apni taraf utha le. Ae maabood! Koi aisi khaslat jo mere liye mayoob samjhi jati ho us ki islah kiye baghair na chhod aur koi aisi buri aadat jis par meri sarzanish ki ja sakay, usay durust kiye baghair na rehne de aur jo pakeeza khaslat abhi mujh mein natamam ho usay takmeel tak pahuncha de.

Ae Allah! Rehmat nazil farma Muhammad (s.a.w.w) aur un ki Aal par aur meri nisbat keena-war dushmanon ki dushmani ko ulfat se, sarkashon ke hasad ko mohabbat se, naikon se be-aetimadi ko aetimad se, qareebiyon ki adawat ko dosti se, azeezon ki qata-talluqi ko sila-rehmi se, qarabat-daron ki be-atenayi ko nusrat-o-taawun se, khushamadiyon ki zahiri mohabbat ko sachi mohabbat se aur sathiyon ke ihanat-ameez bartawo ko husn-e-muashirat se aur zalimon ke khauf ki talkhi ko aman ki sheerini se badal de. Khudawanda! Rehmat nazil farma Muhammad aur un ki Aal par aur jo mujh par zulm kare us par mujhe ghalba de. Jo mujh se jhagda kare us ke muqabla mein zaban (hujjat-shikan) de, jo mujh se dushmani kare us par mujhe fatah aur kamrani bakhsh. Jo mujh se makr kare us ke makr ka tod ata kar. Jo mujhe dabaye us par qabu de. Jo meri bad-goyi kare usay jhutlane ki taqat de aur jo daraye dhamkaye, us se mujhe mehfooz rakh. Jo meri islah kare us ki itaat aur jo rah-e-rast dikhaye us ki pairwi ki taufiq ata farma.

Ae Allah! Muhammad aur un ki Aal par rehmat nazil farma aur mujhe is amr ki taufiq de ke jo mujh se ghush-o-faraib kare main us ki khair-khwahi karoon, jo mujhe chhod de us se husn-e-sulook se pesh aaon. Jo mujhe mahroom kare usay ata-o-bakhshish ke sath iwaz doon aur jo qata-rehmi kare usay sila-rehmi ke sath badla doon aur jo pas-e-pusht meri burayi kare main us ke bar-khilaf us ka zikr-e-khair karoon aur husn-e-sulook par shukriya baja laon aur badi se chashm-poshi karoon. Bar-ilaha! Muhammad aur un ki Aal par rehmat nazil farma aur adl ke nashr, ghussa ke zabt aur fitna ke fru karne, mutafarriq-o-paragunda logon ko milane, aapas mein sulah-safayi karane, neki ke zahir karne, aib par parda dalne, narm-khooyi-o-frootani aur husn-e-seerat ke ikhtiyar karne, rakh-rakhao rakhne, husn-e-akhlaq se pesh aane, fazeelat ki taraf pesh-qadmi karne, tafazzul-o-ehsan ko tarjeeh dene, khorda-geeri se kinara karne aur ghair-mustahiq ke sath husn-e-sulook ke tark karne aur haq baat ke kehne mein agarchay woh garaan guzre, aur apni guftar-o-kirdar ki bhalayi ko kam samajhne mein agarchay woh zyada ho aur apne qaul-o-amal ki burayi ko zyada samajhne mein agarchay woh kam ho, mujhe neko-kaaron ke zewar aur parhezgaron ki saj-dhaj se aarasta kar aur in tamam cheezon ko daimi itaat aur jamaat se wabastagi aur ahl-e-bidat aur ijad-karda dayon par amal karne walon se alaihgi ke zariya paya-e-takmeel tak pahuncha de.

Bar-ilaha! Muhammad aur un ki Aal par rehmat nazil farma aur jab main boodha ho jaoon to apni wasee rozi mere liye qarar de aur jab aajiz-o-darmanda ho jaoon to apni qawi taqat se mujhe sahara de aur mujhe is baat mein mubtala na kar ke teri ibadat mein susti aur kotahi karoon, teri raah ki tashkhees mein bhatak jaoon, teri mohabbat ke taqazon ki khilaf-warzi karoon. Aur jo tujh se mutafarriq aur paragunda hon un se mail-jol rakkhoon aur jo teri jaanib badhne wale hain un se alaihda rahoon. Khudawanda! Mujhe aisa qarar de ke zaroorat ke waqt tere zariye hamla karoon, haajat ke waqt tujh se sawal karoon aur faqr-o-ehtiyaj ke mauqa par tere samne gidgidaon aur is tarah mujhe na azmana ke iztirar mein tere ghair se madad mangoon aur faqr-o-nadari ke waqt tere ghair ke aage aajizana darkhwast karoon aur khauf ke mauqa par tere siwa kisi doosre ke samne gidgidaon ke teri taraf se mahroomi, nakami aur be-atenayi ka mustahiq qarar paoon. Ae tamam reham karne walon mein se sab se zyada reham karne wale Khudaya! Jo hirs, bad-gumani aur hasad ke jazbat shaitan mere dil mein paida kare, unhein apni azmat ki yaad, apni quddrat mein tafakkur aur dushman ke muqabla mein tadbeer-o-chara-sazi ke tasawwurat se badal de aur fuhsh-kalami ya be-huda-goyi, ya dushnam-tarazi ya jhooti gawahi ya ghaib momin ki gheebat ya maujood se bad-zabani aur is qabeel ki jo baatein meri zaban par lana chahe unhein apni hamd-sarayi, madh mein koshish aur inhimaak, tamjeed-o-buzurgi ke bayan, shukr-e-nemat-o-aiteraf-e-ehsan aur apni nematon ke shumar se tabdeel kar de.

Ae Allah! Muhammad aur un ki Aal par rehmat nazil farma aur mujh par zulm na hone paye jabke tu us ke dafa karne par qadir hai, aur kisi par zulm na karoon jabke tu mujhe zulm se rok dene ki taqat rakhta hai aur gumrah na ho jaoon jabke meri rahnumayi tere liye aasaan hai aur muhtaj na hoon jabke meri faragh-baali teri taraf se hai. Aur sarkash na ho jaoon jabke meri khosh-haali teri jaanib se hai. Bar-ilaha! Main teri maghfirat ki jaanib aaya hoon aur teri maafi ka talab-gar aur teri bakhshish ka mushtaq hoon. Main sirf tere fazl par bharosa rakhta hoon aur mere paas koi cheez aisi nahi hai jo mere liye maghfirat ka bais ban sakay aur na mere amal mein kuch hai ke tere afw ka sazawaar qarar paoon aur ab is ke baad ke main khud hi apne khilaf faisla kar chuka hoon tere fazl ke siwa mera sarmaya-e-umeed kya ho sakta hai. Lehaza Muhammad aur un ki Aal par rehmat nazil kar aur mujh par tafazzul farma. Khudaya! Mujhe hidayat ke sath goya kar, mere dil mein taqwa-o-parhezgari ka ilqa farma, pakeeza amal ki taufiq de, pasandida kaam mein mashghool rakh. Khudaya mujhe behtareen raste par chala aur aisa kar ke tere deen-o-aayin par maroon aur usi par zinda rahoon. Ae Allah! Muhammad aur un ki Aal par rehmat nazil farma aur mujhe (guftar-o-kirdar mein) miyana-rawi se bahra-mand farma aur durust-kaaron aur hidayat ke rahnumaon aur naik bandon mein se qarar de aur akhirat ki kamyabi aur jahannum se salamati ata kar. Khudaya mere nafs ka ek hissa apni (ibtila-o-azmaish ke) liye makhsoos kar de taake usay (azab se) rahayi dila sakay aur ek hissa ke jis se us ki (dinywi) islah-o-durusti wabasta hai mere liye rehne de kyunke mera nafs to halak hone wala hai magar yeh ke tu usay bacha le jaye. Ae Allah! Agar main ghamgeen hoon to mera sazo-saman (taskeen) tu hai.

Aur agar (har jagah se) mahroom rahoon to meri umeed-gah tu hai. Aur agar mujh par ghamon ka hujoom ho to tujh hi se dado-faryad hai. Jo cheez ja chuki us ka iwaz aur jo shay tabah ho gayi us ki durusti aur jisay tu napasand kare us ki tabdeeli tere hath mein hai. Lehaza bala ke nazil hone se pehle aafiyat, mangne se pehle khosh-haali, aur gumrahi se pehle hidayat se mujh par ehsan farma. Aur logon ki sakht-o-durusht baaton ke ranj se mehfooz rakh aur qiyamat ke din aman-o-itminan ata farma aur husn-e-hidayat-o-irshad ki taufiq marhamat farma. Ae Allah! Muhammad aur un ki Aal par rehmat nazil farma aur apne lutf se (buraiyon ko) mujh se door kar de aur apni nemat se, meri parwarish aur apne karam se meri islah farma aur apne fazl-o-ehsan se (jismani-o-nafsani amraz se) mera madawa kar. Mujhe apni rehmat ke saya mein jagah de aur apni razamandi mein dhanp le. Aur jab umoor mushtaba ho jayein to jo un mein zyada qareen-e-sawab ho aur jab aamal mein ishtibah waqay ho jaye to jo un mein pakeeza tar ho aur jab mazahib mein ikhtilaf pad jaye to jo un mein pasandida tar ho us par amal-paira hone ki taufiq ata farma. Ae Allah! Muhammad aur un ki Aal par rehmat nazil farma aur mujhe be-niyazi ka taj pehna aur mutalluqa kaamon ko ahsan tariq se anjam dene par mamoor farma aur aisi hidayat se sarfraz farma jo dawam-o-subaat liye hue ho aur ghina-o-khosh-haali se mujhe be-raah na hone de aur aasoodgi-o-asaish ata farma, aur zindagi ko sakht dushwar na bana de. Meri dua ko radd na kar kyunke main kisi ko tera mad-e-muqabil nahi qarar deta aur na tere sath kisi ko tera hamsar samajhte hue pukarta hoon.

Ae Allah! Muhammad aur un ki Aal par rehmat nazil farma. Aur mujhe fuzool-kharchi se baaz rakh aur meri rozi ko tabah hone se bacha aur mere maal mein barkat de kar us mein izafa kar aur mujhe us mein se umoor-e-khair mein kharch karne ki wajah se rah-e-haq-o-sawab tak pahuncha. Bar-ilaha! Muhammad aur un ki Aal par rehmat nazil farma aur mujhe kasb-e-maishat ke ranj-o-gham se be-niyaz kar de. Aur be-hisab rozi ata farma taake talash-e-maash mein uljh kar teri ibadat se ro-gardan na ho jaoon aur (ghalat-o-na-mashrooh) kar-o-kasb ka khamyaza na bhugtoon. Ae Allah! Main jo kuch talab karta hoon usay apni quddrat se muhayya kar de aur jis cheez se khaif hoon us se apni izzat-o-jalal ke zariye panah de. Khudaya! Meri aabru ko ghina-o-tongari ke sath mehfooz rakh aur faqr-o-tangdasti se meri manzilat ko nazron se na gira ke tujh se rizq pane walon se rizq mangne lagoon, aur tere past bandon ki nigah-e-lutf-o-karam ko apni taraf modne ki tamanna karoon aur jo mujhe de us ki madh-o-shana aur jo na de us ki burayi karne mein mubtala ho jaoon. Aur tu hi ata karne aur rok lene ka ikhtiyar rakhta hai na ke woh. Ae Allah! Muhammad aur un ki Aal par rehmat nazil farma aur mujhe aisi sehat de jo ibadat mein kaam aaye aur aisi fursat jo duniya se be-talluqi mein sarf ho aur aisa ilm jo amal ke sath ho aur aisa parhezgari jo had-e-itidal mein ho (ke waswas mein mubtala na ho jaoon).

Ae Allah! Meri muddat-e-hayat ko apne afw-o-darguzar ke sath khatm kar aur meri aarzu ko rehmat ki umeed mein kamyab farma aur apni khoshnudi tak pahunchne ke liye raah aasaan kar aur har halat mein mere amal ko behtar qarar de. Ae Allah! Muhammad aur un ki Aal par rehmat nazil farma aur mujhe ghaflat ke lamhat mein apne zikr ke liye hoshiyar kar aur mohlat ke dinon mein apni itaat mein masroof rakh aur apni mohabbat ki sahl-o-aasaan raah mere liye khol de aur us ke zariye mere liye duniya-o-akhirat ki bhalayi ko kamil kar de. Ae Allah! Muhammad aur un ki aulad par behtareen rehmat nazil farma. Aisi rehmat jo us se pehle tu ne makhlooqat mein se kisi ek par nazil ki ho aur us ke baad kisi par nazil karne wala ho aur hamare duniya mein bhi neki ata kar aur akhirat mein bhi aur apni rehmat se humein dozakh ke azab se mehfooz rakh.