خدایا تجھ سے تیرے عظیم تر، باعزّت و جلال

و کرامت کے نام کے واسطہ سے سوال کرتا ہوں

جس نام کے ذریعہ اگر آسمان کے بند دروازوں پر دعا کی گئی تو رحمت سے کھل گئے

اور زمین کے تنگ دروازوں پر دعا کی گئی تو وسعتیں پیدا ہوگئیں۔

دشواریوں میں ان کے ذریعہ دعا کی گئی تو آسانیاں پیدا ہوگئیں۔

مردوں پر دم کیے گئے تو زندگی پیدا ہوگئی۔

مصیبت اور آفت کو دور کرنے کے لیے دعا کی گئی تو رنج و غم دور ہوگئے۔

تیری ذات کے جلال کا واسطہ

جو سب سے زیادہ مکرّم اور سب سے زیادہ صاحبِ عزّت ہے۔

جس کے سامنے تمام چہرے ذلیل ہیں

اور جس کے سامنے تمام گردنیں جھکی ہوئی ہیں۔

آوازیں اس کے سامنے دب گئی ہیں

اور دل اس کے خوف سے لرزرہے ہیں

تیری اس قوّت کا واسطہ

جس کے ذریعہ آسمان کو زمین پر گرنے سے روک دیا ہے

اور زمین وآسمان کو زائل نہیں ہونے دیا ہے۔

تیری اس مشیّت کا واسطہ جس کے سامنے عالمین سر بسجود ہیں۔

تیرے اس کلمہ کا واسطہ جس کے ذریعہ آسمان و زمین کو پیدا کیا ہے

اور اس حکمت کا واسطہ جس سے عجائبات کو ایجاد کیا ہے۔

ظلمت کو بناکر اُسے رات قرار دیا ہے

اور رات کو سکون بنادیا ہے۔

نور کو پیدا کرکے اُسے دن بنادیا ہے

اور دن کو پھیل جانے کا ذریعہ بنادیا ہے۔

آفتاب کو پیدا کرکے اُسے ضیاء بنادیا ہے

اور قمر کو خلق کرکے اُسے نور بنادیا ہے۔

کواکب کو ایجاد کرکے

ستاروں، بروج، چراغوں اور زینتوں کا ذریعہ بنادیا ہے

ان کے لیے مشرق و مغرب بنائے ہیں۔

ان کے لیے طلوع کرنے کی جگہ آگے بڑھنے کی منزل بنائی ہے۔

ان کے لیے فلک اور گردش کے مقامات طے کیے ہیں

آسمانوں میں منزلیں بنائیں تو بہترین بنائیں۔

صورتیں بنائیں تو حسین ترین بنائیں

اور سب کو اپنے شمار میں رکھا

اور سب کی تدبیر اپنی حکمت سے کی اور بہترین تدبیر کی۔

سب کو مسخّر رکھا آسمان کی رات اور دن کے اقتدار

اور ساعت کے ذریعہ سالوں کے حساب کے ذریعہ

اور سب کی رویت کو تمام لوگوں کے واسطے ایک ہی رویت قرار دیا۔

خدایا میں تیری اس بزرگی کا واسطہ دیتا ہوں

جس کے ذریعہ تو نے اپنے بندے اور رسول موسیٰ بن عمران علیہ السلام سے باتیں کیں مقدّسین کی منزل میں

فرشتوں کے احساس سے بالاتر

مقام پُرنور کے بادلوں کے اوپر

تابوتِ شہادت کے اوپر

ستون نار میں اور طور سینا میں

اور حبل حوریث پر

وادی مقدّس میں

بقعۂ مبارک میں

طور کے داہنی طرف درخت کے ذریعہ سے

اور پھر مصر کی سرزمین پر نو روشن نشانیوں کے ساتھ

اور جس دن تو نے بنی اسرائیل کے لیے سمندر کو شگافتہ کیا

اور ان اُبلنے والے چشموں میں کہ جن کے ذریعہ تو نے بحرِ سوف میں عجائب ایجاد کیے

اور دریاؤں کی گہرائیوں میں پانی کو پتھر کی طرح سخت کردیا

اور بنی اسرائیل کو دریا کے اس پار نکال دیا

اور اس طرح ان کا وعدہ پورا کیا کہ انھوں نے صبر کیا تھا

اور تو نے انھیں شرق و غرب عالم کا وارث بنادیا جسے عالمین کے لیے بابرکت قرار دیا ہے

اور فرعون اور اس کے لشکروں اور سواریوں کو غرق دریا کردیا

اور تیرے اس عظیم اور بزرگ تر،

عزیز، جلیل اور کریم نام کا واسطہ

اور تیری اس بزرگی کا واسطہ جس کی تجلّی طور سینا پر موسیٰ علیہ السلام کے لیے ظاہر ہوئی

اور اس سے پہلے ابراہیم علیہ السلام کے لیے مسجدِ خیف میں ظاہر ہوئی

اور اسحاق علیہ السلام کے لیے چاہِ شیع میں ظاہر ہوئی

اور تیرے نبی یعقوب علیہ السلام کے لیے بیت ایل میں ظاہر ہوئی

اور جس کے ذریعہ تو نے ابراہیم علیہ السلام کے وعدہ کو پورا کیا

اور اسحاقؑ کے لیے اپنی قسم کو

اور یعقوب کے لیے اپنی شہادت کو

اور مومنین کے لیے اپنے وعدہ کو پورا کردیا

اور دعا کرنے والوں کے لیے جن کی دعاؤں کو تو نے قبول کرلیا

اور تیری اس بزرگی کا واسطہ جو موسیٰ بن عمران علیہ السلام کے لیے قبّۂ رمّان پر ظاہر ہوئی

اور ان نشانیوں کا واسطہ جو زمین مصر پر نمایاں ہوئیں

عزّت و غلبہ کے ساتھ۔

واضح نشانیوں کے ساتھ

اور قوّت و سلطنت کے ساتھ

عزّت و قدرت کے ساتھ

اور کلمۂ تام کی شان کے ساتھ۔

اور تیرے ان کلمات کا واسطہ جن کے ذریعہ تو نے اہلِ آسمان و زمین

اور اہلِ دنیا و آخرت پر فضل و کرم کیا ہے

اور اس رحمت کا واسطہ جس کے ذریعہ تمام مخلوقات پر احسان کیا ہے

اور اس قوّت کا واسطہ جس کے ذریعے عالمین پر حجّت کو قائم کیا ہے

اور اس نور کا واسطہ جس کے خوف سے طور سینا لرز گیا

اور تیرے علم و جلال کبریائی و عزّت

اور جبروت کا واسطہ جس کا بوجھ زمین نہیں اُٹھا سکتی

اور جس کے سامنے آسمان بھی جھک گئے ہیں

اور جس کے لیے عمیق گہرائیاں بھی لرز گئی ہیں۔

بہتے ہوئے دریا اور نہریں،

ٹھہرے ہوئے پہاڑ خاضع ہوگئے ہیں۔

زمین اپنے شانوں سمیت خاضع ہوگئی ہے

اور ساری مخلوقات تسلیم ہوگئی ہیں۔

ہوائیں اپنے چلنے میں مضطرب ہوگئیں۔

آگ اپنی منزل پر خاموش ہوگئی۔

اور تیرے اس اقتدار کا واسطہ جس کے ذریعہ تیرے غلبہ کو پہچانا گیا ہمیشہ ہمیشہ کے لیے

اور تیری حمد کی گئی آسمانوں میں اور زمینوں میں

اور تیرے اس کلمہ کا واسطہ جو کلمۂ صدق ہے جو سب سے پہلے جناب آدم علیہ السلام اور ان کی ذریّت کو عطا کیا گیا تھا

اور تیرے اس کلمہ کا واسطہ جو ہر شئے پر غالب ہے تیرے نور ذات کا واسطہ

جس کی تجلّی پہاڑ پر ظاہر ہوئی

تو پہاڑ ریزہ ریزہ ہوگیا اور موسیٰؑ بے ہوش ہوگئے

اور تیری اس بزرگی کا واسطہ جو طورِ سینا پر ظاہر ہوئی

جب تو نے اپنے بندہ و رسول موسیٰ بن عمران سے باتیں کیں

اور تیری اس طلعت کا واسطہ جو مقامِ ساعیر پر نمایاں ہوئی

اور تیرے ظہور کا واسطہ جو فاران کی چوٹیوں پر ہوا بلند ترین مقامات پر

اور صف بستہ ملائکہ کے لشکروں کے ساتھ

اور تسبیح گذار فرشتوں کے خشوع کے ساتھ

اور تیری ان برکتوں کا واسطہ جن کے ذریعہ تو نے اپنے خلیل ابراہیمؑ کو

امّت حضرت محمد صلی اللہ علیہ و آلہ میں برکت عطا فرمائی ہے

اپنے خاص بندہ اسحاق کو

امّت عیسیٰ میں برکت دی ہے (علیہما السّلام)

اور یعقوب کو

امّتِ موسیٰ میں برکت دی ہے(علیہما السّلام)

اور اپنے حبیب محمد مصطفیٰ صلی اللہ علیہ وآلہٖ کو

ان کی آل اور ذریّت اور امّت میں برکت دی ہے۔

خدایا ہم جس طرح ان تجلّیات سے غائب رہے اور حاضر نہ رہ سکے مگر ان پر ایمان لے آئے اور ان کو بغیر دیکھے صدق و عدالت کے ساتھ مان لیا

تو اب تو محمدؐ و آل محمدؐ پر رحمت نازل فرما

اور انھیں برکت عنایت فرما،

ان پر رحمتوں کا نزول فرما

جس طرح بہترین صلوات اور رحمت ابراہیمؑ اور آل ابراہیمؑ کو عطا فرمائی ہے کہ

تو قابلِ حمد بھی ہے اور صاحبِ بزرگی بھی ہے۔

جو چاہے وہ کرسکتا ہے۔

ہر شئے پر قدرت و اختیار رکھتا ہے۔

خدایا اس دعا کے حق کا واسطہ

اور ان اسماء کے حق کا واسطہ

جن کی تفسیر کو

اور جن کے باطن کو تیرے علاوہ کوئی نہیں جانتا ہے

محمدؐ و آل محمدؐ پر رحمت نازل فرما

اور ہمارے ساتھ وہ برتاؤ کرنا جس کا تو اہل ہے۔

وہ برتاؤ نہ کرنا جس کے ہم اہل ہیں۔

ہمارے گذشتہ اور آئندہ گناہوں کو معاف فرمادے۔

رزقِ حلال میں وسعت عطا فرما

اور ہمیں بدترین انسان،

بدترین ہمسایہ ،

بدترین ساتھی

اور بدترین سلطان کے شر سے محفوظ رکھنا

تو ہر شئے پر قادر ہے۔

ہر چیز کا جاننے والا ہے۔

آمین یا رب العالمین۔

اے اللہ اے مہربان اے کرم کرنے والے

اے آسمان و زمین کے خالق

اے صاحبِ جلال و اکرام

اے ارحم الرٰحمین

خدایا اس دعا کے حق کا واسطہ

اور ان اسماء کے حق کا واسطہ

جن کی تفسیر کو

اور جن کے باطن کو تیرے علاوہ کوئی نہیں جانتا ہے

محمدؐ و آل محمدؐ پر رحمت نازل فرما

اور ہمارے ساتھ وہ برتاؤ کرنا جس کا تو اہل ہے۔

وہ برتاؤ نہ کرنا جس کے ہم اہل ہیں۔

ہمارے گذشتہ اور آئندہ گناہوں کو معاف فرمادے۔

رزقِ حلال میں وسعت عطا فرما

اور ہمیں بدترین انسان،

بدترین ہمسایہ ،

بدترین ساتھی

اور بدترین سلطان کے شر سے محفوظ رکھنا

تو ہر شئے پر قادر ہے۔

ہر چیز کا جاننے والا ہے۔

آمین یا رب العالمین۔

خدایا اس دعا کے حق کا واسطہ

اور ان اسماء کے حق کا واسطہ

جن کی تفسیر و تاویل

اور جن کے باطن و ظاہر کو تیرے علاوہ کوئی نہیں جانتا ہے کہ

محمدؐ و آل محمدؐ پر رحمت نازل فرما

اور مجھے خیرِ دنیا و آخرت عطا فرما دے۔

میرے ساتھ وہ برتاؤ کرنا جس کا تو اہل ہے

اور وہ برتاؤ نہ کرنا جس کا میں اہل ہوں

اور میرا انتقام فلاں شخص سے لے لینا۔

اور میرے تمام سابق و لاحق گناہوں کو معاف کردینا

اور میرے والدین اور تمام مومنین و مومنات کے گناہوں کو بخش دینا۔

میرے لیے رزقِ حلال میں وسعت عطا فرما

اور مجھے بدترین انسان،

بدترین ہمسایہ،

بدترین سلطان،

بدترین ساتھی،

بدترین دن

اور بدترین ساعت کے شر سے محفوظ رکھنا

جو میرے ساتھ مکر کرے

یا مجھ پر ظلم کرے

یا میرے ساتھ میرے اہل

اور اولاد کے ساتھ

میرے بھائیوں اور ہمسایہ کے ساتھ

اور میرے قرابتدار مومنین و مومنات کے ساتھ برائی کرنا چاہے

ان سے تو انتقام لینا کہ تو ہر شئے پر قادر ہے

اور ہر چیز کا جاننے والا ہے۔

آمین رب العالمین۔

خدایا اس دعا کے حق کا واسطہ

فقراء مومنین و مومنات کو مالداری و ثروت عطا فرما۔

جو مومنین و مومنات بیمار ہیں انھیں شفا و صحت عطا فرما۔

جو زندہ ہیں ان کے شامل حال لطف و کرم کردے

اور جو مرگئے ہیں ان کی مغفرت فرما اور ان پر رحمت نازل فرما۔

جو مومنین و مومنات مسافر ہیں انھیں ان کے وطن تک صحت و سلامتی اور کامیابی کے ساتھ پہنچا دے۔

اپنی رحمت کے وسیلہ سے اے ارحم الراحمین

اللہ ہمارے آقا حضرت محمد خاتم النبیینؐ ان کی عترت طاہرینؑ پر رحمت نازل کر

اور بے شمار سلام نازل کر۔

خدایا میں تجھ سے اس دعا کی حرمت

اور ان اسماء کی حرمت کے وسیلہ جن کا اس میں ذکر نہیں ہے

اور ان مطالب کے واسطہ سے جن پر یہ دعا مشتمل ہے

اور جن کو تیرے علاوہ کوئی نہیں جانتا ہے یہ سوال کرتا ہوں کہ میرے ساتھ ایسا برتاؤ کرنا۔