Du'a-e-Faraj Hazrat Hujjat 'ajjallalahu ta'aala farajahu

(Kaf'ami (RA) ne Balad-ul-Ameen mein farmaaya hai ke yeh du'a Hazrat Saahib-ul-Amr Ajjalallahu Ta'ala Farajahu Shareef ki hai jis ko aap ne ek qaidi ko ta'leem diya aur woh us ke nateejah mein azaad ho gaya.)

Khudaya. Balaa-o-maseebat bahut azeem hai

Aur meri be-chaargi bhi waazeh hai.

Saare parde uṭh chuke hain

Aur saari ummeedeiñ ṭooṭ chuki hain.

Zameen tang ho gayi hai

Aur aasman ke raaste band ho gaye hain

Ab tu hi madadgaar hai

Aur teri hi taraf fariyaad hai

Aur har sakhti-o-narmi mein tere hi upar bharosa hai.

Khudaya Hazrat Muhammad (SAW) aur un ki us Aal par rehmat naazil farma

Jo Saahibaan-e-Amr hain. Jin ki itaa'at ko tu ne farz qaraar diya hai.

Aur isi itaa'at se tu ne un ke martabe ko pehchanwaaya hai.

Un ke haqq ke waaste se

Hum se fauran is maseebat ko palak jhapakte mein khatm kar de

Ya is se bhi kam waqfe mein.

Ay Muhammad (SAW) Ay Ali (AS).

Ay Ali (AS) Ay Muhammad (SAW).

Aap hamaare liye kaafi ho jaaeiñ ke aap kaafi hain.

Aap hamaari madad kareiñ ke aap madadgaar hain.

Ay Hazrat Saahib-uz-Zamaan (AS)

Fariyaad hai. Fariyaad hai. Fariyaad hai.

Meri madad kareiñ. Meri madad kareiñ. Meri madad kareiñ.

Abhi, abhi, abhi.

Fauran, fauran, fauran.

Ay Khudaye Arham-ur-Raahimeen.

Bi-haqq-e-Muhammad (SAW) wa Aal-e-Muhammad (SAW) hamaari madad farma.