دعائے صَباح حضرتْ امیرؑ

(بعض مشہور دعاؤں کے ذکر میں جن میں سے امیر المومنین علیہ السلام کی یہ دعائے صباح بھی ہے۔)

بنام خدائے رحمان و رحیم

اے وہ خدا جس نے صبح کی زبان کو روشنی کی گویائی سے نورانی فرمایا ہے

اور اندھیری رات کے ٹکڑوں کو ہول انگیز تاریکیوں کو ساتھ آزاد فرمایا ہے

اور فلک دوّار کی صنعت کو برجوں کی مقدار سے مستحکم فرمایا ہے

اور آفتاب کی روشنی کو بھڑکتے ہوئے نور سے تابندہ قرار دیا ہے۔

اے وہ خدا جو اپنی ذات کے لئے خود ہی رہنما ہے

اور تمام مخلوقات کی مشابہت

یا ان کے کیفیات کی مناسبت سے بلند تر اور پاکیزہ ہے۔

اے وہ خدا جو خیالات سے قریب تر

اور آنکھوں کے مشاہدے سے دور تر ہے

اور ہر چیز کو اس کے وجود کے پہلے سے جانتا ہے۔

اے وہ خدا جس نے مجھے امن وامان کے گہوارہ میں سلایا

اور احسانات و انعامات کی دنیا میں بیدار کیا

اور برائی کے ہاتھوں کو اپنے ہاتھوں سے اور اپنی طاقت سے رد کردیا۔

رحمت نازل فرما اس انسان پر جو اندھیری رات میں تیری طرف رہنمائی کرنے والا

اور عظیم ترین شرف کے ہر وسیلہ سے تمسک کرنے والا

اور بلندیوں کے عظیم درجہ پر ہے روشن ترین حسب و نسب رکھنے والا

اور مشکلات میں روز اول سے ثابت قدم رہنے والا ہے

اور اس کی اس آل پر جو نیک کردار اور منتخب ہے۔

خدایا ہمارے لئے صبح کے دروازوں کو

رحمت و فلاح کی کنجیوں سے کھول

اور ہمیں ہدایت و صلاح کا بہترین لباس عطا فرما۔

اپنی عظمت سے ہمارے دلوں میں خشوع و خضوع کے چشمے راسخ فرما دے

اور اپنی ہیبت سے ہماری آنکھوں سے آنسوؤں کو جاری کردے۔

ہماری بے راہ روی کو قناعت اور خضوع کے اہتمام کو مودب بنا دے۔

خدایا اگر تیری رحمت نے بہترین توفیق سے ہمارے کاموں کا آغاز نہ کیا

تو ہمیں روشن راستہ پر لے جانے والا کون ہوگا

اور اگر تیری مہلت نے ہمیں امیدوں اور خواہشات کے قائدین کے حوالے کردیا

تو ہماری لغزشوں کو خواہشات کی ٹھوکر سے بچانے والا کون ہو گا

اور اگر نفس و شیطان کی جنگ میں تیری مدد کے ساتھ چھوڑ دیا

تو گویا کہ تو نے ہم کو سختی اور نا امیدی کے حوالے کردیا۔

خدایا تجھے معلوم ہے کہ میں تیری بارگاہ میں صرف امیدوں کے سہارے آیا ہوں

اور میں نے تیرے ریسمان کرم کو اس وقت پکڑا ہے جب مجھے گناہوں نے تیرے دارالوصال سے دور پھینک دیا ہے۔

وہ بد ترین سواری ہے جس پر میرا نفس خواہشات سمیت سوار ہو گیا ہے۔

حیف ہے اس نفس کے لئے ان خیالات اور امیدوں کی بنا پر حیف ہے اس نفس کے لئے ان خیالات اور امیدوں کی بنا پر

جو اس کے سامنے آراستہ ہو گئیں اور ہلاکت ہے اس کے لئے کہ اس نے اپنے سردار و مولا کے سامنے جرأت و جسارت کا مظاہرہ کیا ہے۔

خدایا میں نے امیدوں کے ہاتھوں تیرے باب رحمت کو کھٹکھٹایا ہے

اور خواہشات کے مظالم سے تیری پناہ میں بھاگ کر آیا ہوں

میں نے اپنی محبت کی انگلیوں سے تیری ریسمان ہدایت کو پکڑ لیا ہے۔

اب میری تمام خطاؤں کو اور لغزشوں کو معاف کردے

اور مجھے ہلاکت کی تباہی سے بچا لے۔

تو میرا سردار، میرا مولا، میرا معتمد اور میری امیدوں کا مرکز ہے۔

تو میرا آخری مطلوب اور دنیا و آخرت میں میری آخری آرزو ہے۔

خدایا اس مسکین کو کس طرح ہٹا دے گا جو گناہوں سے بھاگ کر تیری پناہ میں آیا ہے

اور اس طالب ہدایت کو کیسے ناامید کر دے گا جو دوڑ کر تیری جناب میں آیا ہے

اس پیاسے کو کیسے پلٹا دے گا جو تیرے حوض پر سیراب ہونے کے لئے وارد ہوا ہے۔

یقیناً یہ ناممکن ہے کہ تیرے دریائے رحمت خشک ترین زمینوں پر بھی چھلک رہے ہیں

اور باب کرم ہر طلبگار کے لئے کھلا ہو اہے۔

تو آخری مسئول ہے اور آخری مرکز امید ہے۔

خدایا یہ میرے نفس کی زمام ہے جس کو میں نے تیری مشیت سے باندھ دیا ہے

اور یہ میرے گناہوں کا بوجھ ہے جس کو میں تیرے عفو وکرم سے ہٹانا چاہتا ہوں۔

یہ میرے گناہ گمراہ کن خواہشات ہیں جن کو میں نے تیرے لطف و کرم کی بارگاہ کے حوالے کر دیا ہے۔

اب میری صبح کو ایسا بنا دے کہ ہدایت کی روشنی مجھ پر نازل ہو

اور میرے دین و دنیا دونوں سلامت رہیں۔

میری شام کو دشمنوں کے شر سے

اور گمراہ کن خواہشات کی ہلاکتوں سے محفوظ بنا دے۔

تو ہر شئے پر قادر ہے۔

جس کو چاہے ملک دے سکتا ہے

اور جس سے چاہے ملک لے سکتا ہے۔

جس کو چاہتا ہے عزت دیتا ہے

اور جسے چاہتا ہے ذلیل کر دیتا ہے۔

خیر تیرے ہی ہاتھوں میں ہے

اور تو ہر شئے پر قادر ہے۔

تو رات کو دن میں

اوردن کو رات میں داخل کر دیتا ہے۔

زندہ کو مردہ سے

اور مردہ کو زندہ سے نکال لیتا ہے۔

جو جسے چاہے بے حساب رزق عطا فرما دیتا ہے۔

تیرے علاوہ کوئی خدا نہیں ہے۔

تو پاک و پاکیزہ ہے اور قابل حمد و ستائش ہے۔

کون ایسا ہے جو تیری قدر کو جانتا ہواور تجھ سے ڈرتا نہ ہو

اور کون ایسا ہے جو تجھے پہچانتا ہو اور خوفزدہ نہ ہو۔

تو نے اپنی قدرت سے متفرقات کو جوڑ دیا ہے

اور صبح کو روشن کر دیا ہے

تو نے اپنے کرم سے اندھیری راتوں کو نورانی بنا دیا ہے

اور سخت ترین چٹانوں سے شیریں اور نمکین چشمے جاری کر دیئے ہیں۔

تو نے بادلوں سے پانی برسایا ہے

اور آفتاب و ماہتاب کو لوگوں کے لئے دھڑکتا ہوا روشن چراغ بنا دیا ہے

اور پھر ان تمام چیزوں کی ایجاد میں تجھے نہ کوئی زحمت ہوئی ہے اور نہ کوئی مشقت برداشت کرنا پڑی ہے۔

اے وہ خدا جو عزت و بقاء میں اکیلا ہے

اور جس نے سارے بندوں کو موت اور فنا کے ذریعے دبا دیا ہے

حضرت محمدؐ اور ان کی متقی آل پر رحمت نازل فرما۔

میری آواز کو سن لے۔ میری دعا کو قبول کر لے

اور میری امیدوں کو پورا فرما دے۔

اے وہ خدا جس کو رنج و غم کو دور کرنے کے لئے پکارا گیا

اور جس سے ہر مشکل میں امید کی جاتی ہے۔

میں نے تیری بارگاہ میں اپنی حاجتوں کو پیش کر دیا ہے۔ اب مجھے اپنے بلند ترین عطایا سے مایوس واپس نہ کرنا

اے کریم۔ اے کریم۔ اے کریم۔

تیری رحمت کا واسطہ کہ تو سب سے زیادہ رحمت کرنے والا ہے۔

پروردگار بہترین مخلوقات حضرت محمدؐ

اور ان کی تمام آل پر صلوات نازل فرمائے۔

خدایا میرا دل شرمندہ ہے۔

میرا نفس معیوب ہے۔

میری عقل مغلوب ہے۔

میرے خواہشات غالب ہیں

میری اطاعت قلیل

اور میری معصیت کثیر ہے

اور میری زبان گناہوں کی اقراری ہے

تو اس کے بعد کیا چارہ کار ہے۔

اے عیوب کو چھپانے والے

اور غیب کے جاننے والے

اور رنج و غم کے دور کرنے والے۔

میرے تمام گناہوں کو

حضرت محمدؐ و آل محمدؐ کی حرمت کے واسطے سے معاف کردے۔

اے بخشنے والے۔ اے غفّار۔ اے معاف کرنے والے

تیری رحمت کا واسطہ اے سب سے زیادہ مہربانی کرنے والے۔