Du'a-e-Jau shan-e-Sagheer

(Yeh dua muatabar kitabon mein Jaushan-e-Kabeer se zyada mufassil sharah ke sath naqal ki gayi hai. Kafami ne Balad-ul-Ameen ke hashiya par farmaya hai ke yeh dua intihaayi rafi-ush-shan aur azeem-ul-manzilat hai. Jab Bani Abbas ke badshah Musa Hadi ne Imam Musa Kazim (a.s) ko qatl karne ke irada se talab kiya to Aap ne is dua ki tilawat ki aur Paighambar-e-Islam (s.a.w.w) ko khwab mein dekha ke Aap farma rahe thay ke mutmain raho to parwardigar tumhare dushman ko halak kar de ga. Yeh dua Syed bin Taous ki Muhaj-ud-Da'waat mein bhi naqal ki gayi hai agarchay dono ke nuskhe mein qadray ikhtilaf hai. Hum Balad-ul-Ameen Kafami ke mutabiq is dua ko naqal kar rahe hain.)

Binam-e-Khudaye Meharban-o-Raheem

Khudaya mere kitne hi dushman hain jinhon ne adawat ki talwar ko kheench liya hai aur chhuri ki dhaar ko taiz kar liya hai. Tabar ki nauk taiz nikal li hai aur zehar-e-qatil tayyar kar liya hai. Apne teeron ka rukh meri taraf seedha kar diya hai aur un ki nigahbani ki aankh soti nahi hai. Aur un ka mansha-e-dili yeh hai ke mujhe har burayi mein mubtala kar dein aur har talkh ghoont pila dein lekin jab tu ne dekha ke main sakhtiyon ko bardasht karne mein kamzor hoon aur irada-e-jang rakhne walon ke intiqam se aajiz hoon aur dushmanon ke nargha mein akela hoon. Aur un ke baare mein woh tayyari nahi kar sakta jo unhon ne mere baare mein kar li hai to tu ne apni taqat se meri tayeed ki aur apni imdad se meri kamar ko mazboot bana diya. Dushmanon ki dhaar ko kund kar diya aur un ko saaz-o-saman ke bawajood ruswa kar diya. Mere paon ko un se buland kar diya aur jin makariyon ka rukh unhon ne meri taraf kar diya tha unhein, unhi ki taraf yoon palta diya ke woh na apni pyas bujha sake aur na apni ghaiz-o-ghazab ki garmi ko sard bana sake ghusse se apni unglyon ko kaatte rahe aur is aalam mein munh pher kar chal diye ke un ke lashkar madhosh reh gaye. Lehaza tera shukr hai ae Parwardigar jo aisa qadir hai ke mahloub nahi hota hai aur aisa haleem hai ke jaldi nahi karta hai. Muhammad (s.a.w.w) o Aal-e-Muhammad par rehmat nazil farma aur humein apni nematon ke shukr-guzaron aur ehsanat ke yaad karne walon mein qarar de de.

Khudaya kitne hi baghi hain jinhon ne makari se mujh par zulm kiya aur apne shikar ke jaal phaila diye aur musalsal mere halat ki nigrani karte rahe aur meri taraf rukh kar ke is tarah simat kar baith jaise darinda apne shikar ke liye baithta hai aur mauqa ka intezar karta rehta hai. Phir is ke baad bhi woh khushamadi masarrat ka izhar kar rahe thay aur kushada peshani ka muzahira kar rahe thay lekin jab tu ne dekha yeh andaz se makari kar rahe hain aur apne shareek-e-mazhab ke liye bhi bure jazbat chhupaye hue hain aur zulm ke liye taqat jama kar rahe hain to tu ne unhein sar ke bal jhuka diya aur un ki banyadon ko jad se ukhad kar phenk diya. Un ko unhi ki kameen-gah mein pachhad diya aur unhi ke khode hue gaddhe mein gira diya. Jahan rukhsaaron par pairon ki khaak jam gayi aur unhein aisi bimari aur faqiri mein mubtala kar diya ke un ko unhi ke patthar ka nishana bana diya aur unhi ki rassi ka phanda gale mein daal diya. Unhein unhi ke teeron se mara aur naak ke bal gira diya. Un ke makr ko unhi ki gardan mein daal diya aur unhein nadamat ne giriftar aur hasrat mein mubtala kar diya. Is ke baad woh apni nakhwat ke bawajood kamzor ho gaye aur phail jaane ke baad bhi sukad gaye. Zillat ke sath aisi rassi mein giriftar ho gaye jis mein mujhe giriftar dekhna chahte thay aur agar teri rehmat na hoti to qareeb tha ke main bhi in masaib mein mubtala ho jata. Ab tera shukr hai ae Parwardigar ke tu aisa sahib-e-qudrat hai jo mahloub nahi hota hai aur aisa bardbar hai ke jaldi nahi karta hai. Khudaya Muhammad (s.a.w.w) o Aal-e-Muhammad par rehmat nazil farma aur mujhe apni nemat ke shukr-guzaron aur apne ehsanat ko yaad karne walon mein qarar de de.

Khudaya kitne hi haasid hain jin ka hasad unhi ke guloo-geer ho gaya aur kitne hi dushman hain jo apne hi ghaiz-o-ghazab mein apni zaban ki tezi se mujhe takleef pahunchayi aur apne guzishta chashm se meri taraf ghalat ishare kiye. Mujhe teeron ka nishana banaya aur mere gale mein apni buraiyon ka haar daal diya. Aise waqt mein ae Parwardigar main ne tujhe panah ke liye pukara is aetimad ke sath tu furan sun le ga aur main tere is difa par bharosa kiye hue tha jo barabar dekhta raha tha aur mujhe maloom tha ke jo tere saaye-e-atifat mein aa jaye ga woh mahloub nahi ho sakta hai aur jisay teri madad ki panah-gah mil jaye usay hawadis khad-khada nahi sakte hain. Tu ne apni qudrat ke zariya mujhe dushman ke sharr se bacha liya. Lehaza ae Maalik teri hamd hai ke tu woh sahib-e-qudrat hai jo mahloub nahi hota hai aur woh haleem hai jo ajlat nahi karta hai. Muhammad (s.a.w.w) o Aal-e-Muhammad par rehmat nazil farma aur mujhe apni nematon ke shakireen aur apni rehmaton ke zakireen mein shumar farma le.

Khudaya kitni hi buraiyon ke baadal thay jinhein tu ne saaf kar diya aur kitne hi nematon ke aasman thay jinhein tu ne barsa diya. Kitni hi karamaton ki neherein thien jinhein jari kar diya aur kitne hi hawadis ke chashme thay jin ka munh band kar diya. Kitni hi taza rehmatain phaila dien aur kitne hi aafiyat ke libas pehna diye. Kitne hi shadeed ranj-o-gham ko door kar diye aur kitne hi jari rehne wale umoor muqaddar kar diye jinhein tu talab kare to tere hath se nikal nahi sakte hain aur tu bulaye to inkar nahi kar sakte hain. Lehaza tera shukr hai ae sahib-e-qudrat Parwardigar jo mahloub nahi hota hai aur sahib-e-ilm Maalik jo jaldi nahi karta hai. Muhammad (s.a.w.w) o Aal-e-Muhammad par rehmat nazil farma aur humein apni nematon ke shakireen aur apne ehsanat ke zakireen mein qarar de de.

Khudaya kitne hi husn-e-zann thay jinhein tu ne sach kar diya hai. Aur kitne hi ghurbat ke tod thay jinhein tu ne jodh diya hai. Khatarnak ghurbat ko badal diya hai aur halak-khaiz khatron se bacha liya hai aur mashaqqaton se mutmain bana diya hai. Tere amal ke baare mein koi baaz-purs nahi ho sakti hai. Aur baqi sab se sawal kiya jaye ga. Teri ata se tere khazane mein koi kami nahi hoti hai aur isi liye jab tujh se manga gaya to tu ne de diya aur jab nahi manga gaya to az-khud ata kar diya. Tere fazl-o-karam ke darwaza par awaaz di gayi to tu ne bukhl nahi kiya. Tu ne kabhi inaam, ehsan, karam aur fazl ke alawa kuch nahi kiya aur mujh nalayeq ne is ke alawa aur kuch na kiya ke tere muharramat ki pasdari na ki. Masiyaton par jurat paida kar li. Hudood se tajawuz kiya, azab se ghaflat barti aur apne aur tere mushtarak dushman ki itaat karta raha. Magar is ke baad bhi ae mere Parwardigar aur madadgar meri na-shukri ne bhi tujhe ehsanat ki takmeel se nahi roka aur na yeh ehsan mujhe gunahon ke irtekab se rok saka.

Khudaya tere samne woh banda-e-zaleel khada hai jo teri tauheed ka bhi mutarif hai aur tere huqooq ki adayigi mein taqseer ka bhi iqrar kar raha hai aur khud is baat ka gawah hai ke teri nemtain us par mukammal hain aur teri aadat-e-ehsan musalsal baqi hai. Lehaza ae mere Maalik-o-Parwardigar mujhe apne fazl se woh sab kuch de de jo main teri rehmat ki raah mein chahta hoon aur jis ko zeena bana kar main teri marzi tak pahunch jaoon aur tere azab se mehfooz ho jaoon aur apne izzat-o-karam aur apne Paighambar Muhammad (s.a.w.w) ke haq ke tufail mein aur sari hamd tere hi liye hai ae woh Khudaye Qadir jo mahloub nahi hota hai aur woh Maalik Haleem jo ajlat nahi karta hai Muhammad (s.a.w.w) o Aal-e-Muhammad par rehmat nazil farma aur mujhe apni nemat ke shukr karne walon mein aur apne ehsanat ko yaad rakhne walon mein qarar de de.

Khudaya tere kitne hi bande hain jo subh-o-shaam maut ke karb aur jaan-kani ke gaddhe mein mubtala hain aur woh dekh rahe jis se roungte khade ho jate hain aur dil laraz jate hain. Aur main in tamam baaton ki taraf se mukammal aafiyat mein hoon. Lehaza tera shukr hai ae Khudaye Qadir jo mahloub nahi hota hai aur ae Maalik Haleem jo jaldi nahi karta. Muhammad (s.a.w.w) o Aal-e-Muhammad par rehmat nazil farma aur mujhe apni nematon ke shukr-guzaron aur ehsanat ke yaad rakhne walon mein qarar de de.

Khudaya tere kitne hi bande hain jo bimarion aur dard mein mubtala ho kar nala-o-faryad kar rahe hain. Jo gham mein karwatein badal rahe hain. Aur koi chhutkara nahi pa rahe hain. Na khana achha lagta hai aur na pani aur main tere karam se badan ki sehat aur zindagi ki salamati mein hoon. Lehaza tera shukr hai. Ae Maalik-e-Qadeer ke jo mahloub nahi hota hai aur Khudaye Haleem jo ajlat nahi karta hai. Muhammad (s.a.w.w) o Aal-e-Muhammad par rehmat nazil farma aur mujhe apni nematon ke shukr-guzaron aur ehsanat ke yaad rakhne walon mein qarar de de.

Khudaya kitne hi bande hain jo subh-o-shaam khauf-zada, maroub, larzan, mubtala-e-wahshat, awara-e-watan, tangiyon aur goshon mein zindagi guzar rahe hain jahan zameen wusaton samait tang ho gayi hai aur na koi tadbeer hai, na panah-gah aur manzil-e-najat aur main in tamam museebaton se aman-o-aafiyat aur sukoon-o-itminan mein hoon lehaza tera shukr hai ae Khudaye Azeez jo mahloub nahi hota hai aur Maalik Hakeem jo jaldi nahi karta hai. Muhammad (s.a.w.w) o Aal-e-Muhammad par rehmat nazil farma aur mujhe apni nematon ke shukr-guzaron aur ehsanat ke yaad rakhne walon mein qarar de de.

Khudaya kitne hi bande hain jin ki subh-o-shaam zanjeeron aur lohe ke touq-o-salasil mein dushmanon ke hathon guzar rahi hai kisi ko reham bhi nahi aata hai aur ahl-o-ayal se door bhi hai aur watan-o-ahl-e-watan se juda bhi ho gaye hain, har aan yeh intezar hai ke kis tarah qatl kiya jaye ga aur kaise jism ke tukde kar diye jayein ge lekin main in tamam baaton ki taraf se aafiyat mein hoon. Lehaza tera shukr hai ae Khudaye Qadeer jo mahloub nahi hota hai aur ae Maalik Haleem jo jaldi nahi karta hai Muhammad (s.a.w.w) o Aal-e-Muhammad par rehmat nazil farma aur humein apni nematon ke shukr-guzaron aur apne ehsanat ke yaad rakhne walon mein qarar de de.

Khudaya tere kitne hi bande hain jo subh-o-shaam jang-o-jidal ki takleefon ko jheel rahe hain. Dushmanon ne charon taraf se talwaron, neezon aur aalaat-e-jang se gher liya hai aur aahni libas mein bhi pareshan-haal hain ke intihaayi koshish ke baad bhi koi bachne ka tariqa aur bhagne ka rasta nahi hai. Zakhmon se choor hain aur ghodon ki taapon ke niche apne hi khoon mein tadap rahe hain. Aarzu hai ke ek ghoont pani mil jaye ya ek nazar apne ahl-o-ayal ko dekh lein magar yeh bhi un ke ikhtiyar mein nahi hai. Aur main in tamam baaton ki taraf se aafiyat mein hoon. Lehaza teri hamd hai ae Parwardigar Qadir jo mahloub nahi hota hai aur ae Khudaye Haleem jo ajlat nahi karta hai Muhammad (s.a.w.w) o Aal-e-Muhammad par rehmat nazil farma aur humein apni nematon ke shukr-guzaron mein aur ehsanat ke yaad rakhne walon mein qarar de de.

Khudaya kitne hi bande hain ke jin ki subh-o-shaam samandaron ki tareekiyon, hawaon ke taiz jhakdon aur houlnaak maujon ke darmiyan guzar rahi hai ke har aan yeh umeed rehti hai ke kab gharq aur halak ho jayein ge aur bachne ki koi tadbeer nahi hai ya phir bijli ke girne, makan ke girne, aag ke lagne, luqma ke guloo-geer ho jaane, zameen ke dhans jaane, soorat ke bigad jaane aur sang-sar ho jaane ke khatrat mein mubtala hain aur main in sab ki taraf se aafiyat mein hoon. Lehaza teri hamd hai ae Khudaye Qadeer jo mahloub nahi hota hai aur ae Maalik Haleem jo jaldi nahi karta hai Muhammad (s.a.w.w) o Aal-e-Muhammad par rehmat nazil farma aur mujhe apni nematon ke shukr-guzaron aur ehsanat ke yaad rakhne walon mein qarar de de.

Khudaya kitne hi bande hain jin ki subh-o-shaam is masafarat mein hoti hai jis mein ahl-o-ayal se door ya sahraon mein hairan janwaron o darindon ke darmiyan pareshan yakka-o-tanha rehte hain ke jahan na bachne ka koi hila hai aur na rasta ya sardi-o-garmi, bhook aur aryani jaise masaib mein mubtala hain jin se main bilkul khali aur aafiyat mein hoon. Lehaza tera shukr hai ae Parwardigar Qadeer jo mahloub nahi hota hai aur ae Khudaye Haleem jo jaldi nahi karta hai Muhammad (s.a.w.w) o Aal-e-Muhammad par rehmat nazil farma aur mujhe apni nematon ke shukr-guzaron aur ehsanat ke yaad rakhne walon mein qarar de de.

Khudaya kitne hi bande hain jin ki subh-o-shaam faqiri, nadari, barahnagi mein guzarti hai. Jahan tangi-e-ma'ash se larazte rehte hain aur har ek ki taraf se nazar-andaz kar diye jate hain. Bhook pyas mein is intezar mein rehte hain ke koi un par ehsan kar de ya aise bande bhi hain ke tere nazdeek mujh se zyada wajeeh hain aur mujh se zyada ibadat-guzar hain lekin un ki gardano mein touq hain aur un par tangdasti, shiddat-e-bandagi, zahmat-e-ghulami aur tax ka bojh lada hua hai ya aisi bala mein mubtala hain jin ka samna tere ehsan ke baghair nahi ho sakta hai. Magar main tere karam se sahib-e-nemat, sahib-e-aafiyat, muhtaram aur khadmon ka makhdoom hoon lehaza ae Parwardigar tera shukr ke tu woh Qadeer hai jo mahloub nahi hota hai aur woh Kareem hai jo ajlat nahi karta hai. Muhammad (s.a.w.w) o Aal-e-Muhammad par rehmat nazil farma aur humein apni nematon ke shukr-guzaron aur ehsanat ke yaad rakhne walon mein qarar de de.

Khudaya kitne hi bande hain jo subh-o-shaam bimari aur dard mein mubtala rehte hain. Bistar-e-bimari par libas-e-bimari mein dahine bayein karwatein badalte rehte hain. Na khane ka maza milta hai na peene ka apne nafs ko hasrat se dekhte hain lekin usay faida ya nuqsan kuch nahi pahuncha sakte hain aur main tere karam se in tamam baaton se mehfooz hoon lehaza tere alawa koi khuda nahi hai. Tu Qadir be-niyaz hai jo mahloub nahi hota hai aur Khudaye Haleem hai jo jaldi nahi karta hai. Muhammad (s.a.w.w) o Aal-e-Muhammad par rehmat nazil farma aur humein apne ibadat-guzaron, apni nemat ke shakiron aur apne ehsanat ke yaad rakhne walon mein qarar de de aur hum par rehmat nazil farma ae sab se zyada meharbani karne wale.

Ae mere Maula-o-Aqa kitne hi bandon ki subh-o-shaam is aalam mein hoti hai ke maut ka din qareeb aa gaya hai. Malak-ul-Maut ne apne ghere mein le liya hai bimar maut ki sakhtiyon ko jheel raha hai. Kabhi dahine dekhta hai kabhi bayein. Dost ahbab aizza sab par hasrat ki nigah karta hai magar na baat karne ki ijazat hai aur na khitab karne ki. Apne hi nafs ko hasrat se dekhta hai aur koi faida ya nuqsan nahi pahuncha sakta hai. Aur main tere fazl-o-karam se in tamam baaton se mehfooz hoon. Tere alawa koi khuda nahi hai. Tu Khudaye be-niyaz-o-Qadeer hai jo kisi se mahloub nahi hota hai aur aisa Haleem hai ke jaldi nahi karta hai. Muhammad (s.a.w.w) o Aal-e-Muhammad par rehmat nazil farma aur hum ko apni ibadat-guzaron, apni nemat ke shakiron aur apne ehsanat ke yaad rakhne walon mein qarar de de aur apni rehmat se meharbani farma. Ae behtareen rehmat nazil karne wale.

Khudaya kitne hi bande hain jin ki subh-o-shaam qaid-khana ki tangiyon, ranj-o-gham aur lohe ki zanjeeron mein guzarti hai. Jahan qaid-khana ke zimmedar-o-nigran unhein karwatein badalwa rahe hain aur yeh nahi maloom hai ke un ka anjam kya hone wala hai aur kis tarah unhein tukde tukde kar diya jaye ga. Woh zindagi ki takleefon aur hayat ki tangiyon mein yoon ji rahe hain ke apne nafs ko hasrat se dekh rahe hain aur koi faida ya nuqsan nahi pahuncha sakte hain halanke main tere fazl-o-karam se in tamam baaton se aafiyat mein hoon. Tere alawa koi khuda nahi hai. Ae Qadeer be-niyaz jo kisi se mahloub nahi hota hai aur Maalik Haleem jo jaldi nahi karta hai. Muhammad (s.a.w.w) o Aal-e-Muhammad par rehmat nazil farma aur humein apne ibadat-guzaron aur apni nematon ke shakireen aur apne ehsanat ko yaad rakhne walon mein qarar de de aur hum par apni rehmat se meharbani farma ae sab se zyada reham karne wale.

Mere Maalik mere Parwardigar kitne hi bande hain ke jin ki subh-o-shaam is halat mein hoti hai ke un par hukm-e-qaza jari ho chuka hai aur balaon ne unhein gher liya hai ahbab-e-mukhliseen se juda ho gaye hain aur kuffar ke hathon mein aseeri, haqarat aur zillat ki zindagi guzar rahe hain aur dushman unhein dahine bayein karwatein badalwa rahe hain. Tareeki-e-zindan mein qaid kar diye hain aur zanjeeron mein jakad diye gaye hain. Na duniya ki raushni dikhayi padti hai aur na rahat-o-aaram. Apne hi nafs ko hasrat se dekhte hain aur faida ya nuqsan nahi pahuncha sakte hain. Lekin main tere fazl-o-karam se in tamam baaton se mehfooz hoon. Lehaza tere alawa koi khuda nahi hai. Tu woh Khudaye Qadeer hai jo kisi se mahloub nahi hota hai aur woh Haleem-o-Bardbar hai jo jaldi nahi karta hai. Muhammad (s.a.w.w) o Aal-e-Muhammad par rehmat nazil farma aur apne ibadat-guzaron aur apni nemat ke shakiron aur apne ehsanat ke yaad rakhne walon mein qarar de de. Aur mujhe apni rehmat se meharbani farma ae sab se zyada meharbani karne wale.

Khudaya tere izzat-o-jalal ki qasam main teri nematon ka mutaliba bhi karoon ga aur israr bhi karoon ga. Teri taraf hath bhi badhaoon ga halanke yeh hath mujrim hain magar kya karoon, kis se panah mangoon, kis ke saye mein jaoon. Mere paas tere alawa koi nahi hai. Tu mujhe kaise palta de ga jabke tujh par hi mera aetimad aur bharosa hai main tujh se ism-e-garami ke waaste se sawal kar raha hoon jisay aasmanon par rakh diya gaya to thehar gaye aur zameen par rakh diya gaya to qarar aa gaya aur pahadon par rakh diya to istehkam paida ho gaya. Raat par rakkha to tareek ho gayi aur din par rakkha to raushan ho gaya. Muhammad (s.a.w.w) o Aal-e-Muhammad par rehmat nazil farma aur meri tamam haajaton ko poora kar de. Tamam chhote bade gunahon ko maaf kar de. Rizq mein wusat ata farma ke jis ke zariya mujhe duniya-o-akhirat ke sharaf tak pahuncha de. Ae sab se zyada reham karne wale.

Khudaya main tujh se talab-e-imdad hoon to Muhammad (s.a.w.w) o Aal-e-Muhammad par rehmat nazil farma aur meri imdad farma. Main talib-e-panah hoon mujhe panah de de. Mujhe apni itaat ke zariya bandon ki itaat se be-niyaz bana de ae apni bargah mein sawal ke zariya logon ke samne hath phailane se bacha le. Mujhe faqiri ki zillat se be-niyazi ki izzat tak aur masiyat ki zillat se itaat ki izzat tak pahuncha de. Ke tu ne apne jood-o-karam se bohat si makhlooqat se afzal qarar diya hai ke jis ka main qat'an mustahiq nahi tha. Khudaya in tamam baaton par teri hamd hai. Muhammad (s.a.w.w) o Aal-e-Muhammad par rehmat nazil farma aur mujhe apni rehmat ke shukr-guzaron aur rehmaton ke yaad rakhne walon mein qarar de de.