Du'a 32: Namaz-e-Shab ke ba'd ki Du'a

Ae Allah! Ae daimi-o-abadi badshahat wale aur lashkar-o-awan ke baghair mazboot farmanrawayi wale aur aisi izzat-o-rifat wale jo sadiyon, saalon, zamano aur dinon ke beetne guzarne ke bawajood painda-o-barqarar hai. Teri badshahi aisi ghalib hai jis ki ibtida ki koi hadd hai aur na intiha ka koi aakhri kinara hai. Aur teri jahandari ka paya itna buland hai ke tamam cheezain us ki bulandi ko chhune se qasir hain aur tareef karne walon ki intihaayi tareef teri is bulandi ke past tareen darja tak bhi nahi pahunch sakti. Jisay tu ne apne liye makhsoos kiya hai. Sifaton ke karwan tere baare mein sargardan hain. Aur tauseefi alfaz tere layeq-e-haal madh tak pahunchne se aajiz hain aur nazuk tasawwurat tere muqam-e-kibriyaayi mein shashdar-o-hairan hain.

Tu woh khuda-e-azali hai jo azal hi se aisa hai aur hamesha baghair zawaal ke aisa hi rahega. Main tera woh banda hoon jis ka amal kamzor aur sarmaya-e-umeed zyada hai. Mere hath se talluq aur wabastagi ke rishte jate rahe hain. Magar woh rishta jisay teri rehmat ne jodh diya hai. Aur umeedom ke wasile bhi ek ek karke toot gaye hain. Magar tere afw-o-darguzar ka wasila jis par sahara kiye hue hoon. Teri itaat jisay kisi shumar mein la sakoon, na hone ke barabar hai aur woh masiyat jis mein giriftar hoon bohat zyada hai. Tujhe apne kisi bande ko maaf kar dena agarchay woh kitna hi bura kyun na ho dushwar nahi hai. To phir mujhe bhi maaf kar de. Ae Allah! Tera ilm tamam poshida aamal par muheet hai aur tere ilm-o-ittala ke aage har makhfi cheez zahir-o-ashkara hai aur bareek se bareek cheezain bhi teri nazar se poshida nahi hain aur na raaz-haye-daroon-e-parda tujh se makhfi hain. Tera woh dushman jis ne mere be-rah-raw hone ke silsila mein tujh se mohlat mangi aur tu ne usay mohlat di, aur mujhe gumrah karne ke liye roz-e-qiyamat tak fursat talab ki aur tu ne usay fursat di, mujh par ghalib aa gaya hai. Aur jabke main halak karne wale sagheera gunahon se tere daman mein panah lene ke liye badh raha tha us ne mujhe aa giraya. Aur jab main gunah ka murtakib hua aur apni bad-aamali ki wajah se teri narazgi ka mustahiq bana to us ne apne heela-o-faraib ki baag mujh se mod li.

Aur apne kalma-e-kufr ke sath mere samne aa gaya. Aur mujh se bezari ka izhaar kiya aur meri jaanib se peeth phera kar chal diya aur mujhe khulay maidan mein tere ghazab ke samne akela chhod diya. Aur tere intiqam ki manzil mein mujhe kheench taan kar le aaya. Is halat mein ke na koi sifarish karne wala tha jo tujh se meri sifarish kare aur na koi panah dene wala tha, jo mujhe azab se dharas de aur na koi chahar-diwari thi jo mujhe teri nigahon se chhupa sakay, aur na koi panah-gah thi jahan tere khauf se panah le sakoon. Ab yeh manzil mere panah mangne aur yeh muqam mere gunahon ke aiteraf karne ka. Lehaza aisa na ho ke tere daman-e-fazl (ki wusatain) mere liye tang ho jayein aur afw-o-darguzar mujh tak pahunchne hi na paye aur na tauba-guzar bandon mein sab se zyada nakam sabit hoon aur na tere paas umeedain le kar aane walon mein sab se zyada na-umeed rahoon. (Bar-ilaha!) Mujhe bakhsh de is liye ke tu bakhshne walon mein sab se behtar hai. Ae Allah! Tu ne mujhe (itaat ka) hukm diya magar main usay baja na laya aur (bure aamal se) mujhe roka magar un ka murtakib hota raha. Aur bure khayalat ne jab gunah ko khoshnuma karke dikhaya to (tere ahkam mein) kotahi ki.

Main na roza rakhne ki wajah se din ko gawah bana sakta hoon aur na namaz-e-shab ki wajah se raat ko apni sipar bana sakta hoon aur na kisi sunnat ko main ne zinda kiya hai ke us se tehseen-o-shana ki tawaqqo karoon siwaye wajibaat ke ke jo unhein zaya kare woh bahar-haal halakat-o-tabahi hoga aur nawafil-o-sharaf ki wajah se jo tujh se tawassul nahi kar sakta dar-soorat-e-ke tere wajibaat ke bohat se sharait se ghaflat karta raha aur tere ahkam ke hudood se tajawuz karta hua muharram-e-shariat ka daman chaak karta raha, aur kabeera gunahon ka murtakib hota raha jin ki ruswaiyon se sirf tera daman-e-afw-o-rehmat parda-posh raha. Yeh (mera mauqif) is shakhs ka mauqif hai jo tujh se sharm-o-haya karte hue apne nafs ko buraiyon se rokta ho, aur us par naraz ho aur tujh se razi ho, aur tere samne khauf-zada dil, khameeda gardan aur gunahon se boojhal peeth ke sath umeed-o-beem ki halat mein ایستادہ (aystada) ho. Aur tu in sab se zyada sazawaar hai jin se us ne aas lagayi aur in sab se zyada haqdar hai jin se woh harasan-o-khaif hua. Ae mere parwardigar! Jab yehi halat meri hai to mujhe bhi woh cheez marhamat farma, jis ka main umeedo-war hoon. Aur us cheez se mutmain kar jis se khaif hoon aur apni rehmat ke inaam se mujh par ehsan farma.

Is liye ke tu in tamam logon se jin se sawal kiya jata hai zyada sakhi-o-kareem hai. Ae Allah! Jab ke tu ne mujhe apne daman-e-afw mein chhupa liya hai aur hamsaron ke samne is dar-e-fana mein fazl-o-karam ka jama pehnaya hai, to dar-e-baqa ki ruswaiyon se bhi panah de. Is muqam par ke jahan muqarrab farishte, muazzaz-o-ba-waqar paighambar, shaheed-o-salih afrad sab hazir honge. Kuch to hamsaye honge jin se main apni buraiyon ko chhupata raha hoon, aur kuch khwaish-o-aqarib honge jin se main apne poshida kaamon mein sharm-o-haya karta raha hoon. Ae mere parwardigar! Main ne apni parda-poshi mein un par bharosa nahi kiya aur maghfirat ke baare mein parwardigara tujh par aetimad kiya hai aur tu in tamam logon se jin par aetimad kiya jata hai zyada sazawaar-e-aetimad aur in sab se zyada ata karne wala hai jin ki taraf ruju hua jata hai aur in sab se zyada meharban hai jin se reham ki iltija ki jati hai, lehaza mujh par reham farma. Ae Allah! Tu ne mujhe baham pewasta hadiyon aur tang rahon wali sulb se tang-naye-reham mein ke jisay tu ne pardon mein chhupa rakkha hai ek zaleel pani (nutfa) ki soorat mein utara jahan tu mujhe ek halat se doosri halat ki taraf muntaqil karta raha yahan tak ke tu ne mujhe is hadd tak pahuncha diya jahan meri soorat ki takmeel ho gayi. Phir mujh mein aaza-o-jawarir wadeeat kiye. Jaisa ke tu ne apni kitab mein zikr kiya hai ke (main) pehle nutfa tha.

Phir munjamid khoon hua phir gosht ka ek lothda, phir hadiyon ka ek dhancha phir in hadiyon par gosht ki tahein charha dien. Phir jaisa tu ne chaha ek doosri tarah ki makhlooq bana diya. Aur main teri rozi ka muhtaj hua aur lateef-o-ehsan ki dast-geeri se be-niyaz na reh saka. To tu ne is bache hue khane pani mein se jisay tu ne is kaneeiz ke liye jari kiya tha jis ke shikam mein tu ne mujhe thehra diya aur jis ke reham mein mujhe wadeeat kiya tha, meri rozi ka sar-o-saman kar diya. Ae mere parwardigar! In halaton mein agar tu khud meri tadbeer par mujhe chhod deta ya meri hi quwwat ke hawale kar deta to tadabur mujh se kinara-kash aur quwwat mujh se door rehti. Magar tu ne apne fazl-o-ehsan se ek shafeeq-o-meharban ki tarah meri parwarish ka ehtimam kiya jis ka tere fazl-e-be-payan ki badaulat ab tak silsila jari hai ke na tere husn-e-sulook se kabhi mahroom raha aur na tere ehsanat mein kabhi takheer hui. Lekin us ke bawajood yaqeen-o-aetimad qawi na hua ke main sirf usi kaam ke liye waqf ho jata jo tere nazdeek mere liye zyada sood-mand hai. (Is be-yaqeeni ka sabab yeh hai ke) bad-gumani aur kamzori-e-yaqeen ke silsila mein meri baag shaitan ke hath mein hai. Is liye main us ki bad-hamsayagi aur apne nafs ki farmanbardari ka shikwa karta hoon aur us ke tasallut se tere daman mein tahafooz-o-nigah-dasht ka talib hoon. Aur tujh se aajizi ke sath iltija karta hoon ke us ke makr-o-faraib ka rukh mujh se mod de. Aur tujh se sawal karta hoon ke meri rozi ki aasaan sabeel paida kar de. Tere hi liye hamd-o-stayish hai ke tu ne az-khud buland paya nemtain ata kien aur ehsan-o-inaam par (dil mein) shukr ka ilqa kiya. To Muhammad aur un ki Aal par rehmat nazil farma aur mere liye rozi ko sahl-o-aasaan kar de aur jo andaza mere liye muqarrar kiya hai.

Us par qanaat ki taufiq de aur jo hissa mere liye muayyan kiya hai, us par mujhe razi kar de aur jo jism kaam mein aa chuka hai aur umr guzar chuki hai, usay apni itaat ki raah mein mehsoob farma. Bila-shubha tu asbaab-e-rizq muhayya karne walon mein sab se behtar hai. Bar-ilaha! Main is aag se panah mangta hoon jis ke zariye tu ne apne nafarmanon ki sakht girift ki hai. Aur jis se tu ne un logon ko jinhon ne teri raza-o-khoshnudi se rukh mod liya, daraya aur dhamkaya hai aur is aatish-e-jahannum se panah mangta hoon jis mein roshni ke bajaye andhera, jis ka khafeef lapka bhi intihaayi takleef-deh aur jo koson door hone ke bawajood (garmi-o-tapish ke lihaz se) qareeb hai aur is aag se panah mangta hoon jo aapas mein ek doosre ko kha leti hai aur ek doosre par hamla-awar hoti hai aur is aag se panah mangta hoon jo hadiyon ko khak-star kar de gi aur dozakhiyon ko kholta hua pani pilaye gi. Aur is aag se ke jo us ke aage gidgidaye ga, us par tars nahi khaye gi aur jo us se reham ki iltija kare ga.

Us par reham nahi kare gi aur jo us ke samne frootani kare ga aur khud ko us ke hawale kar de ga, us par kisi tarah ki takhfeef ka usay ikhtiyar nahi hoga. Woh dard-nak azab aur shadeed uqaab ki shola-samaniyon ke sath apne rehne walon ka saman kare gi. (Bar-ilaha!) Main tujh se panah mangta hoon jahannum ke bichhuon se jin ke munh khulay honge aur un saanpon se jo danton ko pees pees kar phunkar rahe honge aur us ke kholte hue pani se jo antriyon aur dilon ko tukde tukde kar de ga aur (seenon ko cheer kar) dilon ko nikal le ga. Khudaya! Main tujh se taufiq mangta hoon in baaton ki jo is aag se door karein, aur usay peechay hata dein. Khudawanda! Muhammad aur un ki Aal par rehmat nazil farma aur mujhe apni rehmat-e-frawan ke zariye is aag se panah de aur husn-e-darguzar se kaam lete hue meri laghzi-shon ko maaf kar de aur mujhe mahroom-o-nakam na kar. Ae panah dene walon mein sab se behtar panah dene wale Khudaya tu sakhti-o-museebat se bachata aur achhi nemtain ata karta aur jo chahe woh karta hai aur tu har cheez par qudrat rakhta hai.

Ae Allah! Jab bhi neko-kaaron ka zikr aaye to Muhammad aur un ki Aal par rehmat nazil farma aur jab tak shab-o-roz ke aane jane ka silsila qaim rahe to Muhammad aur un ki Aal par rehmat nazil farma. Aisi rehmat jis ka zakheera khatm na ho aur jis ki ginti shumar na ho sakay. Aisi rehmat jo faza-e-alam ko pur kar de aur zameen-o-aasman ko bhar de. Khuda un par rehmat nazil kare is had tak ke woh khoshnood ho jaye aur khoshnudi ke baad bhi un par aur un ki Aal par rehmat nazil karta rahe. Aisi rehmat jis ki koi hadd na ho aur na koi intiha. Ae tamam reham karne walon mein se sab se zyada reham karne wale.