Ranjeedah, Pareshaan Haal, Mehzoon ki Du’a

(Shaikh Kaf’ami (RA) ne Balad-ul-Ameen mein Ameer-ul-Momineen Alaihissalaam se ek du’a naql ki hai ke jo bhi ranjeedah, pareshaan haal, mehzoon, giraftaar masaa’il, khaufzadah is ko paṛhega Parwardigaar us ko maseebat se nijaat inayat karega.)

Ay woh jo har be-sahaare ka sahaara,

Har be-zakheerah ka zakheerah,

Har be-sanad ke liye sanad,

Har be-panaah ke liye panaah gaah,

Har be-waseelah ke liye fariyaad ras,

Har khaali haath ke liye khazaana

Aur har kamzor ke liye izzat hai.

Ay behtareen ma’aaf karne waale

Aur behtareen darguzar karne waale

Ay kamzoroñ ke madadgaar,

Ay faqeeroñ ke khazaane,

Ay azeem markaz-e-ummeed,

Ay ḍoobne waaloñ ko bachaane waale,

Halaak hone waaloñ ko nijaat dene waale,

Behtareen bartaa’o karne waale, Ehsaan karne waale,

Ne’mat dene waale, fazl-o-karam karne waale

Tu hi woh hai jis ke saamne sabhi sajda rez hain, raat ki siyaahi, din ki roshni,

Qamar ki zao, aaftaab ki shu’aa,

Drakhtoñ ki aawaazeiñ aur paani ka zamzamah.

Ay Allah Ay Allah Ay Allah

Tere ilawa koi Khuda nahin hai.

Tu akela hai. Tera koi shareek nahin hai.

Ay Parwardigaar, Ay Allah

Muhammad (SAW) wa Aal-e-Muhammad (SAW) par rehmat naazil farma

Aur hamaare saath woh bartaa’o karna jis ka tu ahl hai.

Ay woh Parwardigaar jo har shai ke liye kaafi hai

Aur us se koi shai kaafi nahin hai.

Tu mere liye har aham amr mein kaafi ho ja.