خدایا یہ ماہِ رمضان ہے

جس میں تو نے وہ قرآن نازل کیا ہے

جو لوگوں کے لیے ہدایت اور حق و باطل میں تفرقہ کی بہترین نشانیاں رکھتا ہے۔

خدایا یہ ماہِ صیام ہے

یہ ماہِ قیام ہے

یہ ماہِ توجّہ

اور ماہِ توبہ ہے۔

یہ ماہِ مغفرت و رحمت ہے۔

یہ جہنّم سے نجات اور جنّت میں داخلہ کا مہینہ ہے۔

یہ وہ مہینہ ہے جس میں وہ شبِ قدر ہے

جو ایک ہزار مہینوں سے بہتر ہے۔

خدایا محمدؐ و آل محمدؐ پر رحمت نازل فرما

اور اس کے صیام و قیام میں میری مدد فرما۔

اس کو میرے لیے اور مجھے اس کے لیے صحیح و سالم رکھنا

اور میری بہترین مدد فرمانا۔

اس ماہ میں اپنی، اپنے رسولؐ اور اولیاء کی اطاعت کی توفیق دینا

(خدا ان سب پر رحمت نازل کرے)

مجھے اپنی عبادت کے لیے اور دعا و تلاوتِ قرآن کے لیے فارغ کر دینا

اور عظیم برکت عطا فرمانا

اور بہترین عافیت دینا۔

بدن میں صحت دینا،

اور رزق میں وسعت دینا۔

ہر رنج سے بچا لینا۔

دعا کو قبول کرلینا ،

اور ہر منزلِ امید تک پہنچا دینا۔

خدایا محمدؐ و آل محمدؐ پر رحمت نازل فرما

اور مجھ سے ہر طرح کی نیند، کسل مندی،

تھکاوٹ، سستی، سختی، غفلت، فریب کو دور فرما دینا

مجھے محفوظ رکھنا ہر طرح کی بیماری، درد

اور رنج و غم،

عوارض، امراض، خطاؤں ،

اور گناہوں سے۔

مجھ سے ہر طرح کی برائی،

زحمت، بلاء،

تعب اور رنج کو موڑ دینا کہ

تو دعاؤں کا سننے والا ہے

خدایا محمدؐ و آل محمدؐ پر رحمت نازل فرما

اور مجھے اس مہینہ میں پناہ دے دے شیطانِ رجیم سے۔

اس کے اشاروں سے، اس کی ہر فکر سے، اس کے دلوں میں پھونک دینے سے،

اس کے وسوسہ ڈالنے سے، اُسے نیکیوں سے روکنے سے اس کے کید سے،

اور اس کے مکر سے، اس کے پھندوں سے، اس کے دھوکوں سے،

اس کی امیدوں سے، اس کے فریب سے، اس کے فتنہ سے، اس کے جال، اس کے گروہ،

اس کے اتباع، اس کے پیرو، اس کے دوست، اس کے شرکاء سے

اور اس کی تمام مکّاریوں سے،

خدایا محمدؐ و آل محمدؐ پر رحمت نازل فرما

اور مجھے اس مہینے میں قیام و صیام کی توفیق عطا فرما۔

میری امید کو پورا فرما

اور جو چیز بھی تجھ کو مجھ سے راضی کر سکے اس کو کامل کردے

صبر کے ساتھ، احتساب کے ساتھ، ایمان و یقین کے ساتھ

اس کے بعد پھر میرے عمل کو قبول فرمالے کئی گنا اجر

اور عظیم ترین ثواب دے کر

اے ربّ العالمین۔

خدایا محمدؐ و آل محمدؐ پر رحمت نازل فرما

اور مجھے حج و عمرہ،

کوشش،

قوّت، نشاط،

توجّہ، توبہ،

توفیق، قربت،

خیرِ مقبول، رغبت، خوف،

تضرّع، خشوع،

نرم دلی، سچّی نیّت،

صداقتِ زبان،

خوف،

امید،

توکّل،

اعتماد،

گناہوں سے پرہیز،

بہترین قول،

مقبول ترین سعی،

بلند ترین عمل

اور مقبول ترین دعا کی توفیق عطا فرما

اور میرے اور کسی نیکی کے درمیان کسی رکاوٹ،

بیماری،

ہمّ و غم،

بیماری و غفلت اور بھول چوک کو حائل نہ ہونے دینا

بلکہ توفیق دے کہ تیرے بارے میں ہم مکمل طور سے متوجہ رہیں،

تیرے حقوق کی حفاظت کریں، تیرے عہد اور وعدے کو پورا کریں ۔

اپنی رحمت سے اے ارحم الراحمین۔

خدایا محمدؐ و آل محمدؐ پر رحمت نازل فرما

اور مجھے وہ کچھ عطا فرما جو تو نے اپنے نیک بندوں کو عطا کیا ہے

اور وہ کچھ دے دے جو تو نے اپنے مقرّب اولیاء کو عنایت فرمایا ہے۔

رحمت ، مغفرت، مہربانی، قبولیتِ دعا،

معافی، دائمی مغفرت، عافیت، معافات،

جہنّم سے آزادی، جنّت میں داخلہ

اور تمام خیرِ دنیا و آخرت۔

خدایا محمدؐ و آل محمدؐ پر رحمت نازل فرما

اور اس دعا کو اپنی بارگاہ تک پہنچادے

اور اپنی رحمت اور اپنے خیر کو ہم پر نازل کردے

ہمارے عمل کو مقبول۔

ہماری سعی کو مشکور بنا۔

ہمارے گناہوں کو بخش دے

تا کہ ہمارا حصّہ زیادہ ہو

اور ہماری قسمت میں بہت کچھ رہے۔

خدایا محمدؐ و آل محمدؐ پر رحمت نازل فرما

اور ہمیں شبِ قدر کی توفیق دے۔

بہترین حالات میں جن میں تو اپنے کسی بندے کو دیکھنا چاہتا ہے اور جسے توپسند کرتا ہے۔

اس کے بعد اس رات کو ہمارے لیے ہزار مہینوں سے بہتر بنا دے

اور وہ بہترین نعمتیں عطا فرما جو تو نے ان بندوں کو دی ہیں جن کو شبِ قدر تک باقی رکھا ہے اور شبِ قدر کی کرامت بخشی ہے۔

اس رات میں مجھے جہنّم سے آزاد ہونے والوں

اور دوزخ سے نجات پانے والوں میں قرار دے دے۔

ان بندوں میں قرار دے دے جو تیری مغفرت اور مرضی کی بناپر نیک بخت ہوگئے۔

اے بہترین رحم کرنے والے

رحمت نازل فرما محمدؐ و آل محمدؐ پر

اور ہمیں اس مہینہ میں کوشش، سعی،

قوّت، نشاط

اور اپنی ہر محبوب و پسندیدہ شئی عنایت فرما دے

اے پروردگار، اے فجر اور دس راتوں کے مالک۔ اے شفع و وتر کے مالک۔

اے ماہِ رمضان اور اس میں نازل ہونے والے قرآن کے مالک،

اے جبرئیلؑ و میکائیلؑ و اسرافیلؑ و عزرائیلؑ کے رب،

اور تمام ملائکۂ مقرّبین کے پروردگار

اے ابراہیمؑ و اسماعیلؑ کے پروردگار،

اسحاقؑ و یعقوبؑ

و موسیٰؑ و عیسیٰؑ کے پروردگار

اور تمام انبیاء و مرسلین کے پروردگار

اے حضرت محمدؐ خاتم النبیین کے پروردگار

ان سب پر تیری صلوات و رحمت ہو

میں تجھ سے تیرے حق کے وسیلہ سے جو تیرا ان پر ہے اور ان کا تجھ پر ہے

اور تیرے عظیم حق کے واسطہ سے دعا کرتا ہوں کہ ان سب پر رحمت نازل فرما

اور میری طرف نگاہ مرحمت فرما۔

جس سے تو مجھ سے راضی ہوجائے اور پھر دوبارہ ناراض نہ ہو۔

میرے تمام سوالات میری رغبت و آرزو اور میرے مقاصد کو عطا فرمادے

اور جسے میں بُرا سمجھتا ہوں

یا جس سے ڈرتا ہوں یا خوف زدہ ہوں یا نہیں بھی ہوں

ان سب کو مجھ سے، میرے اہل سے، میرے مال سے میرے برادران سے، میری ذریّت سے دور فرمادے۔

خدایا ہم اپنے گناہوں سے بھاگ کر تیری طرف آئے ہیں۔

تو ہمیں توبہ کرنے والوں

کی طرح پناہ دے دے۔

تو ہمیں اپنی پناہ میں رکھ لے،

ہم تیری طرف سراپا تسلیم ہیں

ہم خوف زدہ ہیں تو ہمیں چھوڑ نہ دینا۔

ہم رغبت رکھتے ہیں تو ہمیں امان دے دینا۔

ہم تیرے سائل ہیں تو ہمیں عطا فرما دینا

اور ہم پر مہربانی فرمانا کہ تو دعاؤں کا سننے والا اور ہم سے قریب ہے اور ہماری دعائیں قبول کرتا ہے۔

خدایا تو میرا رب ہے اور میں تیرا بندہ ہوں

اور بندہ کے لیے بہترین سوال کے قابل اس کا رب ہے۔

تیرے علاوہ بندے کسی اور سے سوال نہیں کرتے ہیں نہ کوئی ایسا جواد و کریم ہے۔

اے سائلین کی فریاد کی منزل۔

اے رغبت رکھنے والوں کی حاجتوں کی انتہا،

اے فریادیوں کے فریاد رس۔

اے مضطروں کی دعا قبول کرنے والے

اے بھاگے ہوئے بندوں کو پناہ دینے والے۔

اے فریادیوں کے فریاد رس،

اے کمزوروں کے مالک۔

اے رنجیدہ لوگوں کے رنج دور کرنے والے۔

اے صاحبانِ ہم و غم کو نشاط دینے والے۔

اے عظیم کرب کے دور کرنے والے۔

اے اللہ ، اے رحمٰن، اے رحیم۔

اے بہترین مہربان۔

محمدؐ و آل محمدؐ پر رحمت نازل فرما۔

معاف کردے ہمارے گناہ، ہمارے عیوب،

ہماری بُرائی ہمارے ظلم و جور

اور ہمارے نفس پر زیادتی کو

ہمیں اپنا فضل اور اپنی رحمت عنایت فرما کہ

اس کا اختیار کسی اور کے ہاتھ میں نہیں ہے۔

ہمیں معاف کردے۔

ہمارے جملہ گناہوں کو بخش دے

آئندہ ہماری زندگی کو برائیوں سے محفوظ رکھنا۔

ہمارے گناہوں کی پردہ پوشی کرنا اور ہمارے والدین،

اولاد، قرابت دار اور وابستگان

اور جو بھی مومنین و مومنات ہمارے رابطہ میں ہیں سب کے گناہوں کو بخش دینا کہ

یہ سب کچھ تیرے ہی اختیار میں ہے

اور تو وسیع مغفرت والا ہے۔

خدایا مجھے نا امید نہ کرنا۔

میری دعاؤں کو رد نہ کردینا اور میرے ہاتھوں کو میری گردن کی طرف پلٹا نہ دینا

اور میری تمام دعاؤں کو قبول کرلینا

مجھے اپنے فضل و کرم سے بہت کچھ عنایت فرمانا کہ

تو ہر شئے پر قادر ہے

اور ہم تیری طرف رغبت رکھنے والے ہیں۔

خدایا تیرے لیے بہترین نام

بلند ترین مثالیں ہیں۔

کبریائی اور نعمتیں ہیں۔

میں تجھ سے تیرے نام

بسم اللہ الرحمٰن الرحیم کے وسیلہ سے سوال کرتا ہوں کہ

اگر تو نے آج کی رات

ملائکہ اور روح کا نزول طے کردیا ہے

تو محمدؐ و آل محمدؐ پر رحمت نازل فرما

اور میرے نام کو نیک بختوں میں،

میری روح کو شہیدوں کے ساتھ

اور میری نیکیوں کو بلند مراتب میں قرار دے دے،

میری برائیوں کو معاف کردے

اور مجھے وہ یقین دے دے جو دل سے پیوست ہو،

وہ ایمان دے دے جس میں شک کا شائبہ نہ ہو

اور میں تیری تقسیم سے راضی ہوں۔

مجھے دنیا اور آخرت میں نیکی عطا فرما

اور عذابِ جہنّم سے بچا لے

اور اگر تو نے آج کی رات

ملائکہ اور روح کے نزول کا

فیصلہ نہیں کیا ہے تو مجھے اس وقت تک باقی رکھنا

اور اس رات میں اپنا ذکر، اپنا شکر،

اپنی اطاعت اور بہترین عبادت کی توفیق عطا فرمانا۔

محمدؐ و آل محمدؐ پر بہترین صلوات نازل فرما۔

اے بہترین رحم کرنے والے۔

اے خدائے احد، اے خدائے بے نیاز،

اے حضرت محمدؐ کے پروردگار۔

آج کے دن حضرت محمدؐ اور ان کی نیک عترت کے لیے دشمنوں سے انتقام لینا۔

ان کے دشمنوں کو قتل کردینا۔

ان کے اعداء کو اپنے شمار میں رکھنا

اور روئے زمین پر ان میں سے کسی ایک کو بھی باقی نہ چھوڑنا

اور کسی کو قیامت تک معاف بھی نہ کرنا۔

اے بہترین ساتھی۔

اے انبیاء کے مددگار

تو بہترین مہربانی کرنے والا ہے۔

بہترین ایجاد کرنے والا ہے۔

جس کا مثل کوئی نہیں ہے۔

ہمیشہ رہنے والا ہے اور کبھی غافل نہ ہونے والا ہے۔

وہ زندہ ہے جس کے لیے موت نہیں ہے

اور ہر دن ایک نئی شان والا ہے۔

تو ہے حضرت محمدؐ کا وارث

تو ہے حضرت محمدؐ کا مددگار

اور حضرت محمدؐ کو فضیلت دینے والا۔

میرا سوال یہ ہے کہ حضرت محمدؐ کے وصی، خلیفہ اور ان کے اوصیاء میں

عدل کے ساتھ قیام کرنے والے کی مدد فرما۔

تیری صلوات و رحمت ان سب پر ہو۔

اپنی نصرت کا رُخ ان کی طرف موڑ دے۔

اے وہ خدا جس کے علاوہ کوئی خدا نہیں ہے۔

تجھے تیری توحید کا واسطہ۔

محمدؐ و آل محمدؐ پر رحمت نازل فرما

اور مجھے دنیا و آخرت میں ان کے ساتھ قرار دینا۔

میرے انجامِ کار کو مغفرت اور رحمت قرار دینا۔

اے بہترین رحم کرنے والے۔

اسی طرح تو نے اپنی تعریف لطف و کرم سے کی ہے۔

بے شک تو لطیف ہے

لہٰذا محمدؐ و آل محمدؐ پر رحمت نازل فرما

اور محمد پر جیسی چاہے ویسی مہربانی فرما۔

خدایا محمدؐ و آل محمدؐ پر رحمت نازل فرما

اور مجھے اس سال حج وعمرہ کی توفیق عطا فرما

اور میری دنیا و آخرت کی جملہ حاجتوں کو پورا کرکے مجھ پر احسان فرما۔

میں پروردگار سے استغفار و توبہ کرتا ہوں کہ

میرا خدا مجھ سے قریب بھی ہے اور میری سنتا بھی ہے۔

میں اپنے پروردگار سے استغفار اور توبہ کرتا ہوں کہ

وہ رحیم بھی ہے اور چاہنے والا بھی ہے۔

میں اپنے پروردگار سے توبہ و استغفار کرتا ہوں کہ

وہ بخشنے والا ہے۔

خدایا مجھے بخش دے کہ

تو بہترین رحم کرنے والا ہے۔

مالک میں نے برائی کی ہے اور اپنے نفس پر ظلم کیا ہے

لہٰذا مجھے معاف کردے کہ گناہوں کا معاف کرنے والا تیرے علاوہ کوئی نہیں ہے۔

میں اس خدا سے استغفار کرتا ہوں جس کے علاوہ کوئی خدا نہیں ہے۔

وہ حیّ و قیّوم ہے۔ حلیم و عظیم ہے۔

کریم اور عظیم گناہوں کا بخشنے والا ہے۔

میں اس کی بارگاہ میں توبہ کرتا ہوں

اور اس سے استغفار کرتا ہوں۔

یقیناً وہ غفور و رحیم ہے۔

خدایا میں تجھ سے سوال کرتا ہوں کہ محمدؐ و آل محمدؐ پر رحمت نازل فرما

اور حتمی عمل کا فیصلہ کیا ہے

اور شبِ قدر میں جس عظیم یقینی امور کے بارے میں

اور جس قضا و قدر میں کسی تبدیلی کا امکان نہیں ہے۔

اس میں یہ بھی قرار دے دے کہ میرا نام حجّاجِ بیت اللہ میں لکھ دے

جن کا حج قبول ہو،

جن کی سعی مشکور ہو

اور جن کے گناہ معاف کردئیے جائیں۔

ان کے گناہوں و خطاؤں سے پردہ پوشی کی جائے

اور اس شبِ قدر کے فیصلوں میں یہ بھی قرار دے دے کہ میری عمر طویل،

میرا رزق وسیع ہو،

میری امانتیں اور میرے قرض ادا ہوجائیں۔

آمین یا ربّ العالمین۔

خدایا میرے امور میں وسعت اور کشائش عطا فرما۔

مجھے روزی دے وہاں سے بھی جس کا مجھے گمان ہے اور وہاں سے بھی جس کا گمان نہیں ہے

میری حفاظت فرما اس راستہ میں بھی جس سے میں خود اپنی حفاظت کرتا ہوں اور اس راستہ سے بھی جس سے میں اپنی حفاظت نہیں کرتا ہوں

محمدؐ و آل محمدؐ پر صلوات نازل فرما اور سلامِ کثیر عطا فرما۔